Ազատության հարթակում ելույթից հետո հետապնդվում է ԼՂՀ ընդդիմադիր պատգամավորը. փակվում են աշխատատեղեր

Operativ.am-ի թղթակիցը զրուցեց ԼՂՀ ԱԺ ընդդիմադիր պատգամավոր Վահան Բադասյանի հետ, պարզաբանումներ ստանալու այն տեղեկությունների վերաբերյալ, թե նա ենթարկվում է հետապնդումների Երևանի Ազատության հրապարակում ԼՂՀ ընդդիմության անունից ՀՀ ընդդիմությանը ողջունելու համար:

-Պարո՛ն Բադասյան, լրատվամիջոցներում լուր է պտտվում այն մասին, որ Դուք ենթարկվում եք հետապնդումների, որովհետև ԼՂՀ ընդդիմության անունից ողջունել եք ՀՀ ընդդիմությանը Ազատության հրապարակում:

-Այո, ես Ղարաբաղում պատերազմի ժամանակ որպես նախկին հրամանատար, որպես այսօր Ղարաբաղի ԱԺ-ի պատգամավոր, խորհրդարանում որպես ընդդիմադիր պատգամավոր, ես իմ պարտքն եմ համարում լինել ժողովրդի կողքին և իմ ելույթն եմ ունեցել, դրանով իմ վերաբերմունքն եմ ցույց տվել: Եվ դրան իսկապես հաջորդեց ճնշումները, թե՛ հարկային դաշտում, թե՛ քաղաքական դաշտում հանդիպեցի լուրջ ճնշումների: Մի այնպիսի իրավիճակ է այսօր ստեղծված մեր երկրում, Արցախում և Հայաստանում, որ ժողովրդի դժգոհությունն օբյեկտիվ է: Տնտեսության վիճակը իսկապես վատ է, և փաստորեն այդ վատը ասելը ստացվում է  «հանցագործություն», բայց դա այդպես չպետք է լինի:

-Դուք բացի քաղաքական հետապնդումից, հետապնդվում եք նաև հարկայի՞ն կառույցի կողմից:

-Իշխանությունները փոխանակ երկխոսության ձեռք մեկնեն, հարցնեն ի՞նչ է պատճառը, որ այս է վիճակը, ո՞րն է ելքը: Իշխանությունները տեսնում են իրենց տեսանկյունից, այդ տեսանկյունից ղեկավարում են և դա բերում է այս վիճակին: Հիմա ճիշտ ասելը թշնամաբար են ընդունում: Իսկ իմ տնտեսական գործունեությունը սկսել եմ զրոյից, այսօր 25 հոգի աշխատում են այդ արտադրամասում, 10 հոգուց ավելի մեխանիզատորներ կան աշխատող: Մի քանի ընտանիքներ ենք ապրում այդ գործունեությամբ, հիմա ուզում են այդ ընտանիքների հացը կտրել, դա էլ կբերի լրացուցիչ տնտեսական լարվածության:

-Բայց չէ՞ որ Դուք պայմանագիր ունեք կնքած 2013թ. հունվարի 1-ին՝ մեկ տարի բանակին հաց մատակարարելու վերաբերյալ: 

-Այդ ճնշումները չեմ կարծում, թե իշխանությունների կողմից է, ես անձամբ հավատում եմ Սեյրան Օհանյանին` որպես իմ մարտական ընկերոջ, որովհետև մենք կողք-կողքի, ձեռք-ձեռքի տված կռվել ենք, մենք մարտական ընկերներ ենք, չեմ կարծում, որ ինքը կգնա այդ քայլին: Ինձ զգուշացրել են ստորին մարմիններից, արդեն հայտարարել են պայմանագիրը շուտով կխզվի, որովհետև ո՞ւմ էր պետք այդ ելույթը: Համենայնդեպս Սեյրան Օհանյանին կարող են ներկայացնել այնպիսի գույներ, որ հացը բերեն որակական դաշտ, բայց իմ երեսը պարզ է, որովհետև զինվորն ուտում է որակյալ հաց:

-Պարո՛ն Բադասյան, Ձեր խոսքից հետևություն անելով, Դուք ոչ թե պետական կառույցների կողմից եք ենթարկվում հետապնդման, այլ անհատների կողմից: Ավելի հստակ կասեք` ո՞վ է հետապնդում:

- Հարկայինը: Բայց հացն ու ալյուրն այն բնագավառն է, որ իշխանությունները ներքին կարգով խնդրում են, որ գինը զսպվի: Երբեմն ինքնարժեքից ցածր գնով հաց ենք տալիս: Ես նախարարի խնդրանքով վիզ եմ առել այդ գործը հաց մատակարարելու, բայց այսօր, որ վարկերի հաշվին, զրոյից սկսած հիմնարկը, որ ուզում են փակել, ճիշտ չէ: Այս ամեն խոսակցությունը գնում է բարձրագույն իշխանության վրա, բայց անձնական նախաձեռնողներ են:

-Իսկ որևէ ղեկավար մարմնի կողմից Դուք հետապնդման չե՞ք ենթարկվում, այն որ ասել եք, թե Ղարաբաղում ևս հաղթել է պաշտոնական Երևանի կամակատարը, սա կարո՞ղ է հետապնդումների հիմքը հանդիսանալ:

-Ես կարծում եմ, որ դա է, այո, հենց դա է հիմքը: Ոչ թե գտնում եմ, այլ տեսնում եմ, որ առայժմ անհանդուրժողականությունն իշխանության բարձրագույն մարմինների միջին օղակից է գալիս, իբրև անձնական նախաձեռնություն:

-Իսկ որ Ձեր խոսքը վերաբերում էր ԼՂՀ նախագահին, կամակատար ասելով նրան ի նկատի ունեիք, այդ կառույցից որևէ՞ հետապնդման ենթարկվել եք:

-Ո՛չ, այդ կառույցից որևէ հետապնդում չի եղել, որևէ երկխոսություն չի եղել, բայց ես սպասում էի, որ երկխոսություն կլիներ, շատ լավ կլիներ, որ երկխոսություն լիներ: Իմ ասածը քաղաքական հայտարարություն է, սակայն քաղաքական դաշտը Ղարաբաղում այն աստիճանի է հասել, որ կուսակցությունները վերածվել են մի բևեռի: Մյուս կուսակցությունները պետք ինձ հրավիրեին կլոր սեղանի շուրջ՝ այս հարցը քննարկելու համար: Բայց ոմանք հետզհետե լսելով իմ ելույթը, մոտեցան ինձ և ասացին, որ ճիշտ եմ ասել:

-Իսկ հետապնդումները վերաբերում են միայն Ձեր ձեռնարկություններին և տնտեսական գործունեությանը , թե՞ նաև պատգամավորական մանդատին:

-Ո՛չ, միայն տնտեսական գործունեությանը: Միգուցե դա չլիներ, մանդատին անդրադառնային, բայց դե, եթե տնտեսական գործունեությունը կա մարդուն սևացնելու, խանգարելու կամ ճնշելու համար:

-Իսկ Ազատության հարթակում ելույթ ունենալը նշանակո՞ւմ էր, որ Դուք գաղափարակից եք Րաֆֆի Հովհաննիսյանի հետ, թե՞ երկրում փոփոխություններ եք ցանկանում:

-Ոչ, ես կողմնակից եմ երկրում արմատական փոփոխությունների, այնպիսի փոփոխությունների, որ երկիրը կբերի լավ վիճակի: Դա լինի Րաֆֆի Հովհաննիսյանը, դա լինի Սերժ Սարգսյանը, թե Բակո Սահակյանը, ով ուզում է լինի, ես պատրաստ եմ աջակցելու:

-Պարո՛ն Բադասյան, հիմա Ձեզ հետապնդողների քայլերից, կարելի՞ է ասել, որ Ձեր անցած մարտական ճանապարհը նրանց կողմից անտեսվում է Ձեր մեկ ելույթով:

-Չէ, ես չեմ կարծում թե այդ մեկ ելույթով անտեսում են, ես չեմ կարծում չեն կարող են անտեսել: Դա արվել է և դա փաստ է:

Զրուցեց Բ. Արաբյանը