Դասարանում երկու հոգի էինք մնացել Ձմեռ պապիկին հավատացող, և բոլորը մեզ համոզում էին, որ դուք գիժ, աննորմալ եք. ՀՀԿ-ական պատգամավոր (տեսանյութ)
2016 թվականին հայաստանյան քաղաքական կյանքում տեղի ունեցան բազմաթիվ և բազմապիսի իրադարձություններ, որոնցից շատերն եղան շրջադարձային: 2016 թվականն անխոս կմտնի հայոց պատմության մեջ առաջին հերթին ապրիլին տեղի ունեցած քառօրյա պատերազմով: Անկախության համար պայքարն իրապես կյանքի ու մահվան կռիվ դարձավ: 2016-ի հետևանքները դեռ հնարավորություն կունենանք ճաշակելու:
2016 թվականի ձեռքբերումների, կորուստների, 2017 թվականի սպասելիքների մասին Operativ.am-ի թղթակիցը զրուցել է ՀՀԿ ԱԺ պատգամավոր Կարեն Բեքարյանի հետ:
-Պարո՛ն Բեքարյան, ամփոփելով տարին, որպես անհատ կամ քաղաքական գործիչ ի՞նչ տվեց Ձեզ 2016 թվականը:
Ի՞նձ, անձա՞մբ...կդժվարանամ ասել: Շատ հույզեր` շատ հարցերի հետ կապված: Միևնույն ժամանակ, տարին շատ հարուստ էր իրադարձություններով, այդ թվում նաև ոչ լավ իրադարձություններով: Ես կարծում եմ, որ 2016 թվականն իրադարձությունների և զգայուն հարցերի բավականին մեծ պաշար ուներ:
-Ի՞նչ ակնկալիքներ ունեք 2017 թվականից:
Խաղաղության, հանդարտության: Մեր հասարակության ակնկալիքների լիարժեք բավարարում կամ, եթե չի ստացվում, ապա գոնե այնպիսի ընթացք, որը մարդկանց ցույց կտա, որ ահագին բան դեպի լավն է փոխվում: Անհատապես անդրադառնալով ընտանիքներին, ապա կրկին նույն մաղթանքները՝ խաղաղություն, ջերմություն, հանդարտություն, առողջություն, երջանկություն, ամենալավը:
-Ի՞նչ եք նվիրելու ընտանիքի անդամներին:
Սկսել եմ գործընթացը, բայց դեռ չեմ վերջացրել, որովհետև երեխաների պարագայում փորձում ենք մեկ նվերով չսահմանափակվել, դա իրենց ավանդական «տոպրակներն» են, որոնց մեջ կան տարբեր բաներ, որը մեկ օրում երբեք չես հասցնում, այսինքն՝ գործընթացը սկսվում եմ մոտ 10-15 օր շուտ, որ հնարավոր լինի հասցնել:
Փորձում ես համատեղել երևի 3 բան.
1. Եթե կարողացել ես, ստացվել է, համընկեցրել ես իրենց ցանկությունները:
2. Փորձում ես դրա մեջ ներառել ինչ-որ էլեմենտներ, որը «պետք» է դաշտից է, այսինքն՝ լավ կլինի որ լինի, առիթ է և այլն:
3. Եվ հաստատ, ուզես, թե չուզես, ներառում ես քո ճաշակը, այսինքն՝ այնպիսի բան, որը հնարավոր է փոքր ժամանակ ինքդ կուզեիր ստանալ:
Նույն սկզբունքն է ոչ միայն փոքրերին, այլ նաև ընտանիքի մեծերին: Գործընթացը սկսվել է և դեռ չեմ ավարտել:
-Որտե՞ղ եք նշելու Ամանորը և ո"ւմ հետ:
Տանը, ընտանիքիս հետ:
-Նախընտրում եք նշել ճո՞խ, թե" համեստ միջավայրում:
Ես միշտ շատ եմ սիրել, որ միջավայրը լինի մտերմիկ: Մարդկանց քանակից չի բխում: Ամեն դեպքում, տարիներ ի վեր մեր աշխատանքային ռիթմից, ռեժիմից ելնելով Նոր տարվա օրերն իրենց մեջ ունեն նաև հանգստի էլեմենտը, որ դու կտրվում ես ամեն ինչից և կարող ես տանը՝ ընտանիքում, մի փոքր հանդրատվել, հանգստանալ, ռիթմից դուրս գալ: Այդ պարագայում, ես շատ ավելի նախընտրում եմ հանգիստ միջավայրը, որտեղ մտերիմներն են, որտեղ որևէ կերպ ինչ-որ պարտավորեցնող էլեմենտ չկա:
-Փոքր ժամանակ կամ երիտասարդ տարիքում ո՞րն էր ամենատպավորիչ նվերը, որ ստացել եք:
Մի հատ չի եղել: Ես փոքր ժամանակ բավականին մեծ սեր ունեի և հավաքում էի ինքնաթիռների և մեքենաների կոլեկցիա: Շատ երկար եմ հավատացել Ձմեռ պապիկին: Դասարանում երկու հոգի էինք մնացել հավատացող և բոլորը մեզ համոզում էին, որ դուք գիժ, աննորմալ եք և այլն, բայց մենք համառորեն շարունակում էինք հավատալ: Ձմեռ պապիկն Ամանորին միշտ հաջողացնում էր հենց այդ իմ սիրած ինքնաթիռը կամ մեքենան բերեր, շատ հետաքրքիր հիշում եմ նաև այն տարիները, երբ լինում էր երկուսը:
-Եթե լինեիք 21-րդ դարի երեխա, ի՞նչ կուզեիք Ձմեռ պապիկից:
Նայում եմ, թե ինչ են ուզում և շատ դեպքերում զարմացնում է և անհասկանալի է, որովհետև հիմնականում ցանկությունները կապված են լինում համակարգչային տեխնոլոգիաների, խաղերի հետ:
-Հավատում ե՞ք ամանորյա հրաշքին:
Եթե անկեղծ լինեմ, ապա, ամանորյա այդ հրաշքի նկատմամբ, ինձ մոտ ինչ-որ ներքին բան կա՝ հավատ: Միշտ տպավորություն կա, որ ինչ-որ բան փոխվում, թարմանում, նորից է սկսում, անկախ այն հանգամանքից, թե դու դա պատկերացնում, գիտակցում ես և մինչև վերջ ինքնդ քեզ կկարողանաս բարձրաձայնել, թե ոչ: Ես որոշակի այդ փոփոխության և իր մեջ այդ հրաշքի էլեմենտին հավատում եմ: Ինձ համար ամենակարևորը լինում է այն, որ այդ օրը բոլոր մտերիմ մարդիկ ուրախ լինեն, այսինքն՝ լինի ինչ-որ բան, որ իրենց համար շատ դրական է: Եվ դա ամենևին էլ պարտադիր չէ, որ նվերով արտահայտվի, այլ տրամադրության վրա ազդեցություն ունենա:
-Ի՞նչ կմաղթեք հայ ժողովրդին:
Ամենալավն ու բարին, թե՛ հավաքական, ընդհանրական, թե՛ անհատականացված յուրաքանչյուրի մեջ և թե՛ բոլորի ընտանիքներին: Ամենալավն ու բարին, խաղաղություն, երջանկություն, առողջություն, դրական էմոցիաներ, որոնք կտան այն հստակ զգացողությունը, որ ինչ-որ բան է փոխվում և դա փոխվում է դեպի լավը: Անընդհատ ինչ-որ բան փոխվում է դեպի լավը:
Operativ.am-ը շնորհավորում է պատգամավորին, ցանկանում բեղուն աշխատանքային տարի և նոր ձեռքբերումներ: