Կազանի այս փաստաթուղթը շատ վտանգավոր թակարդներ է պարունակում իր մեջ. Հրանուշ Խառատյան (տեսանյութ և լուսանկարներ)

Այսօր՝ հուլիսի 1-ին, լրագրողների հետ հանդիպման ժամանակ ազգագրագետ Հրանուշ Խառատյանը, բնապահպան Կարինե Դանիելյանը և «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը խոսեցին ԼՂ-ի հիմնախնդրի, փոխզիջումների, Գերմանիայի արտգործնախարար, ԵԱՀԿ գործող նախագահ Ֆրանկ-Վալտեր Շտայնմայերի տարածաշրջանային այցի մասին:

Հրանուշ Խառատյանի խոսքով՝ Կազանի այս փաստաթուղթը շատ վտանգավոր թակարդներ է պարունակում իր մեջ և լինելով թվացյալ շարունակությունը մինչ այդ բոլոր քննարկումներում հիշվող «փուլային» տարբերակի, այնուամենայնիվ, այն բոլոր նոր բանաձևերը կամ ձևակերպումները դրվել է շրջանառության մեջ:

«Ես ընդհանուր առմամբ չասեմ, որ այն շատ մերժելի է, բայց կուզենայի ուղղակի առանձին ձևակերպել այն, ինչը հենց ուզում ենք ձեզ հետ քննարկել դրանցից բխող հնարավոր վտանգները»,- ասաց ազգագրագետ Հրանուշ Խառատյանը և անրադառնալով փաստաթղթի հենց առաջին կետին հավելեց,- «Փաստաթուղթը սկսվում է տարածքների վերադարձից և փաստաթղթի ձևակերպման մեջ բոլոր տարածքները, որոնք գտնվում են հայկական վերահսկողության տակ, վերադարձվում են Ադրբեջանի վերահսկողությանը»:

Նրա պնդմամբ՝ տարածքների վերադարձման կետերը շարունակվում են, որտեղ ըստ փաստաթղթի՝ առաջին փուլում, նշվում է 5 (Աղդամի, Ֆիզուլու, Ջեբրայիլի, Զանգելանի և Ղուբաթլուի) շրջանների վերադարձի մասին: Հետագայում Քելբաջարի շրջանն ու Լաչինի շրջանի ոչ միջանցքային հատվածները:

Առավել մանրամասն՝ տեսանյութում:

Կից լուսանկարներում կարող եք ծանոթանալ Կազանի փաստաթղթի կետերի և ստորև բերված մեկնաբանությունների հետ, որոնք արվել են ազգագրագետ Հրանուշ Խառատյանի, բնապահպան Կարինե Դանիելյանի և «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանի կողմից: