Օբաման Սպիտակ տանը ընդունելության ժամանակ ծաղրել է Թրամփին
ԱՄՆ-ի նախագահ Բարաք Օբաման Սպիտակ տանը լրագրողների ամենամյա ընդունելության ժամանակ սարկազմով է մեկնաբանել ԱՄՆ-ի նախագահի թեկնածու Դոնալդ Թրամփի խոսքերը և վարքը նախընտրական քարոզարշավում: Այս մասին հաղորդում է «РИА Новости»-ն:
«Ես մի փոքր վիրավորված եմ, որ նա այսօր այստեղ չէ: Մենք այնքան ուրախացանք նախորդ անգամ: Ընդհանրապես, շատ զարմանալի է: Այստեղ թղթակիցների մի ամբողջ լսարան է հավաքվել, իսկ նա հրաժարվեց գալ: Միթե այս ընթրիքն այդքան էժանագին է Թրամփի համար: Ինչ է անում նա ընթրիքին գալու փոխարեն: Հնարավոր է, նա տանը ուտում է թրամփ-սթեյք և Թվիթերում վիրավորանքներ է գրում Անգելա Մերկելի հասցեին»,- ծաղրել է ԱՄՆ-ի նախագահը:
Օբաման չի կարողացել չանդրադառնալ նաև նրան, որ հանրապետականները չեն պաշտպանում իրենց թեկնածուին: «Հանրապետականների էլիտան գտնում է, որ Թրամփը ամենաանհավանական թեկնածուն է: Նրանք ասում են, որ Դոնալդը չունի միջազգային քաղաքականության փորձ, բայց, հանուն արդարության պետք է նշենք, որ նա տարիներ է անցկացրել` հանդիպելով ամբողջ աշխարհի առաջնորդների` «Միսս Շվեդիա»-ի, «Միսս Արգենտինա»-ի, «Միսս Ադրբեջան»-ի հետ»,-նշել է Օբաման` ակնարկելով, որ ավելի վաղ Թրամփն էր իրականացնում «Միսս Տիեզերք» մրցույթը: