Մարզպետ աշխատելու համար գայթակղություն պետք չէ. Արմեն Կարապետյանը՝ Սյունիքի մարզպետի պաշտոնը զբաղեցնելու մասին (տեսանյութ)
Այսօր՝ սեպտեմբերի 27-ին, ԱԺ-ում ՀՀԿ խմբակցության պատգամավոր Արմեն Կարապետյանը լրագրողների հետ զրույցում պատասխանեց մի շարք հարցերի, ինչպես նաև անդրադառնալով Սյունիքի մարզպետ Սուրիկ Խաչատրյանի վերանշանակմանը, ասաց. «Կառավարության ղեկավարը պետք է որոշի, թե ում է նշանակելու մարզպետ: Մարզպետը՝ ինքը, հայտարարել է, որ վարչապետը պետք է որոշի, թե նա հետագայում կաշխատի՞, թե՞ ոչ»:
Այն հարցին, թե նա մարզպետ կաշխատի Սյունիքում, թե ոչ, պատգամավորը պատասխանեց, որ մարզպետ աշխատելու համար գայթակղություն պետք չէ, քանի որ վերջինիս աշխատանքը ծանր ու պատասխանատու աշխատանք է:«Հատկապես ծանր է նոր կառավարությունում, որովհետև այնպես չէ, որ պարտականությունները չկատարես և միայն օգտվես իրավունքներից: Մարզպետի աշխատանքը ցուցանիշ է, որ պետք է ապահովես, այնպես որ, ես գայթակղված չեմ և ոչ մեկին էլ խորհուրդ չեմ տա: Ճանաչելով Կարեն Կարպետյանին, պետք է նշեմ, որ նա շատ խստապահանջ է և պետք է աշխատես պատշաճ մակարդակով»,- ասաց Արմեն Կարապետյանը:
Այն հարցին, թե ստացվում է այնպես, որ, փաստորեն, Հովիկ Աբրահամյանի ժամանակ հնարավոր էր այլ կերպ աշխատել, նա պատասխանեց. «Նույն կերպ էր, պարզապես հիմա կատարվում է համակարգային փոփոխություններ, նոր ձևով պետք է մոտենանք: Տնտեսության վիճակն իսկապես ծանր է և պետք է շարքային քաղաքացին իր վրա զգա այս փոփոխությունը: Հիմա կառավարության կողմից ամեն ինչ արվում է, որ քաղաքացիներն իրենց վրա զգան այդ փոփոխությունը: Ես հակված եմ համակարգային փոփոխությանը և ոչ թե ինչ-որ անուն ազգանունների փոխվելուն»:
Անդրադառնալով մեկ այլ հարցի, թե արդյոք ինչ-որ շարժառիթ կա Սուրիկ Խաչատրյանին պաշտոնանկ անելու համար, նա նշեց. «Այստեղ խնդիրը ոչ թե այն է, որ լավ է աշխատում, թե ոչ, այլ՝ այստեղ կառավարության ձևավորման ընթացքում թիմ է ձևավորվում, որը պետք է ձևավորվի վարչապետի կողմից: Հնարավոր է, որ նրան էլ ընդգրկեն այդ թիմի մեջ և հնարավոր է՝ չընդգրկեն»:
Առավել Մանրամասն՝ տեսանյութում: