Ի՞նչ է հայտնաբերել փորձագետն Արայիկ Պետրոսյանի դեմքին ու մեքենայի մեջ, և որտե՞ղ է մյուս եղբայրը՝ Արտակ Պետրոսյանը

Operativ.am-ի թղթակիցն Արայիկ Պետրոսյանի կալանավորման հետ կապված զրուցեց Պռոշյանի գյուղապետ Հրաչ Մուրադյանի գործով Արտակ և Արայիկ Պետրոսյանների փաստաբան Գիվի Հովհաննիսյանի հետ:

-Պարո'ն Հովհաննիսյան, Արայիկ Պետրոսյանին կալանավորել են, երկու եղբայրներից ինչո՞ւ հենց նրան:

-Փորձագետի եզրակացություն կա, միայն այդ պատճառաբանությամբ: Արայիկ Պետրոսյանի մեքենայի մեջ և դեմքին հայտնաբերվել է անտիմոն, որը կրակոցի արգասիք է, և' բնության մեջ կա, և' կենցաղում՝ ըստ փորձագետի եզրակացության: Հիմա ինչ պարտադիր է, որ կրակել է: Անտիմոնն օգտագործվում է նույնիսկ կոսմետիկայի մեջ, մարտկոցների մեջ: Հնարավոր է, որ Արայիկ Պետրոսյանը կենցաղում նման իրերի հետ շփում ունեցել է: Միայն դա վերցրել, մեղադրանք են առաջադրել և կալանավորել, սակայն այլ ապացույց, տեղեկություն չկա, թե ինքն ինչ կապ ունի սպանության հետ:

- Արայիկ Պետրոսյանին մեղադրանք է առաջադրվել նաև 235 հոդվածի 1-ին մասով, այսինքն, որ ապօրինի զենք է կրել: Զենքով, որով կրակել էին Հրաչ Մուրադյանի վրա, այդ զենքն Արայիկ Մուրադյանի մո՞տ է հայտնաբերվել, թե՞ 235 հոդվածի 1-ին մասով մեղադրանք է առաջադրվել հիմնվելով փորձագետի առաջարկած փաստերի վրա:

-Զենք չկա, զենք չի հայտնաբերվել, որևէ զենք չկա, միայն անտիմոն է հայտնաբերվել է: Հիմա մարդն իր ցուցմունքում էլ է նշում, որ իր մեքենայի մարտկոցը չի աշխատել, դրա համար էլ ընկերոջ մեքենայով է գնացել: Մարտկոցը հանել է, դրել լիցքավորման նորից դրել մեքենայի մեջ: Հնարավոր է այդ քսուկներից էլ է, որ հայտնաբերվել է անտիմոն, կամ մարտկոցը դրել է մեքենայի սրահում, ոչ մի բան չի բացառվում, ինչից վերցրեցին, որ ինքը կրակել է, որևէ ցուցմունք չկա, որևէ ականատես չկա, որ նրան տեսած լինի դեպքի վայրում, ոչինչ չկա: Դատարանի աբսուրդ ցանկությունն է, քննիչի ցանկությունն է, դատարանն էլ մեկը մյուսի ցանկություններով գնում են: Հիմնավոր կասկածներ ընդհանրապես չկան, որ Արայիկ Պետրոսյանը հանցագործություն է կատարել:

-Իսկ սպիտակ «Նիվա» ունենալը կասկածի աղբյուր հանդիսացե՞լ է ոստիկանության համար, չէ՞ որ դեպքի վայրում մարդիկ սպիտակ «Նիվա» էին նկատել:

-Դե հիմա սպիտակ «Նիվա» ես էլ ունեմ, հիմա ես էլ եմ ապագա կասկածյալների շարքում կամ ներկայիս:

-Ի՞նչ է սպասվում Արտակ Պետրոսյանին:

-Արտակ Պետրոսյանին երեկ ուշ երեկոյան բաց են թողել: Մեղադրանք չեն առաջադրել, բայց նրան էլ էին կասկածում սպանության մեջ օժանդակություն ունենալու համար, իսկ եղբորը` որպես սպանություն կատարող: Արայիկ Պետրոսյանին էլ սկզբից մեղադրանք առաջադրեցին սպանության, իբր սպանվողի ծառայության հետ կապված, այսինքն` Արայիկ Պետրոսյանն իբր սպանել է Հրաչ Պետրոսյանին ոչ թե որպես անձի, այլ որպես գյուղապետի: Մի բան, որը ևս հիմնավորում չունի:

Զրուցեց Բ. Արաբյանը