Հակառակորդի գնդակից զոհված Արսեն Կարապետյանի մեդալը հանձնվեց նրա մորը (լուսանկարներ)
ՊԲ օպերատիվ տվյալների համաձայն, մարտի 2-ին և լույս 3-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել էր շուրջ 200 անգամ, որի ընթացքում, տարբեր տրամաչափի հրաձգային զինատեսակներից, ինչպես նաև 60 մմ ականանետերից ու ՌՊԳ-7 տիպի նռնականետերից հայ դիրքապահների ուղղությամբ արձակվել էր ավելի քան 3000 կրակոց:
Նշված խախտումների արդյունքում, ՊԲ արևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից մահացու հրազենային վիրավորում էր ստացել զինծառայող, 1995թ. ծնված Արսեն Աբրեստի Կարապետյանը: Հակառակորդի գնդակից զոհված ժամկետային զինծառայող Արսեն Կարապետյանի սպանության դեպքի առթիվ հարուցվել էր քրեական գործ:
Մարտի 3-ին, ԼՂՀ նախագահ Բակո Սահակյանի հրամանագրով ԼՂՀ պետական սահմանը պաշտպանելիս ցուցաբերած արիության համար ԼՂՀ պաշտպանության բանակի N զորամասի շարքային Արսեն Կարապետյանը հետմահու պարգևատրվեց «Մարտական ծառայություն» մեդալով։
Այսօր՝ հոկտեմբերի 8-ին, Երևանի Սիամանթոյի անվան թիվ 162 հիմնական դպրոցում, որտեղ սովորել էր Արսեն Կարապետյանը, մեդալը հանձնվեց նրա մորը: Մեդալի հանձնման արարողության ժամանակ ելույթով հանդես եկավ նաև դպրոցի տնօրեն Աննա Ստեփանյանը: Ներկա էին նաև դպրոցի աշակերտները, ովքեր չէին կարողանում զսպել իրենց արցունքները: Սակայն, նրանցից յուրաքանչյուրի համար մեծ հպարտություն է սովորել այն դպրոցում, որտեղ սովորել է հայրենիքի պաշտպանը՝ Արսենը: Նշենք նաև, որ դպրոցի Փառքի սրահում՝ Արցախյան ազատամարտի հերոսների նկարների կողքին, արդեն տեղադրվել է Արսենի նկարը: