«Երրորդմասցի Լյովիկ»-ի և ընկերների սպանության գործով անցնող վկա է սպանվել

«Հայկական ժամանակ»-ը գրում է. «Էրեբունի և Նուբարաշեն վարչական շրջանների ընդհանուր իրավասության դատարանում դատավոր Արտուշ Գաբրիելյանի նախագահությամբ երեկ հերթական անգամ հետաձգվեց Երրորդմասցի Լյովիկի և նրա երկու ընկերների սպանության գործով դատական նիստը։

Գործով ամբաստանյալների պաշտպան Լուսինե Սահակյանը դատարանին հայտնեց, որ մամուլում հրապարակումներ են եղել այն մասին, որ Հրաչյա Ֆալանջյանը սպանվել է ավազակային հարձակման ժամանակ։ Նա նշեց, որ ամենայն հավանականությամբ, խոսքն այս գործով վկայի մասին է, քանի որ անունը, ազգանունն ու հայրանունը համընկնում են։ Դատավորը հաստատեց, որ վկաներից Ֆալանջյանը մահացել է: Վերջինս, ոչ ավելի, ոչ պակաս, օրեր առաջ մայրաքաղաքում իր իսկ կատարած ավազակային հարձակման ժամանակ է սպանվել։

Մասնավորապես այս գործով վկա, նախկին ոստիկան Հրաչյա Ֆալանջյանը նույն անձն է, որը մայիսի 13-ին Շենգավիթ վարչական շրջանի Դոդոխյան վաղոցի 24-րդ տան վրա մեկ այլ անձի հետ ավազակային հարձակում էին կատարել, ատրճանակի ու դանակի սպառնալիքներով հարձակվել էին այդ պահին տանը գտնվող 5 անձանց վրա և վարձել գումար հափշտակել։ Սակայն տան բնակիչները դիմադրություն էին ցույց տվել և վնասազերծել տուն մուտք գործած անձանց, որոնցից մեկը Ֆալանջյանը, ոստիկանության աշխատակից էր։ Նա մայիսի 3-ին ազատվել էր աշխատանքից և գտնվում էր կադրերի ռեզերվում։

Այս դեպքով ավազակային հարձակում կատարած մյուս անձը, ինչպես նաև ընտանիքի անդամներից 3-ը դեպքից հետո ստացած մարմնական վնասվածքներով տեղափոխվել են հիվանդանոց։ Մեր տեղեկություններով, Հրաչյա Ֆալանջյանը տեսագրություններ է դիտել, որոնցով հնարավոր չի եղել նույնացնել պատկերված անձանց (այսինքն Գաստիկին, Ծգըլին և Տլեին), բայց ինքը հայտնել է, որ ճանաչում է նրանց։

Ուստի, նա սույն սպանության գործով ներգրավվել է որպես վկա։ Նախաքննության ընթացքում նրա տված ցուցմունքն ըստ ամենայնի կհրապարակվի այն դեպքում, երբ դատարանը ստանա նրա մահվան վկայականը։

Ինչ վերաբերում է արդեն մի քանի դատական նիստերի չներկայացած վկաներին, ապա մեղադրող դատախազները պնդեցին իրենց նախկին միջնորդությունը վկաներին բերման ենթարկելու վերաբերյալ, սակայն պաշտպանական կողմը պաշտպան Լուսինե Սահակյանը, առարկեց միջնորդության դեմ նշելով, որ անընդունելի է այս վալում նրանց բերման ենթարկել։ «Ինձ համար շատ ցավալի կլինի, որ վկաները, անկախ նրանից, թե ինչ վկայություն են տալիս, գտնվում են Ղարաբաղում, որ բերման ենթարկելու որոշում կայացվի».- ասաց նա։ Լուսինե Սահակյանը կարծիք հայտնեց, որ կարելի է ծանուցել այլ վկաների և միայն վկաների հարցաքննության ավարտին բերման որոշում կայացնել այն վկաների նկատմամբ, ովքեր ծանուցվում են. բայց չեն ներկայանում»,-գրում է թերթը։

Մանրամասները՝ «Հայկական ժամանակ»թերթի այսօրվա համարում։