Ուկրաինան հայտնել է «Եվրատեսիլ 2017»-ին Ռուսաստանի մասնակցության պայմանները
Ուկրաինական իշխանությունները հայտնել են «Եվրատեսիլ 2017»-ի Ռուսաստանի ներկայացուցչին ընդունելու պատրաստակամության մասին այն դեպքում, եթե Սամոյլովային փոխարինի Ուկրաինայի օրենսդրության հետ խնդիր չունեցող որևէ այլ մասնակից: Այս մասին գրում է РИА Новости-ն՝ վկայակոչելով երկրի փոխվարչապետ Վյաչեսլավ Կիրիլենկոյի խոսքերը:
«Անխոս, մենք պատրաստ ենք ընդունել «Եվրատեսիլի» բոլոր 43 մասնակից երկրներին, այդ թվում՝ Ռուսաստանի ներկայացուցչին: Ռուսաստանն ինքը կարող է այս իրավիճակում իր համար ելք գտնել՝ առաջարկելով այլ մասնակցի, ով ուկրաինական օրենսդրության հետ որևէ խնդիր չունի: Այդ դեպքում խնդիրը շատ արագ կլուծվի»,- հայտնել է Կիրիլենկոն:
Միևնույն ժամանակ փոխվարչապետը նշել է, որ Կիևը հույս ունի, թե Մոսկվան կընդունի նման պայմաններ: Մրցույթի շուրջ ստեղծված իրավիճակը գործիչը Ռուսաստանի կողմից պրովոկացիա է որակել:
Սամոյլովան Ռուսաստանը պետք է ներկայացներ «Եվրատեսիլ 2017»-ին «Flame Is Burning» երգով, բայց երգչուհուն արգելել էին մուտք գործել Ուկրաինայի տարածք՝ Ղրիմում ելույթ ունենալու պատրվակով: