Ես «Կյանքի խոսք» եկեղեցու հետ որևէ առնչություն երբևիցե չեմ ունեցել և չունեմ. Ստյոպա Սաֆարյան
Օրերս համացանցում տարածվել էր ֆեյսբուքյան մի օգտատիրոջ գրառում, ով ներկայացնում է մանրամասներ «Կյանքի Խոսք» աղանդի մասին և պնդում, որ աղանդի անդամներ են համարվում մի շարք հայտնի քաղաքական գործիչներ և շոու-բիզնեսի ներկայացուցիչներ, մասնավորապես՝ Շուշան Երիցյան, Անի Զախարյան, Ստյոպա Սաֆարյան, Հովհաննես Ազոյան, Վլադիմիր Արզումանյան, Նուարդ Մինասյան, Գոռ Բարսեղյան, Վարսա, Հռագ:
Այս մասին Operativ.am-ի թղթակիցը զրուցեց քաղաքագետ, Միջազգային և անվտանգության հարցերի հայկական ինստիտուտի նախագահ Ստյոպա Սաֆարյանի հետ:
Վերջինս պատասխանելով այն հարցին, թե արդյոք գրառումը համապատասխանում է իրականությանը, նշեց. «Բացարձակապես չի համապատասխանում իրականությանը, և ես սա դիտարկում եմ որպես այս նախընտրական շրջանում էժանագին սև PR: Թերևս կարող եմ կապել ուղղակի դրա հետ, քանի որ չեմ բացառել խորհրդարանական ընտրություններին մասնակցելը և կարծում եմ այդ ֆեյք օգտատիրոջ միջոցով, այլ հանրահայտ անունների հետ մեկտեղ՝ ուղղակի խցկել իմ անունը և զրպարտել՝ պարկեշտ վարքագիծ չէ: Ցավոք, արաքը քրեորեն պատժելի չէ, բայց ով գնում է նման քայլի, ապա թող իր խղճի առաջ պատասխան տա: Ես «Կյանքի խոսք» եկեղեցու հետ որևէ առնչություն երբևիցե չեմ ունեցել և չունեմ, եթե նույնիսկ ունենայի, ապա կարող եմ ասել, որ դրա մասին չէի խուսափի հայտարարել: Այս առումով ոչ միայն իմ հավատաքննիչը չի կարող լինել տվյալ անձնավորությունը, թե ես ինչ աստվածություն եմ պաշտում և ինչպես եմ պաշտում, այլ նաև ուղղակի համարում եմ էժանագին քայլ, որը պատիվ չի բերում այն պատվիրողին»:
Մեր ճշտող հարցին, թե ինչ եք պատրաստվում անել, փորձելու եք արդյոք դիմել ինչ-որ կառույցների նրան պատասխանատվության ենթարկելու զրպարտության համար, քաղաքագետը նշեց. «Ես առիթ ունեցել եմ նմանատիպ և շատ ավելի այլանդակ անձնական վիրավորանքներ պարունակող գրառումների համար դիմել Քննչական կոմիտե, բայց վերջինս հստակ հասկացրել է, որ ամենևին էլ նախատեսված չէ հանցագործություններ քննելու համար: Հետևաբար, ուղղակի բավարարվում եմ հերքելով իմ անձի հետ կապված այդ ապատեղեկատվությունը և ոչ ավելին: Ես սա հերքում և մերժում, որ ընդդիմախոսների նկատմամբ նման գործունեություն կարող է ծավալվել և նման կեղտոտ պատվեր կարող է իջեցվել»,- ասաց նա:
Դիտարկմանը, թե փաստորեն պնդում եք, որ սա դիտավորություն է և պատվեր, Ստյոպա Սաֆարյանն ասաց, որ իհարկե, սա դիտավորություն է և վերջին շրջանում առաջին դեպքը չէ, երբ ինչ-որ անհայտ օգտատեր նման զրպարտություն է հրապարակում անվան հետ կապված, հետո դա հայտնվում է բլոգային հարթակներում, կամ անգամ հեռուստաէկրաններում որպես բլոգային գրառում:
«Դա էժանագաին հնարք է, ես թաքցնելու ոչինչ չունեմ և ինձ համար դա հերքելը, եթե ոչ մեկ անգամ, ապա երկու, երեք, չորս, անթիվ անգամ խնդիր չէ, և ես, անկեղծ ասած, այդ եկեղեցու տեղը, անդամներին էլ չգիտեմ, հետևաբար, թաքցնելու որևէ բան չկա: Եթե ես անգամ լինեի այդ եկեղեցու անդամ, թեպետ ես հարում եմ Առաքելական եկեղեցուն, ապա հաստատապես չէի խուսափի ասել, որ այդ դավանանքին եմ հարում, կամ օրինակ՝ «Ավետարանչական», կամ կաթոլիկ լինեի, միևնույն է՝ ես չէի թաքցնի: Ի վերջո, դա քրեորեն պատժելի արարք չէ և մարդու իրավունքն է: Նման արարքներն արվում է միայն հանրությանը քեզ դեմ տրամադրելու, իմանալով, թե Առաքելական եկեղեցու հետևորդները, կամ հենց եկեղեցին ինչպես են վերաբերվում»,- շեշտեց նա:
Մեկ այլ հարցին, թե ինչ կասեք ցանկում տեղ գտած մյուս անձանց մասին, նա եզրափակելով խոսքը ասաց. «Ես գիտեմ, որ թվարկված անձանց վերաբերյալ պարբերաբար նման կեղտոտ զրպարտություն եղել է, որոշներին չգիտեմ և վերաբերմունք չեմ կարող արտահայտել, բայց ում էլ գիտեմ, հարգում եմ և անթույլատրելի եմ համարում ուղղակի նման արարքը, քանի որ նրանց վերաբերյալ շատ են եղել հրապարակումներ, ապա ենթադրում եմ, որ ուղղակի նրանց վերաբերյալ ստեղծված այդ որոշակի շրջանակներում ֆորում են օգտագործում մամուլ մտցնելու: Մի՛ արեք այդպիսի բան: Նողկալի, ցածր, բանական մարդուն ոչ վայել պահվածք է»: