Ադրբեջանի ազգաբնակչությունը կորցնում է Ալիևներից, Ալիևի բռնապետությունից ազատվելու հույսը. իրանագետ (տեսանյութ)

Այսօր՝ սեպտեմբերի 30-ին, իրանագետ Արտյոմ Տոնոյանը խոսեց Ադրբեջանում սահմանադրական բարեփոխումների հանրաքվեի, սպասվելիք իրավիճակի մասին, և թե ինչպես կանդրադառնա հանրաքվեն ԼՂՀ հիմնահարցի լուծման վրա:

Անդրադառնալով այն հարցին, թե հնարավոր է, որ Ադրբեջանը հարձակում սկսի Արցախի ուղղությամբ, այս կերպ փորձելով շեղել հանրության ուշադրությունը, Արտյոմ Տոնոյանը պատասխանեց. «Սովորաբար, երբ պետությունը հայտնվում է տնտեսական ծանր իրավիճակում, լուծումներից մեկը լինում է պատերազմի հրահրումը, դա էլ, իհարկե, հավանական լուծում կարող է լինել: Այս առումով ուղղակի չի համապատասխանում ռազմական բյուջեի նվազումը, այլ՝ հակառակը, գոնե պետք է պահպանեին նախկին տարիների հատկացումների քանակը: Այս դեպքում, եթե տեսնում ենք, որ կրճատում են այդքան անգամ, ապա մի փոքր կասկածի տակ է դրվում սահմանի սրացման հավանականությունը»:

Նրա պնդմամբ՝ մենք ունենք բազմաթիվ օրինակներ նաև միջազգային փորձում, որ ծանր իրավիճակում հայտնված պետությունը, հանրության բողոքի ալիքը հաղթահարելու համար, որպես տնտեսական լուծման իրավիճակի բացատրություն, դիմում է պատերազմի, հարևանների հետ խնդրի սրացման և դա ամենահավանական լուծումներից մեկը կարող է լինել:

Իրանագետի դիտարկմամբ՝ չնայած այն հանգամանքին, որ Ադրբեջանում տիրում է բռնապետություն, այնուամենայնիվ, այնտեղ սպասվում է հանրային բողոքի ալիք:

«Ադրբեջանի ազգաբնակչությունը կորցնում է Ալիևներից, Ալիևի բռնապետությունից, Բաքվի ալիևական վարչակարգից ազատվելու հույսը: Մտցվում է մի պաշտոն, այսպես ասած փոխնախագահ կամ նախագահի տեղակալ և նաև հնարավորություն է տալիս իր որդու՝ Հեյդար կրտսերի վերընտրման համար: Այս առումով, մարդիկ, ի վերջո կորցնելու են հույսը, որ կարելի է իրավական ճանապարհով ազատվել Ալիևներից և սա խոսում է նրա մասին, որ կա տենդենց, կան պատճառներ համապատասխան քանակությամբ, որպեսզի հանրային բողոքը մեծանա»,- նշեց Արտյոմ Տոնոյանը:

Մանրամասները՝ տեսանյութում: