Քրիստոնեության շնորհիվ պետք է պահպանվի հայի տեսակը

Ճգնաժամի հաղթահարում, կամ եկեղեցին ամրապնդում է դիրքերը:Պետության կայացման, քաղաքացու ճշգրիտ ու գիտակցված դաստիարակության, աշխարհընկալման հարցում էական դերն ու ազդեցությունը պատկանում է եկեղեցուն: Հայ պետականության և հայի տեսակի պահպանման շատ ֆունկցիաներ դարեր շարունակ պատկանել են հոգևորականությանը և եկեղեցուն: Հավանաբար այդ ամենով է պայմանավորված, որ ՀՀ Սահմանադրության մեջ, ինչպես և առաջարկվող փոփոխություններում, առանձնակի տեղ է հատկացվում և օրենքով ամրագրվում եկեղեցու և պետության դերը:

Սահմանադրության մեջ նշվում է, որ ՀՀ-ն ճանաչում է Հայաստանյայց առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:

Շատ կարևոր և առաջնային է եկեղեցու դերի` հոգևոր արժեհամակարգի կարևորումն ու ամրագրումը երկրի գլխավոր փաստաթղթում, քանի որ այն հանդիսանում է քաղաքացու և հասարակության առողջ ինքնակայացման կարևոր դրույթներից մեկը:
Ժամանակի ընթացքում, կախված հասարակության ոչ կայացած և սոցիալապես անապահով լինելու հանգամանքով, Հայաստանում սկսեցին եկեղեցուց զատ սերտաճել տարբեր տիպի արհեստածին աղանդներ: ՀՀ-ում գործում է 50-ից ավելի աղանդավորական կազմակերպություն: Դրանց, այսպես կոչված, «կարմիր թելը» գրեթե նույնն է՝ «փրկել մարդկությանը մոտալուտ չարիքից», «նախապատրաստել նրանց վերերկրային կյանքին և տիրոջ գալստյանը», «ահեղ դատաստանին», «մատուցել» բարձրյալի «ճշտմարիտ ուղին» և նմանատիպ, առաջին հայացքից խորիմաստ ու տպավորիչ թվացող տարբեր բառակույտեր։
Դրանք զուտ բառախաղեր են, որոնց միջոցով հոգեորսները փորձում են որքան հնարավոր է շատ և շուտ հայ հասարակության մեջ գրավել հեգեմոն դիրք։

ՀՀ Սահմանադրության մեջ հստակ ամրագրված է, որ չպետք է ոտնահարվեն մարդու իրավունքները՝ այդ թվում խղճի և կրոնական պատկանելիության իրավունքը, սակայն դա չի նշանակում, որ պետական կրոնն ու հոգևոր արժեհամակարգը պետք է դնել բաց աճուրդի և ամեն մի էժան արարած իրեն «համարի հովվապետ», իսկ մի քանի մոլորյալի` իրեն հետևորդ:

Հայոց եկեղեցին երկրի հոգևոր կյանքում պետք է ունենա միակ հեգեմոն և մենաշնորհ դիրքը, հենց եկեղեցին պետք է ուղղորդի և աջակցի բոլոր այն խոցելի խմբերին, որոնց տիրում են աղանդները: Քրիստոնեության շնորհիվ էլ պետք է պահպանվի հայի տեսակն ու արմատախիլ արվեն այդ մոլախոտերը։

Արմեն Հովսեփյան. ֆեյսբուք: