ԵԽԽՎ հայաստանյան պատվիրակությանը հաջողվեց հաջողություն արձանագրել

Այսօր հունիսի 30-ին, Ազգային ժողովում տեղի ունեցավ ԵԽԽՎ հայաստանյան պատվիրակության անդամների ասուլիսը։ ԵԽԽՎ հայաստանյան պատվիրակությունը, ի հակադրություն նախորդ անգամներին, այս անգամ լրագրողներին էր ներկայացել մեծ ոգևորությամբ՝ Հերմինե Նաղդալյանի գլխավորությամբ: 

ԵԽԽՎ հունիսյան նստաշրջանում հայկական պատվիրակությանը հաջողվեց ուղղել նախորդ բացթողումը, ինչը, ըստ նրանց, հետևանք էր ադրբեջանական հզոր լոբբինգի և նրա, որ Ադրբեջանը մեծ ճնշում ունի Վեհաժողովի վրա և իր հզոր ազդեցության տակ է պահում Եվրոպայի խորհուրդը։ 

Պատվիրակության ղեկավար Հերմինե Նաղդալյանն ասաց, որ նստաշրջանն իրենց պատվիրակության համար պատասխանատու էր և ծանրաբեռնված։ Պատվիրակությունը այս անգամ ներկայացված էր յոթհոգանոց կազմով։

«Պատվիրակությունը շատ լուրջ աշխատանք ուներ կատարելու, ես կասեի՝ մարտահրավեր, որովհետև գլխավոր խնդիրը Ադրբեջանի ժողովրդավարական հաստատությունների վերաբերյալ զեկույցն էր, որ դրված էր լիագումար նիստի օրակարգում, և այդ զեկույցը, առաջին հերթին, գերնպատակ ուներ՝ ոչ թե անդրադառնալ Ադրբեջանի ժողովրդավարական հաստատություններին և իրական իրավիճակին, այլ այդ զեկույցում զետեղել «Հայատսանի կողմից Լեռնային Ղարաբաղի և յոթ հարակից շրջանների օկուպացիայի» վերաբերյալ նախադասությունը: Դրա համար արդբեջանական, թուրքական և հարակից պատվիրակությունները հսկայական աշխատանք էին կատարել՝ ներդնելով իրենց ֆինանսական և դիվանագիտական բոլոր լծակները: Ի վերջո ադրբեջանիցները անգամ դա չթաքցրեցին, որովհետև Ադրբեջանի պատվիրակության ղեկավարը, երբ տեսավ, որ ամբողջությամբ կորցնում է այդ կետերը, դիմեց Վեհաժողովին՝ խնդրելով, որ ինչ ուզում են, կարող են ասել և գրել, միայն թե այդ նախադասությունը, որ իմաստն է այդ զեկույցի, պահպանվի»,-ասաց Հերմինե Նաղդալյանը։

Այնուհետև Նաղդալյանն անդրադարձավ իր գործընկերների կողմից կաատարված աշխատանքին՝ դրանք բարձր գնահատելով։ Պատվիրակության ՀՀԿ-ական ղեկավարը հատկապես առանձնահատուկ գնահատանքով նշեց իր ընդդիմադիր գործընկերների՝ ՀԱԿ անդամ Լևոն Զուրաբյանի, ԲՀԿ-ից Նաիրա Զոհրաբյանի և ՀՅԴ-ից Արմեն Ռուստամյանի կատարած աշխատանքը, ովքեր անդամակցում են տարբեր խմբերի։ Բացի այդ՝ Նաղդալյանը այս հաջողության գրավականը համարեց նաև սփյուռքի, ԱԳՆ-ի դեսպանությունների և պատվիրակության անդամների եռամիասնությունը այս հարցում, քանզի առաջին անգամ նրանք կարողացան միասնաբար և արդյունավետ աշխատել։

«Ես ուզում եմ ընդգծել՝ մեկ առ մեկ դժվարին աշխատանք է եղել Նաիրա Զոհրաբյանի աշխատանքը, քանզի ես, ինքը և Վահան Բաբայանը անդամակցում ենք Եվրոպայի պահպանողականների քաղաքական խմբին, որը բարդագույն խումբ է, որտեղ մենք համարյա բնական դաշնակից չունենք։ Լիբերալ-դեմոկրատների խումբը, որ Հայաստանի նկատմամբ հաճախ հանդես է գալիս քննախույզ, ոչ նպաստավոր հարցադրումներով, և այս խմբում հսկայական աշխատանք կատարեց Լևոն Զուրաբյանը։ Ուզում եմ առանձնահատուկ նշել նաև Սոցիալիստների խմբի աշխատանքը, քանզի նրանք մեծագույն հենարան դարձան մեզ համար։ Այստեղ մեծ շխատանք տարավ Արմեն Ռուստամյանը, և նրանք մեզ տվեցին 26 ձայն: Մեծ աշխատանքներ են տարել նաև Մհեր Շահգելդյանը և Արփինե Հովհաննիսյանը, որոնք մեզ համար ձայներ բերեցին Ժողովրդական կուսակցությունների խմբից»,-ասաց Հերմինե Նաղդալյանը:

Այս ասուլիսներին սովորաբար չմասնակցող ԲՀԿ խմբակցության ղեկավար Նաիրա Զոհրաբյանն էլ ասաց, որ ինքն այս անգամ որոշել է մասնակցել՝ հատուկ մի քանի շեշտադրումներ անելու։ Ըստ նրա՝ ԵԽԽՎ-ն դարձել է Միլի մեջլիսի դուստր ձեռնարկությունը, քանզի Ադրբեջանը պատանդ է պահում Եվրոպայի խորհուրդը, իսկ Ադրբեջանի նախագահն էլ մատ է թափ տալիս Վեհաժողովի վրա։