Ֆրանսիայի հայերն ամենաակտիվն են Հայոց ցեղասպանության հետ կապված բոլոր իրադարձությունների ժամանակ. ֆրանսահայ Ժան-Ժակ Սարաջյան

Այսօր՝ օգոստոսի 27-ին, լրագրողների հետ հանդիպման ժամանակ Ֆրանսիայում հիմնադրված «Նոր հայեր» ամսագրի հայազգի հիմնադիր Ժան-Ժակ Սարաջյանը խոսեց Ֆրանսիայում հայերի, համագործակցության, «Կաննի» փառատոնի, ինչպես նաև ներկայացրեց մանրամասներ «Նոր հայեր» ամսագրի մասին:

Անդրադառնալով «Կաննի» փառատոնին նա նշեց, որ առաջին անգամ մասնակցել են 2010 թվականին: «Նոր հայեր» ամսագիրն երաշխավորված լրատվամիջոց է համարվում «Կաննի» փառատոնում և ներկայացնում է հենց հայերին: «Դա իմ երազանք է եղել մանկուց, որպեսզի մասնակցեմ «Կաննի» փառատոնին, նկարահանեմ, լուսաբանեմ այն և հենց այդպես էլ սկսել է իմ երազը և դարձել իրականություն: Նախորդ տարի էլ մասնակցել ենք «Կաննի» փառատոնին՝ նկարահանել և լուսաբանել»,- ասաց «Նոր հայեր» ամսագրի հայազգի հիմնադիր Ժան-Ժակ Սարաջյանը:

Նրա պնդմամբ՝ այս տարի «Նոր հայեր» միջազգային ամսագիրը որոշել է «Bonne Retrouver» (Բարեգործական կազմակերպություն է Ֆրանսիայում, որը Հայաստանի հիվանդ երեխաների համար բարեգործական միջոցառումներ է կազմակերպում և հասույթը փոխանցում Հայաստանի հիվանդ երեխաներին) կազմակերպության հետ սեպտեմբերի 20-ին՝ Ֆրանսիայի 5 քաղաքներում՝ Ռեն, Լիոն, Մարսել, Վալանս, Փարիզ, կազմակերպելու են բարեգործական միջոցառումներ և ամբողջ հասույթը հատկացնելու են Հայաստանում գտնվող առողջական խնդիր ունեցող 3 երեխայի:

Նրա խոսքով՝ Ֆրանսիայի հայերն ամենաակտիվն են միջոցառումների ժամանակ և նաև ամենաակտիվը Հայոց ցեղասպանության հետ կապված բոլոր իրադարձությունների ժամանակ:

Operativ.am-ի թղթակցի այն հարցին, թե որն է նրա Հայաստան գալու այցի հիմնական նպատակը, արդյոք այն գործնական է, նա պատասխանեց. «Առաջին հերթին ուզում եմ հայերեն սովորել: Ես սովորում եմ հայերեն ամեն օր, բայց դեռ շատ լավ չգիտեմ: Այո՛, նաև աշխատելու, համագործակցելու համար եմ եկել, որպեսզի ավելի ամրացնեմ «Նոր հայեր» ամսագիրը և տեղեկացնեմ այստեղի հայերին ամսագրի գործունեության և ֆրանսահայերի մասին»: