Սահմանն անցած զինծառայողին ընտանիքի հետ տեղեկությունների փոխանակման հնարավորություն է ընձեռվել. ԿԽՄԿ
Ինչպես հայտնել էինք, մարտի 22-ին՝ ժամը 13:50-ի սահմաններում, ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն է անցել ՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը:
Կարմիր խաչի միջազգային կոմիտեի Բաքվի գրասենյակի ներկայացուցիչները մարտի 30-ին այցելել են ադրբեջանական կողմն անցած պայմանագրային զինծառայող Անդրանիկ Գրիգորյանին: Այս մասին Operativ.am-ի թղթակցին հայտնեց ԿԽՄԿ Երևանի գրասենյակի հաղորդակցման ծրագրերի ղեկավար Զառա Ամատունին:
«Ընտանեկան բնույթի երկկողմանի տեղեկությունների փոխանակման հնարավորություն է ընձեռվել, այլ մանրամասներ չենք կարող փոխանցել»,-ասաց Ամատունին:
Այն հարցին, թե ինչպես կարելի է մեկնաբանել երեկվա տարածված լուսանկարը, որտեղ Անդրանիկը լայն ժպիտով կանգնած է ադրբեջանցի պաշտոնյաների հետ, Զառա Ամատունին պատասխանեց, որ այդ ամենը մեկնաբանելու իրավասություն չունի:
Նրա խոսքով՝ համաձայն իրենց հանձնառության, իրենք կշարունակեն այցելություններն ու կապի պահպանումն ընտանիքի և Անդրանիկի միջև, ինչպես նաև իշխանության համապատասխան ներկայացուցիչների հետ:
«Գործի ընթացքը կախված է ընթացիկ երկխոսություններից և Անդրանիկ Գրիգորյանի կողմնորոշումից»,-նշեց Զառա Ամատունին: