Հրանտ Բագրատյանը՝ իր՝ օլիգարխ չդառնալու մասին

Operativ.am-ի թղթակիցը զրուցեց նախկին վարչապետ, ՀԱԿ խմբակցության պատգամավոր Հրանտ Բագրատյանի հետ:

Պրն. Բագրատյան,տեղացած կարկուտները իրենց ազդեցությունը կունենա՞ն ընդհանուր տնտեսական համակարգի վրա, թե ուղղակի որոշ գյուղատնտեսական ոլորտներ կտուժեն:

-Կարկուտն ընդհանուր առմամբ կարող է ադզել տնտեսության վրա. այն մոտավորապես 4-5% պակասեցնում է գյուղատնտեսության համախառն արտադրանքը, ինչը հավասարազոր է երկրի ՀՆԱ-ն 1%-ով պակասեցնելուն։

Այն մթերքների վրա իր ազդեցությունը գնաճի տեսքով կունենա՞:

-Մի փոքր կունենա, եթե հաշվի առնենք գյուղատնտեսության համախառն ներքին արտադրանքի 4-5%-ն է և նկատի ունենանք, որ բուսաբուծությունը գյուղատնտեսության կեսն է, ուրեմն բուսաբուծության արտադրանքի վրա այն կունենա մինչէ 10% ազդեցություն, սա նշանակում է, որ այս տարի սպասվում է միջին հաշվով 8-10% համապասխան մթերքների, որոնք տուժել են, դրանք են՝ բանջարաբոստանային կուլտուրաներն ու խաղողը, թանկացում:

Օրինակ՝ այս տարի հնարավոր է, որ խաղող մթերող ձեռնարկությունները գները բարձրացնեն մինչև 140 դրամ:

Իսկ ի՞նչ կասեք հայերիս խորհրդանիշ ծիրանի մասին. կլինի՞ թանկացում:
-Ծիրանը համեմատաբար այս տարի թանկ կլինի, որովհետև այդ գյուղերը(Արմավիրի մարզ) այլևս ծիրան չեն մատակարարի: Հնարավոր է մյուս մարզերի լավ բերքը փոխարինի Արմավիրի կորուստները։

Ինչպիսի՞ն պիտի լինի Կառավարության փոխհատուցումը:

-Ըստ Կառավարության տվյալների՝ վնասները կազմում են 60-70 միլիոն $:
Կառավարությունը պարտավոր է փոխհատուցել վնասի առնվազն 30-35 միլիոնը $, իսկ մնացած մասը՝ գյուղացիները պետք է հույս ունենան արտոնյալ ֆինանսական օգնության վարկերի կամ սուբսիդավորման տեսքով:

Շատերը՝ հատկապես ընդդիմության ներկայացուցիչները նշում են, որ գազը թանկացել է մինչ ընտրությունները, պարզապես չի բարձրաձայնվել այդ մասին, կա՞ն համապասխան փաստեր, գազն իսկապե՞ս մինչ ընտրություններն է թանկացել:

-Կան փաստեր, ավելի ճիշտ փաստ, որը ամիսներ շարունակ Հայաստանի մաքսային ծառայությունը մաքսազերծում էր գազը 240$-ով և մեզ չէին ասում՝ գազը թանկացել է, թե ոչ:

Նախկին վարչապետի համար դժվար չէ՞ պատգամավորի կարգավիճակով հանդես գալը և փորձել ինչ-որ բան հասկացնել պաշտոնով իրենից բարձր, սակայն տնտեսական կարողություններով իրեն զիջող պաշտոնյաներին:

-Չեմ ուզում ինչ-որ պիտակավորումներ անել. ես պատգամավոր եմ, իսկ պատգամավորը պաշտոն չէ, նա ժողովրդի ընտրյալն է, ես իմ խնդիրն եմ տեսնում, որ այն ընտրազանգվածը, որն իմ հետևում կանգնած է և 30-40.000 մարդը, որոնք ինձ ձայն են տվել, ես միշտ նրանց եմ հիշում և պարտավորված եմ նրանց առաջ:

Պրն. Բագրատյան, նայելով ներկայիս տնտեսագետ և «տնտեսագետ» օլիգարխներին, կեսկատակ-կեսլուրջ ուզում եմ հարցնել, ինչը Ձեզ խանգարեց օլիգարխ դառնալ, չէ՞ որ տնտեսական կարողություններով ոչ մեկ Ձեզնից առավել չէ, եթե ոչ առավելագույնն եք:

-Օլիգարխ դառնալու համար պետք է մոնոպոլիա ունենաս և հենց սկզբից որոշակի առումով ներգրավված լինես անարդար բիզնեսի մեջ. անարդար, բնականաբար հարկային առումով ի նկատի ունեմ:

Որովհետև եթե արդար և մրցակցային պայմաններում լինես, ապա կարող ես դառնալ բիզնեսմեն, բայց ոչ երբեք օլիգարխ, օլիգարխը նշանակում է արդեն իսկ օգտագործել իշխանությունների հետ կապը՝ ի նպաստ սեփական բիզնեսի:

Նախ ես այդ մարդը չեմ և երկրորդ՝ երբ պարզապես ինտելեկտ ունես և կարող ես ստեղծագործել, դա նույնն է, երբ սիմֆոնիկ նվագախմբի առաջին ջութակահարին խնդրես, որ ոչ թե ջութակ նվագի, այլ՝ տաքսի քշի:

Սրանով ես չեմ ուզում նվաստացնել օլիգարխների բիզնեսը, բայց երբ դու ստեղծագործական աշխատանքի մեջ ես, ապա դա քեզ համար ավելի հետաքրքիր է:
Վերջին հաշվով ես բիզնեսում նույնպես կայացած մարդ եմ. ութը տարի աշխատել եմ կոնյակի գործարանում, ղեկավարել եմ այն, և գործարանը, որը մի քանի միլիոն վնաս ուներ, դարձավ մինչև 30 միլիոն դոլարի շահույթ բերող գործարան: Այո, դա նաև իմ աշխատանքի շնորհիվ է եղել:

Օլիգարխ չեմ դարձել, որովհետև այս կյանքում ավելի հետաքրքիր բաներ կան, և հետո իմ բնավորության մեջ չէ մերվել պետության հետ և փորձել օգտագործել այդ կապերը՝ ի շահ բիզնեսի:

Եթե նորից ծնվեիք կրկին տնտեսագետ կլինեի՞ք՝ հաշվի առնելով Ձեր ճանապարհի բոլոր դժվարությունները:

-Այո, կամ տնտեսագետ կլինեի կամ էլ բլյուզ կնվագեի, կա նաև երրորդ մասնագիտությունը, որը ինձ միշտ հետաքրքրել է. մաթեմատիկան. աշխարհի ամենառոմանտիկ ու պոետիկ մասնագիտությունը:

Զրուցեց Սեդա Ղուկասյանը