Պաշտպանության նախարար Վիգեն Սարգսյանն այցելել է ՊԲ (լուսանկարներ)

Հոկտեմբերի 21-ից 22-ը, հայկական երկու հանրապետությունների ռազմական փոխհամագործակցության, փորձի փոխանակման և գործողությունների համադրման ծրագրի շրջանակում, աշխատանքային այցով ՊԲ են այցելել ՀՀ Պաշտպանության նախարար Վիգեն Սարգսյանը, ԶՈՒ գլխավոր շտաբի պետ, գեներալ-լեյտենանտ Մովսես Հակոբյանը և ՀՀ նախագահի գլխավոր ռազմական տեսուչ՝ գեներալ-գնդապետ Միքայել Հարությունյանը:

ԼՂՀ նախագահ Բակո Սահակյանի հետ ունեցած հանդիպման ժամանակ, որին մասնակցում էր նաև ԼՂՀ ՊՆ, ՊԲ հրամանատար, գեներալ-լեյտենանտ Լևոն Մնացականյանը, քննարկվել են հայկական երկու հանրապետությունների ռազմական համագործակցությանը վերաբերող հարցերի լայն շրջանակ, նախանշվել պաշտպանական ոլորտում իրականացվելիք հետագա աշխատանքների կարևորագույն ուղղությունները: Այնուհետև Արցախի և Հայաստանի ռազմաքաղաքական ղեկավարները այցելել են Ստեփանակերտի կենտրոնական զինհոսպիտալ, ծանոթացել բուժսպասարկման պայմաններին, շփվել հոսպիտալի բուժանձնակազմի և առողջական տարբեր խնդիրներով այստեղ գտնվող զինծառայողների հետ:

Բանակի խորացված հրամանատարական կետում տեղի ունեցած խորհրդակցության ընթացքում, գեներալ-լեյտենանտ Լևոն Մնացականյանը անդրադարձել է այն հիմնական գործընթացներին, որոնք իրականացվել և շարունակում են իրականացվել Արցախի հանրապետության պաշտպանական ներուժի մեծացման ուղղությամբ, ներկայացրել այն հիմնական գործողությունները, որոնք կյանքի կկոչվեն հակառակորդի հավանական ագրեսիայի ծավալման դեպքում:

Պաշտպանական գերատեսչությունների ղեկավարները եղել են նաև առաջնագծում, ծանոթացել կատարված ինժեներական աշխատանքներին, ղեկավարման համակարգի, նորագույն տեխնիկական միջոցների ներդրման և զսպման մեխանիզմների կատարելագործման ուղղությամբ իրականացված ծավալուն գործընթացներին, շփվել դիրքապահ զինծառայողների հետ, որոնցից առավել աչքի ընկածները նաև խրախուսվել են պաշտպանության նախարարի կողմից:

Այնուհետև հյուրերը այցելել են բանակի <<Ասպարեզ>> ուսումնական կենտրոն, հետևել այստեղ իրականացվող պարապմունքների ընթացքին, որից հետո կենտրոնական ենթակայության մի շարք զորամասերում հանդիպումներ են ունեցել և, ճաշել անձնակազմի հետ, շնորհակալություն հայտնել վերջիններիս բարեխիղճ ծառայության համար և ներկայացրել այն նոր մոտեցումները, որոնք ընկած կլինեն հայկական զինված ուժերի հետագա զարգացման հիմքում:

 Աշխատանքային այցի ավարտին բարձրաստիճան հյուրերը նաև հարգանքի տուրք են մատուցել Ստեփանակերտի եղբայրական հուշահամալիրում: Ամփոփելով երկօրյա աշխատանքային այցի արդյունքերը, կարող ենք փաստել, որ դրա արդյունքում, որը ի դեպ 1-ինն էր Վիգեն Սարգսյանի և Մովսես Հակոբյանի` նոր պաշտոններում նշանակվելուց հետո, հստակեցվեցին երկու հայկական պետությունների ռազմական համագործակցության ընթացիկ և առաջիկա խնդիրները, կատարվեց փորձի փոխանակում, ճշգրտվեցին այն հիմնական անելիքները ու դրանց հերթականությունը, որոնք անհրաժեշտ է իրականացնել հակառակորդի ագրեսիվ նկրտումները սանձելու և զսպման ու հակազդման մեխանիզմները առավել արդյունավետ դարձնելու ուղղությամբ: