Բժիշկը քաղաքական գործիչ չէ, որ նրան պատանդ վերցնեն, դա այլանդակություն է. պրոֆեսոր Անդրանիկ Ոսկանյան (տեսանյութ)
Այսօր` հուլիսի 29-ին, լրագրողների հետ հանդիպման ժամանակ ՀՀ գլխավոր թոքաբան, Հանրապետական անձավաբուժական կենտրոնի տնօրեն, բ.գ.թ., պրոֆեսոր Անդրանիկ Ոսկանյանը խոսեց ՊՊԾ գնդում բուժաշխատողների պատանդառության ու բժշկական հանրության արձագանքի մասին:
Անդրանիկ Ոսկանյանի խոսքով՝ ՊՊԾ գնդում բուժաշխատողների պատանդառությունը ոչ թե միջազգայի նորմի խախտում է, այլ՝ այլանդակություն: «Դա ոչ մի նորմայի մեջ չի տեղավորվում և բժիշկը քաղաքական գործիչ չէ, որ նրան պատանդ վերցնեն: Նա գնացել է իրենց օգնություն ցուցաբերելու, սակայն բռնել են և չեն թողնում»,- ասաց ՀՀ գլխավոր թոքաբան, Հանրապետական անձավաբուժական կենտրոնի տնօրեն, բ.գ.թ., պրոֆեսոր Անդրանիկ Ոսկանյանը:
Անդրանիկ Ոսկանյանը նշեց, որ ինքը բժիշկ է, և ոչ քաղաքագետ ու դիվանագետ, այդ պատճառով, չի կարող ոչ մի կերպ բավարարել քաղաքական հետաքրքրությունները, սակայն որպես բժիշկ, նա ասաց. «Հասարակարգը, պետությունը՝ օրգանիզմ է և այդ օրգանիզմում տեղի է ունենում նյութափոխանակում՝ պրոցես, որը նորմալ երևույթ է: Նորմալ երևույթ է նաև այն, երբ այդ օրգանիզմում առաջանում է այս կամ այն հիվանդագին երևույթը, սակայն այն, ինչ տեղի է ունեցել՝ ես կկոչեի ալերգիա (ալ-երգիա, ալյ գործողություն): Այսինքն՝ ինչ-որ բանի դեմ եղել է ոչ նորմալ գործողություն և կարող եմ ասել, որ դա անպայման բարի վերջ կունենա, որովհետև ալերգիան երկար չի կարող տևել, քանի որ այն հիվանդություն չէ: Ես համոզված եմ, որ ո՛չ զենք վերցնողներն են հիվանդ, ո՛չ էլ նրանք, ովքեր ուզում են հանդարտացնել հիվանդին»:
Նա կրկնեց, որ ալերգիան հիվանդություն չէ և հավելեց, որ այն հունական բառակապակցությունն է՝ (ալոս-հերգոն, այլ գործողություն ): «Առաջանում է այն դեպքում, երբ կա գրգռիչ, կա պատճառ և պետք է հեռացնել այդ գրգռիչները, որոնք պատճառ են հանդիասցել ալերգիայի, իսկ պատճառները կարող են գործոն լինել՝ արտաքին աշխարհից (էկզոգեն) և ներսի (էնդոգեն): Այս դեպքում պետք է աշխատել չեզոքացնել գրգռիչները և հակազդել հակաալերգիկ դեղորայքներով»,- ասաց բժիշկը:
Անդրադառնալով պատանդներին, նա պնդեց, որ օրինակ՝ եթե այստեղ՝ այս պահին, որևէ մեկը սրտի կաթված ունենա, ապա նա չի կարող օգնություն ցուցաբերել, քանի որ իր մոտ չունի համապատասխան միջոցներ, որոնք պետք են օգնություն ցուցաբերելու համար:
«Բժշկական օգնություն կարելի է ցուցաբերել միայն բժշկական հաստատությունում, և եթե այդ տղաների մեջ կան վիրավորներ, ապա նրանց պետք է տեղափոխել հիվանդանոց՝ համապատասխան բաժանմունք և բուժել»,-ասաց ՀՀ գլխավոր թոքաբան, Հանրապետական անձավաբուժական կենտրոնի տնօրեն, բ.գ.թ., պրոֆեսոր Անդրանիկ Ոսկանյանը և կոչ արեց «Սասնա ծռեր» զինված խմբի տղաներին՝ բժիշկներին բաց թողնել և բժշկական օգնության դիմել ճիշտ ճանապարհով: