Ռուբեն Հակոբյանը՝ Զարուհի Փոստանջյան-Սեյրան Սարոյան վիճաբանության վերաբերյալ

ԱԺ մայիսի 21-ի ճեպազրույցների ժամին ելույթ ունեցավ ԱԺ Ժառանգություն խմբակցության պատգամավոր Ռուբեն Հակոբյանը: «Իմ կարծիքով` այս քառօրյայի ընթացքում արհեստական լարվածություն ստեղծվեց էլեկտրաէներգաիյի սակագնի բարձրացման վերաբերյալ, պատճառն այն էր, որ մեր նախագահողները շատ հաճախ չեն տիրապետում ԱԺ կանոնակարգին: Կհորդորեմ մեր նախագահողներին տիրապետել ԱԺ կանոնակարգին, դա շատ կարևոր է Ազգային ժողովի աշխատանքները բնականոն կերպով կազմակերպելու համար: Յուրաքանչյուր պատգամավոր իրավունք ունի առաջարկություններ ներկայացնելու և չի կարելի խոսափողներն անջատելու միջոցով լռեցնել պատգամավորին»,- ասաց Ռուբեն Հակոբյանը:

Խոսելով ԵՄ-Հայաստան հարաբերություններից` Ռուբեն Հակոբյանը նշեց, որ այս պահին Հայաստանը պետք է մանևրի. «Հայաստանը ԵՏՄ-ի անդամ է, բայց պետք է քայլեր ձեռնարկի ԵՄ-ի հետ ակտիվ հարաբերություններ ունենալու համար: Այդ մանևրելու քաղաքականությունը ես ընդունում եմ»,- նկատեց պատգամավորը և նկատեց, որ ամբողջովին ԵՄ-ին տրվելը սխալ է:

Հարցին, թե երեկ ՀՀ գլխավոր դատախազ Գևորգ Կոստանյանը պատասխանեց Սուրիկ Խաչատրյանի և նրան ընտանիքի հետ կապված հանցավոր դեպքերին վերաբերող հարցերին, հետաքրքիր է` նրա պատասխանները համոզի՞չ էին Ձեզ համար, Հակոբյանը նկատեց. «Եթե կայացած ժողովրդավարական պետություն լինենք, ապա հարցը կլուծվեր իրավական հարթության մեջ, բայց մենք գիտենք, որ այսօր դատական համակարգը անկախ չէ: Դատախազը մի անգամ ասեց, որ օրենքի առաջ բոլորը հավասար են, ցավոք, այս պահի դրությամբ այդպես չէ, և եթե իսկապես էլ օրենքի առաջ բոլորը հավասար լինեին, ապա մնացած բոլոր վարկածները  չէին լինի»:

Լրագրողի հարցին՝ թե մի քանի օր առաջ ՀՀԿ-ական Սեյրան Սարոյանը ԱԺ միջանցքում վիրավորական արտահայտություններ հնչեցրեց Ձեր խմբակցության անդամ Զարուհի Փոստանջյանի հասցեին, չե՞ք պատրաստվում դիմել ԱԺ էթիկայի հանձնաժողով, պատգամավորը պատասխանեց. «Ես միշտ ասել եմ, որ մենք շատ դժվարությամբ ենք կառուցում պառլամենտական պահվածք: Կարծում եմ` պետք է լսումներ կազմակերպվեն, և փողոցային բառապաշարով չմտնեն պառլամենտ, լինի դա ընդդմիադիր, թե իշխանամենտ, պետք է հասկանա, որ այդ բառապաշարով չպետք է մտնեն պառլամենտ: Ես հիմա չեմ կարող ասել, որ մենք մեր երիտասարդությանը կարողանում ենք դաստիարակել պառլամենտական մշակույթով»,- ասաց Ռուբեն Հակոբյանը: