Թուրքիայի՝ Հայաստանի հետ սահմանին պատ կառուցելու նպատակների մասին

Սիրիական ռազմաքաղաքական գործընթացներում Ռուսաստանի ու Թուրքիայի գործողությունների կոորդինացման հարցի շուրջ ձեռքբերված քաղաքական կոնսենսուսին զուգահեռաբար Թուրքիան ծրագրում է բետոնապատել Արդահան-Ղարս-Իգդիր երկայնքով Հայաստանի հետ ունեցած սահմանը:

Թուրքիայի պաշտոնական աղբյուրների համաձայն` այդ քայլով Թուրքիան ձգտում է անվտանգ դարձնել երկրի սահմանամերձ շրջանները ահաբեկչության սպառնալիքից, սահմանային մաքսանենգությունից: Հաշվի առնելով այն հանգամանքը, որ հայ-թուրքական սահմանը հայկական կողմից հսկում են ռուս սահմանապահները, Հայաստանի հետ սահմանի նշյալ հատվածի` թուրքական կողմի բետոնապատման մտադրությունը ունի ըստ էության ավելի շուտ հակառուսական, քան հայկական վեկտոր:

Նախ` Հայաստանը Հարավային Կովկասի միակ պետությունն է, որը կարողանում է իր սահմանների անվտանգությունն ապահովել ամենաբարձր մակարդակով:

Բավական շատ է խոսվել այն մասին, որ Հյուսիսային Կովկասից ահաբեկչական տարբեր խմբավորումներն անարգել հատում են Ադրբեջանի ու Վրաստանի տարածքը և դիրքավորվում Թուրքիայում, իսկ այնտեղից արդեն` անցնում Իրաք ու Սիրիա` տեղի ահաբեկչական գործողություններին մասնակցություն ունենալու նպատակով.
Այս տեսանկյունից Հայաստանի սահմանային անվտանգության ապահովման հիմնահարցն իսկապես նախանձելի է:

Թուրքիան այս քայլով փորձում է պաշտպանել իր սահմանամերձ շրջանները արտաքին «հնարավոր ահաբեկչական սպառնալիքներից», այն պարագայում, երբ երկրում երկրաչափական պրոգրեսիայով է աճում իրականացվող ահաբեկչությունների թվաքանակը.

Մյուս կողմից, պաշտոնական Անկարան պատի կառուցապատման մտադրությամբ երկար ժամանակով սառեցնում է հայ-թուրքական սահմանի վերաբացման գործընթացը:

Սակայն այս ամենում կա նաև ռացիոնալ հատիկ. սահմանի նշյալ հատվածի երկայնքով պատի հնարավոր կառուցումը կապահովագրի Հայաստանի սահմանային անվտանգության պաշտպանությունը Թուրքիայում աճող ահաբեկչական ալիքի սպառնալիքից:

Կարեն Վերանյան. ֆեյսբուք: