Շատ ավելի դժվար է գնալ, մեկ այլ տեղամասում աշխատել, նորամուծություններ կատարել. Արթուր Օսիկյան

«Ժողովուրդ» թերթը գրում է. ««Ժողովուրդի» հետ զրույցում, անդրադառնալով այն տեղեկություններին, որ ՀՀ ԱՆ քրեակատարողական հիմնարկների վարչությունում իրեն խորթ են համարում, վարչության պետ Արթուր Օսիկյանն ասաց, որ դժվար է գնալ, մեկ այլ տեղամասում նորամուծություններ կատարել եւ խուսափել որոշակի հակազդեցությունից, սակայն ինքը վստահ քայլերով առաջ է գնում:

-Պարո՛ն Օսիկյան, արդեն 9 ամիս է, ինչ ՀՀ արդարադատության նախարարության քրեակատարողական վարչության պետի պաշտոնում եք: Այս ամիսների ընթացքում պարբերաբար տեղեկություններ են տարածվում այն մասին, որ Ձեզ համակարգում խորթ են համարում: Մասնավորապես, նշվում է, որ Ձեր և ՔԿՎ պետի տեղակալ Ռաֆայել Հովհաննիսյանի հարաբերությունները լարված են, և ՔԿՀ վարչության աշխատակիցները խմբվել են Ռ. Հովհաննիսյանի շուրջ` ամեն ինչ անելով Ձեր պաշտոնավարումը, այսպես ասած, «հարամելու» համար:

-Իհարկե, դա իրականությանը չի համապատասխանում, ծառայությունում բացի Ռաֆայել Հովհաննիսյանից՝ կան ավելի հին աշխատակիցներ: Իմ աշխատելու պարագայում ոչ միայն այս ծառայությունում, այլև ցանկացած ուրիշ տեղամասերում բացառում եմ, որ որևէ մեկը ընդդիմանա, և հետագայում սահմանված կարգով իր աշխատանքային հարաբերությունները չճշտվեն: ՔԿՀ ծառայությունում, որը առանձնահատուկ ծառայություն է, գոյություն ունի ղեկավարման ուղղահայաց համակարգ, և այս պարագայում հրամանները պետք է պարտադիր լինեն բոլորի համար: Իհարկե, խորթ ասվածը հարաբերական է, որևէ մեկը որևէ համակարգում չի ծնվում, ծնունդ չի առնում և ինչ-որ ժամանակ հայտնվում մեկ այլ ծառայությունում: Եթե մարդը պետական ծառայող է, զինվորական է, պետք է ենթադրի, որ ժամանակ առ ժամանակ պետք է լինեն փոփոխություններ: Իհարկե, շատ ավելի դժվար է գնալ, մեկ այլ տեղամասում աշխատել, նորամուծություններ կատարել, և բնական է` կլինեն ընդդիմախոսներ, կլինեն մարդիկ, որ չեն ցանկանա հարմարվել այդ ամենին, բայց մենք վստահ քայլերով առաջ ենք գնալու և դեռևս շատ անելիքներ ունենք:

-Փորձը ցույց է տվել, որ գրեթե միշտ այս կամ այն ոլորտում նոր նշանակված պաշտոնյան սկսում է ոլորտը կարգավորող լուծումներ առաջ քաշել, սակայն որոշ ժամանակ անց պարզվում է, որ ոչինչ չի փոխվել: Մասնավորապես, ՔԿՀ-ներում շարունակում են բարձրաձայնել անորակ սննդի, խցերի գերծանրաբեռնվածության մասին: Օրինակ` ՄԻՊ 2014թ զեկույցի համաձայն` «Կոշ» ՔԿՀ-ում ճաշը պատրաստվել էր մոտ 470 անձի համար, սակայն համաձայն պահեստից սննդամթերքի դուրս գրման փաստաթղթերի` սննդամթերքը տրամադրվել էր 739 անձի հաշվարկով: Կամ, ըստ նույն զեկույցի, «Արթիկ» ՔԿՀ-ում կալանավորների 30 տոկոսն է օգտվում սնունդից: Դուք միգուցե կասեք, որ այդ ամենը Ձեր պաշտոնավարման ընթացքում չի արձանագրվել, որ դա եղել է Հայկ Հարությունյանի գործունեության շրջանում, սակայն հիմա կարող եք քայլեր իրականացնել՝ իրավիճակը կարգավորելու համար: Կոնկրետ փաստերով կարող եք ասել, թե Ձեր պաշտոնավարման ընթացքում ի՞նչ եք արել՝ այս խնդիրները լուծելու համար:

-Իմ նշանակումից ի վեր տվյալ ուղղությունները մշտապես եղել են իմ ուշադրության ներքո, եւ բոլոր կետերով կարող եմ ներկայացնել մեր կատարած աշխատանքները: Մասնավորապես գերհագեցվածության խնդրի մասով` նախորդ տարի բացվեց նոր ՔԿՀ, և այժմ շուրջ 200 դատապարտյալ իրենց պատիժը կրում են այնտեղ, ու այդ առումով որոշակի թեթեւացում ունենք: Բացի դրանից՝ մեր առջեւ խնդիր դրեցինք, և 10 օր առաջ նոր հրաման ստորագրվեց, որի հիման վրա «Արմավիր» ՔԿՀ-ում կալանավորված անձանց պահելու վայր նախատեսեցինք: Երբ որոշումը ուժի մեջ մտնի, իսկ դա կլինի առաջիկա 10 օրերի ընթացքում, երեք մարզերում տեղակայված դատարանների և քննչականի կողմից տարբեր խափանման միջոցների պարագայում տվյալ անձինք կտեղափոխվեն ոչ թե «Նուբարաշեն» ՔԿՀ, այլ «Արմավիր» ՔԿՀ: Սրա արդյունքում էլ «Նուբարաշեն» ՔԿՀ-ում լրակազմերի առումով մենք կունենանք որոշակի թեթևացում: Սնունդի որակի բարձրացման համար իմ կողմից ստորագրվել է համապատասխան հանձնարարական բոլոր ՔԿՀ-ներին: Համապատասխան պաշտոնատար անձինք պատասխանատուներ են նշանակել սննդի որակի հետ կապված: Կարող եմ ասել՝ սննդի որակը ամեն օր ստուգվում է: Իմ կողմից այդ հետևողականությունը շարունակվելու է: Որևէ պաշտոնատար անձ չի ներվելու, եթե խախտումներ թույլ տա:

-Բայց այս օրերին գրեթե բոլոր ՔԿՀ-ների հանձնուքի բաժիններում հերթեր են գոյանում, մարդիկ իրենց հարազատներին սնունդ են հասցնում, որ սովից չմեռնեն:

-Կարող եմ հավաստիացնել, որ քրեակատարողական հիմնարկում դատապարտյալների թվին ուղիղ համեմատական է կազմվում սնունդը, և որևէ տեղ նման խախտում չկա: Ցանկացած նման խախտման համար մարդիկ ենթարկվում են պատասխանատվության: Իմ կողմից ծառայողական քննություններ են նշանակվել, և մի քանի դեպքով մարդիկ կան, որ ազատվել են պաշտոնից կամ կարգապահական տույժեր են ստացել: Ցավալի է, բայց հակառակ խնդիրն ունենք, երբ ճաշը պատրաստվում է, սակայն չեն օգտվում, և այն թափվում է: Սրա հետ կապված մենք համապատասխան նախաձեռնություն ցուցաբերել ենք…»:

Առավել մանրամասն՝ «Ժողովուրդ» թերթի այսօրվա համարում: