Որքանո՞վ էր ծանր ու թեթև Տիգրան Ուրիխանյանի «կորուստը» ԲՀԿ-ում

«Հրապարակ» թերթը գրում է. «ԲՀԿ երիտասարդական թևի առաջնորդ Վահե Էնֆիաջյանը հարգանքով է վերաբերվում նրանց, ովքեր լքել են կուսակցության շարքերը, քանի որ նրանք, ըստ պատգամավորի, իրենց քայլերը կատարելուց առաջ լավ ծանրութեթև են արել, հետո նոր որոշում կայացրել: Նույնը վերաբերում է նաև ԲՀԿ-ն օրերս լքած երիտասարդ ու «քաղաքական» պատգամավորներից Տիգրան Ուրիխանյանին, ով երկար տարիներ ԲՀԿ խոսնակն էր: «Տիգրան Ուրիխանյանի պարագայում պիտի հավելեմ, որ, ի տարբերություն մյուս գործիչների, շատ ավելի երկար տարիներ եմ նրան ճանաչում, բայց ես, միևնույն ժամանակ, հարգանքով եմ վերաբերվում նրա որոշմանը:

Իսկ որոշումը նա կայացրել է, հայտարարությունը տարածել է, որը որևիցե ձևով չեմ ուզում մեկնաբանել»,-մեզ հետ զրույցում ասաց պարոն Էնֆիաջյանը: Նա, սակայն, նշեց, որ իրենք եզրեր տեսնում են ու պատրաստ են համագործակցել թե՛ Ուրիխանյանի, թե՛ մյուս քաղաքական ուժերի ու անհատների հետ, որը նպաստ կբերի մեր պետականությանն ու ժողովրդին: Իսկ իրենք իրենց մեղքի բաժինն արդյոք տեսե՞լ են Ուրիխանյանի և մյուս ԲՀԿ-ականների կողմից կուսակցությունը լքելու մասով: Էնֆիաջյանն ասաց, որ ինքը նման կարծիք չի կարող հայտնել, որովհետև, ընդհանուր առմամբ, իրենց խմբակցությունում բարիդրացիական տրամադրություններ կան Տիգրան Ուրիխանյանի և մյուսների նկատմամբ:

Իսկ Ուրիխանյանը պատրաստվում է դուրս գալ կուսակցությունից և՞ս, և արդյոք փորձե՞լ են նրան համոզել, որ հետ կանգնի որոշումից, ինչպես Օսկանյանի դեպքում էր: Վահե Էնֆիաջյանն ասաց. «Տեղյակ էինք այնքանով, որքանով որ մամուլում շրջանառվում էր լուրը: Մենք մեր բոլոր գործիչների հետ էլ զրուցել ենք, քննարկել ենք ամենատարբեր զարգացումները, բայց, միևնույն ժամանակ, էստեղ կա նաև անձնական որոշելու հարց, և մենք հարգանքով ենք վերաբերվում, այլ կերպ չէր էլ կարող լինել»: Ուրիխանյանի հեռանալը ԲՀԿ-ից որևէ կերպ կանդրադառնա՞ կուսակցության գործունեության վրա, և ծա՞նր չէր, արդյոք, նրա «կորուստը»՝ որպես ԲՀԿ-ականի, Էնֆիաջյանն ասաց, որ ամեն ինչ ժամանակի մեջ է երևում. «Դե, ծանրն ու թեթևը շատ հարաբերական հասկացություն է, որը ժամանակն է ցույց տալիս»»:

Առավել մանրամասն՝  «Հրապարակ» թերթի այսօրվա համարում: