Իտալիայում կայացած վոկալի միջազգային մրցույթից Հայաստանը 5 ոսկե մեդալով է վերադարձել (լուսանկարներ)

Հունիսի 14-15-ն Իտալիայի պատմական «Մարուչինո» օպերային թատրոնում տեղի է ունեցել «Chorus Inside Summer 2016» երգչախմբերի և մեներգիչների վոկալի միջազգային մրցույթ, որին մասնակցել են նաև հայ երգիչ-երգչուհիներ:

«Chorus Inside Summer 2016»-ի տարբեր անվանակարգերում Հայաստանը ներկայացրել են Վլադիմիր Բարխոյանը, Մարինե Գրիգորյանը, Սիրանույշ Խաչատրյանը, Գայանե Սահակյանը և Ռուզաննա Գրիգորյանը: Վլադիմիր Բարխոյանը մասնակցել է «Ջազ-էստրադա» անվանակարգում և արժանացել ոսկե մեդալի և գավաթի: Մեներգչուհիները ներկայացել են «Դասական վոկալ» անվանակարգում և արժանացել ոսկե մեդալի: Նրանց նվագակցող  Ռուզաննա Գրիգորյանը ևս ոսկե մեդալակիր է դարձել: Այս մասին Operativ.am-ի թղթակցին հայտնեց «Կատարողական արվեստի համաշխարհային ասոցիացիայի նախագահ Արման Ղուկասյանը:

Մրցութին մասնակցել են 70-ից ավելի մեներգիչներ: Տարբեր անվանակարգերում 20-ից ավելի երգչախմբեր՝ Ֆրանսիայից, Իտալիայից, Ռուսաստանից, Ուկրաինայից և այլն:

Մրցույթը Վլադիմիր Բարխոյանի համար առաջինն է, սակայն երգիչն այն պատվով է հաղթահարել:

Operativ.am-ի թղթակցի հետ զրույցում երգիչն ասաց, որ երգերի ընտրության հարցում շատ է տատանվել, սակայն լավ գիտակցելով իր կարողությունները, ի վերջո, ընտրել է Ալեսանդրո Սաֆինայի «Luna Tu» և Առնո Բաբաջանյանի «Твои следы» երգերը: 

«3 ամսվա ընթացքում նոր գործիքավորումներ արվեցին և ես մեկնեցի Իտալիա՝ երաժշտության երկիր, որտեղ երազում է երգել ցանկացած երգիչ»,-ասաց Վլադիմիր Բարխոյանը:

Մրցույթը ոգևորել է երգչին: Վլադիմիր Բարխոյանը մտադիր է Հայաստանի անունը դեռ շատ բեմերում պատվով հնչեցնել:

«Chorus Inside Summer 2016»-ում ժյուրիի կազմում է եղել նաև հայազգի Սար Սարգսյանը, ով բազմաթիվ միջազգային մրցույթների դափնեկիր է: Մեր թղթակիցը խոսել է նաև նրա հետ իմանալու համար,  թե ինչ կարծիք է ունեցել ժյուրին Հայաստանը ներկայացնող մասնակիցների մասին:

«Մեր բոլոր մասնակիցները հրաշալի ելույթ ունեցան: Նրանք բոլորը շատ լավ էին պատրաստվել և ժյուրին գնահատեց ըստ արժանվույն»,-ասաց Սար Սարգսյանը:

Operativ.am-ը շնորհավորում է Հայաստանը ներկայացրած մեր երգիչ -երգչուհիներին և մաղթում նոր հաղթանակներ: