ԱԺ հոկտեմբերի 25-ի նիստի ամփոփումը

Հոկտեմբերի 25-ին խորհրդարանը շարունակել է քառօրյա նիստերի աշխատանքը՝ քվեարկությամբ ընդունելով նախորդ օրը քննարկված օրենսդրական նախաձեռնությունները, վավերացնելով համաձայնագրերը:

Պատգամավորներն ԱԺ նախագահի առաջարկով ողջունել են ԱԺ «Բաց դռներ» ծրագրի շրջանակում խորհրդարան այցելած եւ նիստի ընթացքին հետեւող Երևանի Վալերի Բրյուսովի անվան պետական լեզվահասարակագիտական համալսարանի ուսանողներին եւ դասախոսներին:

Այնուհետեւ խորհրդարանն առաջին ընթերցմամբ քննարկել է «Հայաստանի Հանրապետության քաղաքացիության մասին» ՀՀ օրենքում փոփոխություն կատարելու մասին» և «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն կատարելու մասին» օրինագծերի փաթեթը, որը ներկայացրել է ՀՀ ոստիկանության պետի տեղակալ Վարդան Եղիազարյանը: Նա տեղեկացրել է, որ օրենսդրական կարգավորմամբ կվերացվի ՀՀ քաղաքացու կողմից այլ պետության քաղաքացիություն ընդունելու կամ ստանալու դեպքում լիազոր մարմնին սահմանված կարգով հայտնելու պահանջը ու այդ մասին չհայտնելու համար նախատեսված վարչական պատասխանատվությունը, քանի որ նշված պարտականության կատարումը ՀՀ քաղաքացիների համար իրավունքների իրականացման պայման ընդհանուր առմամբ չի հանդիսանում: Ըստ պարոն Եղիազարյանի՝ փաթեթի ընդունմամբ կպարզեցվի ոստիկանության կողմից երկքաղաքացիների վերաբերյալ իրականացվող վարչարարությունը, իսկ ՀՀ քաղաքացիներն այլ պետության քաղաքացիություն ստանալու դեպքում կազատվեն առանց անհրաժեշտության ոստիկանությանը տեղեկացնելու պարտականությունից:

Գլխադասային՝ ԱԺ պետական-իրավական հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Հայկ Գրիգորյանը:

ՀՀ ֆինանսների նախարարի տեղակալ Արմեն Հայրապետյանը ներկայացրել է 2014 թվականի մարտի 10-ին Երևանում ստորագրված «Հայաստանի Հանրապետության կառավարության եւ Սերբիայի Հանրապետության կառավարության միջեւ եկամուտների եւ գույքի կրկնակի հարկումը բացառելու մասին» կոնվենցիան: Ըստ հիմնական զեկուցողի՝ կոնվենցիայի նպատակն է կարգավորել եկամուտների և գույքի կրկնակի հարկումը բացառելու և հարկումից խուսափելը կանխելու հետ կապված հարաբերությունները և դրանով պայմանավորված` նվազեցնել միջազգային առևտրի և ներդրումների վրա եկամտային և գույքային հարկերի հետ կապված խոչընդոտների բացասական ազդեցությունը, ինչպես նաև ստեղծել կանխատեսելի և կայուն հարկային դաշտ: Կոնվենցիայով նաեւ սահմանվում են պայմանավորվող պետությունների ռեզիդենտ հանդիսացող անձանց` հարկման ենթակա գույքը եւ եկամուտների տեսակները:

Գլխադասային՝ ԱԺ արտաքին հարաբերությունների մշտական հանձնաժողովի դրական եզրակացությունը ներկայացրել է հանձնաժողովի նախագահ Արտակ Զաքարյանը: Ըստ նրա՝ փաստաթղթի նպատակն է երկու պետությունների համաձայնության պարագայում մի շարք ոլորտների և սուբյեկտների նկատմամբ կիրառել կրկնակի հարկումը բացառող մեխանիզմ:

ՀՀ ֆինանսների նախարարի տեղակալ Արմեն Հայրապետյանը ներկայացրել է նաև 2015 թվականի մայիսի 15-ին Բրատիսլավայում ստորագրված «Հայաստանի Հանրապետության և Սլովակիայի Հանրապետության միջեւ եկամուտների եւ գույքի կրկնակի հարկումը բացառելու եւ հարկումից խուսափելը կանխելու մասին» համաձայնագիրը: Ըստ հիմնական զեկուցողի՝ փաստաթղթի նպատակն է բացառել եկամուտների և գույքի կրկնակի հարկումը եւ այդպիսով նվազեցնել եկամտային և գույքային հարկերի հետ կապված խոչընդոտների բացասական ազդեցությունը միջազգային առևտրիև  ներդրումների վրա, ինչպես նաեւ ստեղծել կանխատեսելի և կայուն հարկային դաշտ:

Հարակից զեկուցմամբ հանդես է եկել ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը: Նա նշել է, որ համաձայնագիրը հանձնաժողովում ստացել է դրական եզրակացություն:

Այնուհետեւ պատգամավորներն առաջին ընթերցումով քննարկել են ԱԺ պատգամավոր Ռուզաննա Մուրադյանի հեղինակած «Ազգաբնակչության էկոլոգիական կրթության և դաստիարակության մասին» ՀՀ օրենքում փոփոխություններ կատարելու մասին» օրենքի նախագիծը, որում նոր ձևակերպում է տրված էկոլոգիական մշակույթին. «հայրենական եւ համաշխարհային փորձ» անորոշ հասկացությունը փոխարինվում է «արդի գիտական պատկերացումներին համապատասխանող եւ փուլային զարգացման առանձնահատկությունները հաշվի առնող» սահմանմամբ: Նախագծով էկոլոգիական մշակույթը մարդու եւ բնության ներդաշնակ փոխազդեցության զարգացման փուլ է, որը բնութագրվում է մարդկության կողմից էկոլոգիական հիմնախնդիրների առաջնահերթ լուծման գիտակցությամբ ու գիտական հիմնավորվածությամբ, ինչը նպաստում է առողջ ապրելակերպին, սոցիալ-տնտեսական կայուն զարգացմանը, երկրի եւ յուրաքանչյուր անձի էկոլոգիական անվտանգությանը: Նախագծով առաջարկվում է նաև լրացնել ոլորտի պետական քաղաքականության հիմնական սկզբունքները՝ ներառելով մարդու էկոլոգիայի եւ էթնոէկոլոգիայի մասին դրույթներ: Հեղինակը նշել է, որ օրենքի նախագծի ընդունման արդյունքում հնարավոր կլինի օրենսդրորեն առավել համապարփակ կարգավորել էկոլոգիական դաստիարակությունը եւ էկոլոգիական կրթության համար ուղենիշներ սահմանել:

ՀՀ ԱԺ փոխնախագահ Հերմինե Նաղդալյանը նշել է, որ ՀՀ կառավարությունն սկզբունքային առարկություններ չունի եւ դրական եզրակացություն է տվել նախագծի վերաբերյալ:

ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արտակ Դավթյանը նշել է, որ օրենսդրական նախաձեռնությամբ ժամանակին առավել համահունչ են շարադրվել երկու հոդվածները և մատնանշվել են պետության սկզբունքներն այս ոլորտում քաղաքականություն իրականացնելիս: Հանձնաժողովում օրենսդրական նախաձեռնությունն արժանացել է դրական եզրակացության:

ԱԺ փոխնախագահ Հերմինե Նաղդալյանը և ԱԺ պատգամավորները կարեւորել են օրենսդրական նախաձեռնության ընդունումն ու խոսել էկոլոգիական դաստիարակության հարցում դրա ունեցած ազդեցության մասին:

Քննարկվել է 2016 թվականի մարտի 23-ին Երևանում ստորագրված «Հայաստանի Հանրապետության և Քուվեյթի Պետության միջեւ քրեական գործերով փոխադարձ իրավական օգնության մասին» համաձայնագիրը: Հիմնական զեկուցող, ՀՀ արդարադատության նախարարի տեղակալ Վիգեն Քոչարյանը նշել է, որ համաձայնագրով Հայաստանը եւ Քուվեյթը պարտավորվում են իրենց ազգային օրենսդրությանը համապատասխան միմյանց տրամադրել քրեական գործերով փոխադարձ իրավական օգնություն: Փաստաթղթի շրջանակում իրավական օգնությունը ներառում է դատավարական փաստաթղթերի հանձնումը, ապացույցներ վերցնելը, անձանց եւ առարկաների գտնվելու վայրի եւ ինքնության հաստատումը, գույքի պաշտպանության համար միջոցների ձեռնարկումը, հետախուզման և առգրավման հարցումների կատարումը և այլն:

Այնուհետեւ արդարադատության նախարարի տեղակալը քննարկման է ներկայացրել նաեւ 2015 թվականի մարտի 25-ին Պեկինում ստորագրված «Հայաստանի Հանրապետության եւ Չինաստանի Ժողովրդական Հանրապետության միջեւ քրեական գործերով փոխադարձ իրավական օգնության մասին» պայմանագիրը: Վիգեն Քոչարյանը նշել է, որ փաստաթղթով կողմերը քրեական հետապնդման, քննության և դատական վարույթի շրջանակում միմյանց կտրամադրեն փոխադարձ իրավական օգնություն այնպիսի հանցագործությունների առնչությամբ, որոնց համար պատժի նշանակումն իրավական օգնություն խնդրելու ժամանակ գտնվում է հարցում ուղարկող կողմի իրավասության ներքո:

ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը փաստաթղթերի վերաբերյալ ներկայացրել է հանձնաժողովի դրական եզրակացությունը:

Վիգեն Քոչարյանը ներկայացրել է նաեւ 2013 թվականի հոկտեմբերի 2-ին ստորագրված «Մարդու իրավունքների եւ հիմնարար ազատությունների պաշտպանության մասին» կոնվենցիայի 16-րդ արձանագրությունը: Փաստաթղթի նպատակն է ընդլայնել Մարդու իրավունքների եվրոպական դատարանի իրավասությունը՝ բարձրացնելով դատարանի և ազգային իշխանությունների միջև փոխգործակցության մակարդակը:

Հարցի քննարկումը կշարունակվի հոկտեմբերի 26-ի նիստում:

Նիստի վերջին մեկ ժամը «ԱԺ կանոնակարգ» ՀՀ օրենքի համաձայն՝ տրամադրվել է պատգամավորների հայտարարություններին: