Միամտություն կլինի կարծել, որ Պերմյակովին կհանձնեն ՀՀ-ին. փաստաբան (տեսանյութ)
Այսօր` օգոստոսի 24-ին, լրագրողների հետ հանդիպման ժամանակ Ավետիսյանների իրավահաջորդի ներկայացուցիչ, փաստաբան Լուսինե Սահակյանը խոսեց Վալերի Պերմյակովի դատավարության ողջ ընթացքի, դատավճռի, ինչպես նաև վերջինիս ցմահ ազատազրկման մասին:
Operativ.am-ի թղթակիցը մի շարք հարցեր հղեց Ավետիսյանների իրավահաջորդի ներկայացուցիչ, փաստաբան Լուսինե Սահակյանին, մասնավորապես, թե որտեղ է կրելու իր պատիժը Վալերի Պերմյակովը, և որքանով է իրատեսական այն փաստը, որ գրում է «Kомсомольская правда» թերթը. այն է՝ Վալերի Պերմյակովն իր պատիժը կկրի ոչ թե Հայաստանի, այլ՝ Ռուսաստանի տարածքում, ինչպես նաև նշվում է, որ Պերմյակովի հանձնումը Ռուսաստանին, կարող է դժգոհությունների ալիք առաջացնել Հայաստանի բնակչության շրջանում: Արդյո՞ք սա փաստում է այն, որ նա իր պատիժը կկրի ՌԴ-ում, քանի որ այս մասին նույնիսկ մամուլն է խոսում:
Ի պատասխան Operativ.am-ի թղթակցի հարցերին, փաստաբանը պատասխանեց. «Պերմյակովն ի սկզբանե հանձնված չի եղել ՀՀ-ին: Այդ փորձը կատարվել է ինչպես նախաքննության ընթացքում, այնպես էլ՝ հետագայում, բայց հետագայում ուղղակի դատաքննության ընթացքում իրենց գործը հանձնեցին ՀՀ-ին բազմաթիվ բանակցություններից հետո և ՀՀ-ն հնարավորություն ստացավ, որպեսզի Պերմյակովին ՀՀ-ի դատարանը դատի, բայց Պերմյակովը հանձնված չի ՀՀ-ին: Այսինքն, իրավական առումով էլ հիմա, շատ միամտություն կլինի կարծել, որ երբ արդեն դատական ակտը կայացվեց, ապա Պերմյակովը հանձնվելու է ՀՀ-ին, որպեսզի պատիժը կրի ՀՀ-ում: Ես ճիշտն ասած այդ միամիտների թվին չեմ դասվում, որ, եթե նախաքննությունում, դատական քննության ընթացքում չհանձնեցին, ապա պետք է հանձնեն դատավճիռը կայացնելուց հետո: Բայց ասեմ, որ այդ հարցը կարգավորվում է երկու պետությունների համաձայնություններով և պետք է ասեմ, որ շատ դեպքեր կան, երբ անձը տվյալ երկրի քաղաքացին է, բայց դատվել է մյուս երկրում, իրավունք ունի դիմելու, որպեսզի ինքն իր պատիժը կրի իր երկրում, որի քաղաքացին ինքը հանդիսանում է»:
Մանրամասները՝ տեսանյութում: