«Շտապօգնության» աշխատակիցները սպառնացել են գումարը չբերելու դեպքում դատի տալ հիվանդին

«Իրավունք» թերթի խմբագրություն է դիմել քաղաքացի Լարիսա Արսենյանը, ով իր եղբոր ընտանիքի հետ վարձով բնակվում է Արտաշատում՝ սոցիալապես ծանր վիճակում։ Կնոջ խոսքով հուլիսի 31-ի լույս օգոստոսի 1-ի գիշերը եղբոր առողջական վիճակը վատացել է։ Զանգահարել են «Շտապօգնություն», որն էլ ԱԻՆ-ի աշխատակիցների հետ հիվանդին տեղափոխել են Արտաշատի բժշկական կենտրոնի վերակենդանացման բաժին։ Այնտեղից էլ խորհուրդ են տվել Արսենյանին տեղափոխել Երևանի Նորք Մարաշ սրտաբանական կենտրոն, քանի որ շտապ անհրաժեշտ է ստենդավորում։

Արտաշատից Երևան բերելու համար «Շտապօգնության» բժիշկը, տիկին Լարիսայի խոսքով, պահանջել է 25.000 դրամ։ «Այդ պահին մեր ունեցածը 10.000 դրամ էր, դա ենք վճարել։ 15.000 էլ խոստացանք մեկ շաբաթվա ընթացքում տալ, սակայն այնպես եղավ, որ այդ գումարը հայթայթել չկարողացանք։ Մեկ շաբաթվա ընթացքում անընդհատ զանգում էին մեզ, ասում՝ բերեք այդ գումարը, թե չէ դատի կտանք, այլևս չենք սպասարկի ծեր հիվանդին»,- մանրամասնեց նա։

Արսեն Արսենյանը՝ Լարիսա Արսենյանի եղբայրը, ով դեռ «Նորք Մարաշ ԲԿ-ում է, 2-րդ կարգի հաշմանդամ է (ոտքն անդամահատված), «Փարոս» համակարգի շահառու։ «Հնարավորություն չունենք ստենդ դնելու, քանի որ դա մեծ գումար է։ Երկու անգամ դիմել ենք Առողջապահության նախարարություն, սակայն մերժում ենք ստացել։ Խնդրում եմ, եթե կարող են, թող օգնեն մեզ։ Եղբորս վիճակն այնպես է, որ չենք կարող նրան տուն տանել»,- օգնություն է հայցում Լարիսա Արսենյանը։

«Իրավունքը» պարզաբանում ստանալու համար նախ կապ հաստատեց Առողջապահության նախարարության մամլո խոսնակ Անահիտ Հայթայանի հետ։ Պատասխանը հետևյալն էր. «Անվճար ստենդավորում ՀՀ-ում կատարում են «Փարոս» համակարգում 36 և ավելի միավորներ ունեցողների համար։ Իսկ ձեր նշած հիվանդն ունի 30 բալ։ Բայց կարող են առողջապահության նախարարի անունով գրավոր դիմում ուղարկել։ Հանձնաժողովը կուսումնասիրի խնդիրը, ու եթե հնարավոր Է, պետությունը կաջակցի»։

Մեզ դիմած քաղաքացին, թերևս, այդ դիմումն Էլ կգրի։ Բայց մինչ այդ փորձեցինք նաև «Շտապօգնություն» ՓԲԸ-ից պարզաբանում ստանալ, թե ինչի համար են քաղաքացուց 25 հազար դրամ պահանջել։ Փոխտնօրեն Նունե Ժամկոչյանը մեզ հետ զրույցում ասաց, որ Արսեն Արսենյան ազգանունով քաղաքացու իրենք չեն տեղափոխել։ «Գուցե «Շտապօգնության» Արտաշատի մասնաճյո՞ւղն Է տարել։ Դիմեք նրանց»-հորդորեց տիկին Ժամկոչյանը։

Այդպես Էլ արեցինք։ Սակայն հստակ պատասխան չլսեցինք։ «Շտապօգնության» Արտաշատի մասնաճյուղի բաժնի վարիչ Վահե Չիբանյանը խնդրեց ներկայացնել հիվանդին տեղափոխողի անուն-ազգանունը։ «Ե՞ս եմ տարել հիվանդին։ Անուն-ազգանունով ասեք, թե ով Է տարել, որ իմանամ ինչ անել։ Կամ ասեք հիվանդին, թող մեզ հետ կապ հաստատի, որ այդ հարցն իր հետ լուծենք։ Կոնկրետ դեպքերի համար ենք գումար վերցնում, կասսա ենք մուծում»,– ասաց բաժնի վարիչը։

Այսինքն, այնուամենայնիվ, գումար վերցնելու ինչ-որ տարբերակ կա՞։ Լավ, այդ դեպքում հիվանդի հարազատները շտապօգնության գնացուցակի մասին որտե՞ղ կարող են տեղեկանալ։ Չիբանյանի խոսքով՝ բոլոր հիվանդանոցներում կա փակցված գնացուցակը։ Իսկ ինչո՞ւ «Շտապօգնությունը» կտրոն չի տվել հիվանդի հարազատին։ Մասնաճյուղի բաժնի վարիչը պատասխանեց. «Դա պետք Է ճշտել։ Տեղափոխված հիվանդների ցուցակն ինձ մոտ չէ»։

Ուրեմն՝ ի՞նչ ստացվեց. հիվանդի հարազատները, հիվանդին թողած, պետք է հարցնեին տեղափոխողի անունը ազգանունը, շնչակտուր վազեին հիվանդանոց՝ գները ճշտելու, որից հետո որոշեին՝ ի վիճակի՞ են օգտվել ծառայությունից, թե ոչ։

Եվ ահա մեր այս զրույցից ժամեր անց Վահե Չիբանյանը կրկին մեզ հետ կապվեց՝ հերքելով Լարիսա Արսենյանի տեղեկությունները։ «Մենք Լարիսա Արսենյանի եղբորը Երևան չենք տեղափոխել։ Բերել ենք Արտաշատի հիվանդանոց։ Որքանով հասկացա, Երևանից է բրիգադ եկել Արտաշատ ու հիվանդին տարել Երևան։ Եթե Երևանից մեքենա է գալիս, նրանք նախօրոք գին են ասում՝ 30-36 հազար դրամ փող են ուզում։ Հնարավոր է դա մասնավոր բրիգադ լինի, պատկանի հիվանդանոցներից մեկին»»,-գրում է թերթը։

Մանրամասները՝ «Իրավունք» թերթի այսօրվա համարում։