Մեր հերոսների սխրանքի, թափված արյան շնորհիվ մենք այսօր կարողանում ենք ապահովել հայ ժողովրդի խաղաղ արարումը. Սեյրան Օհանյան (տեսանյութ)
Այսօր՝ սեպտեմբերի 10-ին, ՀՊՏՊ ուսանողական խորհրդի նախաձեռնությամբ տնտեսագիտական համալսարանում բացվեց քառօրյա պատերազմում զոհված հերոսների անվան լսարան: Հայաստանի երիտասարդական հիմնադրամի հետ համատեղ ստեղծված լսարանի բացման հանդիսավոր արարողությանը մասնակցեց ՀՀ պաշտպանության նախարարի պաշտոնակատար Սեյրան Օհանյանը:
Նախարարի պաշտոնակատարն այցելեց լսարան, տեղեկացավ մանրամասներին, հանդիպեց ուսանողների հետ, և ելույթից հետո պատասխանեց ուսանողների հարցերին, որի մասին կներկայացնենք շուտով, իսկ արարողության ավարտից հետո Սեյրան Օհանյանը պատասխանեց լրագրողների հարցերին:
«Ցանկացած իրականության մեջ ձեռք ենք բերում արժեքներ և այդ արժեքները պետք է հասանելի լինեն, ոչ միայն տվյալ բուհին, այլ նաև ողջ ժողովրդին, մանավանդ՝ քառօրյա պատերազմում կամ մարտական գործողությունների ժամանակ մենք ունենք հերոսներ, որոնց արժանիքների, սխրանքի, կյանքի, թափված արյան շնորհիվ մենք այսօր կարողանում ենք ապահովել հայ ժողովրդի խաղաղ արարումը: Նման լսարանների բացվելը նշանակում է այդ արժեքները պատշաճ կերպով փոխանցել մեր ողջ ժողովրդին և հատկապես մատաղ սերնդին, ովքեր նրանց օրինակով պետք է ոգևորվեն, դաստիարակվեն, համապատասխան հետևություններ անեն, լավ սովորեն, ձեռք բերեն տարբեր հմտություններ, ինչպես նաև՝ ռազմական»,- ասաց ՀՀ պաշտպանության նախարարի պաշտոնակատար Սեյրան Օհանյանը:
Նրա խոսքով՝ սա նաև մաս է կազմում ՀՀ-ի պաշտպանական քաղաքականության, որպեսզի բոլորը տեղեկանան դրա մասին, իսկ պաշտպանական քաղաքականությունը, միայն զինվորական ծառայությունը չէ, այլ նաև
• Երկրի տնտեսությունը,
• Ազգաբնակչության հայրենասիրական դաստիարակությունը,
• Գաղափարական պատրաստության մակարդակը,
• Վերաբերվող մասով նրքին և արտաքին քաղաքականությունը,
• Կրթության և գիտության հնարավորությունների օգտագործումը ԶՈւ-երի նպատակով,
• Ամբողջացված, մոբիլիզացված բանակի կիրառումը ըստ մեր պլանների:
«Այն անձը, ով պատասխանատու է պաշտպանական քաղաքականությանը, նա պետք է ուշադիր լինի բոլոր ոլորտների հետ համագործակցությանը և վերջիններիս հավասարաչափ զարգացմաը»,- նշեց Սեյրան Օհանյանը:
Իսկ այն հարցին, թե կան արդյոք ՀՊՏՀ-ից ուսանողներ, ովքեր քառօրյա պատերազմի զոհեր են, ՀՊՏՀ ռեկտոր, տնտեսագիտության դոկտոր, պրոֆեսոր Կորյուն Աթոյանը պատասխանեց. «Ո՛չ, զոհեր չկան, բայց վիրավորներ եղել են»:
Մանրամասները՝ տեսանյութում: