Մհեր Շահգելդյանը՝ Կառավարության նոր ծրագրի և Ադրբեջանի ագրեսիայի մասին

Այսօր՝ հոկտեմբերի 28-ին, ԱԺ-ում տեղի ունեցած ճեպազրույցների ժամանակ ՕԵԿ խմբակցության քարտուղար Մհեր Շահգելդյանը նշեց, որ Կառավարության նոր ծրագիրը լիարժեք չի համարում, չնայած նրան, որ կան նոր մոտեցումններ, բայց կան նաև խնդիրններ:

«Անհրաժեշտ է լինելու քաղաքական կամք, որովհետև կան լոկալ շահեր, որ խանգարելու են: Բավականին օդիոզ դեմքեր հիմա կառավարությունում չեն, բայց միայն այս տեսանկյունից փոփոխություններ անել՝ հնարավոր չէ»,- պնդեց նա:

Նրա խոսքով՝ «Նաիրիտի» և «Քիմպրոմի» հետ կապված հարցերը դուրս են մնացել Կառավարության ծրագրից։

««Նաիրիտ»-ի վերաբերյալ քննարկումները կշարունակվեն, քանի որ այն կարող է լուծել սոցիալական մի շարք կարևոր հարցեր»,- ասաց ՕԵԿ խմբակցության քարտուղար Մհեր Շահգելդյանը

Նա ընդգծեց, որ իրենք չեն կարող չգնահատել այն ձեռքբերումը, որ Կառավարության նոր կազմը համալրվեց իրենց գործում գիտակ մասնագետներով, սակայն, միայն այսքանը քիչ է։

«Կառավարության ծրագրում պետք է առանձին տեղ հատկացվեր գործազրկության հարցին, քանի որ դրա միտումները Հայաստանում ավելանում են։ Ներկայումս 4-8%-ով աշխատունակ բնակչության քանակը քչացել է, մարդիկ դուրս են գալիս հանրապետությունից։ Մոտ 17%-ով էլ աշխատանք փնտրողների քանակն է ավելացել»,- դիտարկեց պատգամավորը։

Անդրադառնալով վերջին օրերին սահմանի լարվածությանը, նա նշեց, որ ապրիլյան քառօրյա սրացմանը, ադրբեջանական ագրեսիայից հետո, այսպիսի դիվերսիոն գործողություններ դեռ չէին եղել:

Նրա պնդմամբ՝ դա մասնակիորեն կապված էր Ադրբեջանում սահմանադրական հանրաքվեի հետ, որը լրջորեն քննադատվեց դեմոկրատական երկրների կողմից:

«Ես ենթադրում եմ, որ սա կարող է լինել նաև այն քաղաքականության մի մասը, որ ունի ներքին ու արտաքին կիրառություն»

Ըստ նրա՝ նավթի գների անկման հետ միասին, իհարկե, նրանց ռեսուրսները պակասում են, բայց Ադրբեջանը փորձում է գտնել ՀՀ պաշտպանության թույլ տեղերը և սա ռազմական մարտավարության մի մասն է: