Այսօր ՀՀ վաստակավոր բժիշկ Սառա Եսայանի ծննդյան 70-ամյակն է

Այսօր ՀՀ վաստակավոր բժիշկ, բարերար Սառա Մանթաշի Եսայանի 70-ամյակն է: Նրա անվան ու վաստակի մասին խոսվել, խոսվում ու դեռ կխոսվի, քանի որ այն, ինչ արել է Սառա Եսայանն իր երջանկահիշատակ ամուսնու՝ ՀՀ վաստակավոր բժիշկ Կառլեն Լազարի Եսայանի հետ միասին, անմոռանալի և անուրանալի է: Հիրավի, լավագույն մասնագետներն իրենց կոչմանը, կոլեգաների ու հասարակության հարգանքին արժանանում են անցնելով երկար ու դժվարին ճանապարհ: Սառա Եսայանը նրանցից մեկն է, ով ունի հարուստ կենսագրություն, որը միայն հպարտություն ու խորհին հարգանք է առաջացնում: 

Սառա Եսայանը 1964թ-ին ընդունվել է ԵրԲԻ-ի բուժական ֆակուլտետ, որն ավարտել է 1970թ-ին: Աշխատել է թիվ 1 և թիվ 2 կլինիկական հիվանդանոցներում: 1973թ-ն աշխատել է թիվ 14 պոլիկլինիկայում, իսկ 2006թ-ից` «Սուրբ Գրիգոր Լուսավորիչ» ԲԿ-ում՝ որպես բժիշկ-ռևմատոլոգ: Միաժամանակ տիրապետում է արևելյան բուժման (չինական և կորեական) մասնագիտություններին: 

1978-1984թթ. մասնակցել է Մոսկվայում և Վիլնյուսում կայացած ռևմատոլոգների Միջազգային համագումարներին՝ որպես պատգամավոր: Պարգևատրվել է խորհրդային շրջանի բուժական աշխատողների պատվոգրով: Հանդիսանում է Խորհրդային միության առողջապահության գերազանցիկ, բարձր կարգի մասնագետ է:

2010թ-ին Հայաստանի Հանրապետության նախագահի կողմից արժանացել է ՀՀ Վաստակավոր բժիշկի պատվավոր կոչմանը: Նույն թվականին պարգևատրվել է Հայաստանի Երկրապահ կամավորականների միության պատվոգրով:

2010թ-ից հանդիսանում է Եվրոպայի ակադեմիայի բնական գիտությունների իսկական անդամ: 2011թ-ին Հայաստանի Երկրապահ կամավորականների միության կողմից պարգևատրվել է «Քաջարի մարտիկ» հուշամեդալով:

2015թ-ի դեկտեմբերին ԼՂՀ Նախագահ Բակո Սահակյանի հրամանագրով Սառա Եսայանը պարգևատրվել է «Վաչագան Բարեպաշտ» մեդալով:

Նշենք, որ Սառա Եսայանը նաև Հայաստանի Ստոմատոլոգների և ռևմատոլոգների ասոցիացիաների անդամ է:

Սառա Եսայանը հայտնի է ոչ միայն որպես վաստակավոր բժիշկ և լավ մասնագետ, այլ նաև որպես բարերար: Վերջինիս կատարած բարեգործությունների ցանկը ևս հարուստ է: Իր ամուսնու՝ ՀՀ վաստակավոր բժիշկ Կառլեն Եսայանի հետ միասին, տարիներ շարունակ բազմաթիվ բարեգործություններ են իրականացրել Հայաստանում և Արցախում: 

Մասնավորապես՝ 

-Մարտակերտի շրջանի Մեծ Շեն գյուղում կառուցվել է Հայրենական պատերազմում և Ղարաբաղյան պատերազմում զոհված ազատամարտիկների, հերոսների հուշահամալիրը:

-2004-2011թթ. ընթացքում գյուղում ծնված յուրաքանչյուր երեխայի համար Եսայանները կատարել են 1000 դոլար նվիրաբերում:

-Մարտակերտի ազատագրման կապակցությամբ տեղադրել են Հաղթական արծվի արձանը:

-Մեծ Շենում Եսայանների ընտանիքի աջակցությամբ կառուցվել է Սբ. Գևորգ եկեղեցին` շրջապատված խաչքարերի պուրակով:

-Կառուցվել և 2011թ. ավարտվել է Մեծ Շենի գյուղապետարանը, հարակից պուրակը` արձանախմբերով (Ֆիդայու, Պըլը Պուղու և արմատները խորհրդանշող «Պապիկ-տատիկի և թոռան» արձանը, Հայաստան-Արցախ միասնության խորհրդանիշ հանդիսացող Բռունցքի արձանը): Կառուցվել է գյուղի մանկապարտեզը, խաղահրապարակը, գյուղի հանդիսությունների սրահը, վերակառուցվել է դպրոցը` հարակից խաղահրապարակներով, լողավազանով, մարզադաշտով, և որպես երախտագիտության նշան` դպրոցն անվանակոչվել է Կառլեն Եսայանի անունով:

-Եսայան ամուսինների կողմից կառուցվել և Մեծ Շենի համայնքին են նվիրաբերվել մակարոնեղենի և քարի արտադրության արտադրամասեր:

- Կառլեն և Սառա Եսայանների հովանավորությամբ Մարտակերտի շրջկենտրոնում տեղադրվել են հրամանատարներ Սասուն Հակոբյանին և Վլադիմիր Բալայանին նվիրված հուշարձան-պանթեոնները:

-Եսայանների հովանավորությամբ Արագածոտնի մարզում՝ Տառ-քարերի մոտ, տեղադրվել են Խաչատուր Աբովյանի, Մովսես Խորենացու, Վռամշապուհ թագավորի, Մեսրոպ Մաշտոցի և Գրիգոր Լուսավորչի արձանները:

-2013թ. Կառլեն և Սառա Եսայանների աջակցությամբ Երևանում՝ Անդրանիկ Մարգարյանի անունը կրող դպրոցի բակում, տեղադրվել է ՀՀ նախկին վարչապետի բրոնզաձույլ կիսանդրին:

-Կառլեն և Սառա Եսայաններն առաջին նվիրատուներն են, ովքեր զգալի ավանդ են ներդրել հայ մեծանուն գրող Հրանտ Մաթևոսյանի՝ Երևանում կառուցվող տուն-թանգարանի հիմնադրամին:

-2014թ. կառուցվել է Մարտակերտի շրջկենտրոնի հյուրանոցը:

- Երևանում կառուցվել է Ֆ. Նանսենի թանգարանի շենքը, որտեղ տեղադրվել է նաև Նանսենի հսկա արձանը: Կողքին կառուցվել է Սբ. Աստվածածին եկեղեցին` իր երիցատնով, սրբաքանդակ արձաններով, Գրիգոր Լուսավորչի, Հայոց Մեծ Եղեռնի 100-ամյակին նվիրված հուշարձան-կոթողը, զոհված ազատամարտիկների հիշատակին նվիրված խաչքարը, 1988թ. ավերիչ երկրաշարժի անմեղ զոհերի հիշատակին նվիրված խաչքարը, Վարդան Մամիկոնյանի արձանը, Արցախը խորհրդանշող «Պապիկ-տատիկի» արձանը, Մեսրոպ Մաշտոցի և Հակոբ Մեղապարտի, Առաջին տպագիր Գրքի, Լրագրողի բրոնզե արձանը, որը խորհրդանշում է անվախ, անկաշառ ու հայրենիքին նվիրյալի կերպարը և մարմնավորում ազատ խոսքի կրողների իրական պատմությունը` սկսած 1980թթ.-ի հայտնի իրադարձություններից, հայ ազգի բարեկամ Ջորջ Գորդոն Բայրոնի արձանը և բազում այլ խաչքարեր:

-2014 թվականին Երևան քաղաքի Նոր Նորքի 5-րդ զանգվածի Սուրբ Սարգիս եղեկեցում Կառլեն և Սառա Եսայանների կողմից տեղադրվել է խաչքար:

-2015 թվականին Սուրբ Զորավոր եկեղեցու բակում տեղադրվել է աղբյուր-խաչքար հուշարձանը` նվիրված Հայոց ցեղասպանության 100-ամյակին:

-2015 թվականին Երկրապահ կամավորականների միության կենտրոնական գրասենյակի մատուռի դիմաց տեղադրվել է թևավոր խաչքար:

-2015 թվականին Սուրբ Հովհաննես եկեղեցու կենտրոնական մուտքի ձախ և աջ կողմերում տեղադրվել են Ջուղայի զույգ խաչքարերի կրկնօրինակները:

- Երևան քաղաքի Կենտրոն վարչական շրջանում գտնվող Սուրբ Սարգիս եկեղեցու բակում տեղադրվել է խաչքար:

- 2015 թվականին Կառլեն և Սառա Եսայանների աջակցությամբ լույս է տեսել Արկադի Ասրյանի «Հայաստանի հերոսներ» գիրքը, որում ներկայացված են հայ ժողովրդի այն հերոսները, որոնք գործել են մարտական և աշխատանքային սխրանքներ ու աշխարհի շատ երկրներում դարձել են հերոսության հավերժական օրինակ:

-2016 թվականի մայիսի 31-ին, ՀՀ Փաստաբանների պալատի պատին ամրացվեց Վաղ միջնադարի Վարդապետ Մխիթար Գոշի դիմաքանդակը: Այն պալատին նվիրաբերել է ՀՀ վաստակավոր բժիշկներ, բարերարներ Կառլեն և Սառա Եսայանների ընտանիքը:

-Կառլեն և Սառա Եսայանների անունից Արցախի Մեծ Շեն գյուղում կառուցվում է մշակույթի տուն և երիցատուն` իրենց իսկ կառուցած եկեղեցու մշտական գործունեությունն ապահովելու նպատակով: Աշխատանքները կավարտվեն 2016 թվականին: Նշենք, որ Սառա Եսայանի ամուսինը՝ Կառլեն Եսայանը, Արցախի Մեծ Շեն գյուղից է, որտեղի դպրոցում էլ վերջինս սովորել է, և այն այժմ, շնորհիվ նրա՝ բարեկարգ վիճակում է գտնվում և որտեղ հաճախում են նաև հարևան գյուղերի երեխաները: Մեծ Շենը նախկինում 5 եկեղեցի է ունեցել, սակայն դրանցից ոչ մեկ խորհրդային տարիներին չի պահպանվել: 70 տարուց ավելի գյուղի հավատացյալների ցանկությունը թեկուզ մի փոքրիկ աղոթատեղի ունենալն էր: Եսայանների շնորհիվ գյուղացիների ցանկությունն իրականություն դարձավ: Սուրբ Գևորգ եկեղեցին կառուցվեց հնի տեղում` եկեղեցու հարևանությամբ էլ խաչքարերի պուրակ ստեղծվեց:  Առաջխաղացումը գյուղի բարեգործների` ՀՀ վաստակավոր բժիշկներ Կառլեն և Սառա Եսայանների շնորհիվ է: Վաստակավոր բժիշկը հայրենի գյուղից վաղուց էր հեռացել, սակայն կապը չէր կտրել, կյանքի ընթացքում այստեղ հաճախ էր լինում, բարեգործական բազմաթիվ ծրագրեր իրականացնում: Արցախցիները Մեծ Շենը համեմատում են «մինի Շվեյցարիայի» հետ:

Նշենք նաև, որ Սառա Եսայանը դիմել էր  Երևանի քաղաքապետ Տարոն Մարգարյանին և ավագանուն, որպեսզի Եսայանների ընտանիքին թույլատրվի նվազագույնը 110 մլն ՀՀ դրամի ներդրում կատարել` նախկին 8-րդ բուժմիավորում ՓԲԸ-ի պոլիկլինիկայում, որը 2003-2004 թվականներին անվանափոխվել և կրում էր «Դավիթ Անհաղթ» բժշկական կենտրոն անունը, որտեղ նրա ամուսինն աշխատել է որպես տնօրենի փորձագիտական գծով տեղակալ, իսկ 2004-2014 թվականներին եղել է «Դավիթ Անհաղթ» ԲԿ-ի ԲՓՀ-ի նախագահը: Այն ներկայումս կրում է ՀՀ վաստակավոր բժիշկ Կառլեն Եսայանի անունը և նրա տիկինը մտադիր է ամբողջությամբ վերանորոգել պոլիկլինիկան, որի համար ընդամենը մեկ խնդրանք է հղել քաղաքային իշխանությանը. այն է` բուժհաստատությունը երբեք չմասնավորեցվի և այն պահպանվի որպես պոլիկլինիկա: 

Ներկայումս ընթացքի մեջ են մի շարք բարեգործական ծրագրեր՝ Հայաստանում և Արցախում, որոնք ավարտին կհասցվեն 2016 թվականին:

Ահա այսպիսի կենսագրություն ունի Սառա Եսայան անուն ազգանունը կրող ՀՀ վաստակավոր բժիշկը, ում համար բժիշկ լինելը վեհ կոչում է, իսկ բարեգործություն կատարելը՝ նպատակ: Նպատակ, որը պտտվում է մեկ վեհ գաղափարի շուրջ՝ հայրենիք:

Operativ.am-ը շնորհավորում է ՀՀ վաստակավոր բժիշկ Սառա Եսայանին՝ 70-ամյակի կապակցությամբ: