ԲԱՑԱՌԻԿ. Հայ մարզիկը պարտության մատնելով ադրբեջանցուն և թուրքին՝ դարձել է Եվրոպայի չեմպիոն (լուսանկարներ և տեսանյութեր)
Երեկ՝ մարտի 25-ին, Լեհաստանի Վալբրժիխ քաղաքում ընթացող մինչև 23 տարեկանների Եվրոպայի առաջնությանը Հայաստանը ներկայացնող ազատ ոճի ըմբիշ, 61 կգ քաշային Վոլոդյա Ֆրանգուլյանը (ԲԿՄԱ, անձնական մարզիչ՝ Ցոլակ Հարոյան) դարձել է Եվրոպայի չեմպիոն: Վոլոդյա Ֆրանգուլյանը 1/8-րդ եզրափակչում 5։4 հաշվով առավելության է հասել Բելառուսը ներկայացնող Դիանիս Մաքսիմաուի նկատմամբ, 1/4-րդ եզրափակչում 6։0 հաշվով հաղթանակ է տոնել երիտասարդների աշխարհի չեմպիոն ադրբեջանցի Ահմեդնաբի Գվարզատիլովի նկատմամբ, իսկ կիսաեզրափակչում` 9։7 հաշվով հաղթել է թուրք ըմբիշ Ռեսեփ Թոփալին: Մեր մարզիկը, եզրափակչում 8:3 հաշվով առավելության հասնելով ուկրաինացի Անդրեյ Սվիրիդի նկատմամբ, նվաճել է ոսկե մեդալ:
Operativ.am-ի թղթակիցը մանրամասներ իմանալու նպատակով կապ հաստատեց Վոլոդյա Ֆրանգուլյանի հետ, ով դեռևս գտնվում է Լեհաստանում:
-Սա Ձեր ո՞րերորդ հաղթանակն է:
-Հաղթանակներ շատ եմ ունեցել, բայց Եվրոպայի առաջնությունում առաջին անգամ եմ հաղթում:
-Մրցակիցներն ուժե՞ղ էին, մտահոգություն կա՞ր, որ չեք հաղթի:
-Այո, բավականին ուժեղ էին, և հատկապես մեր խմբում էին ուժեղները, մյուս խմբերում այդքան էլ չկային:
-Ի՞նչ եք զգում այս պահին, երբ պարտության եք մատնել «կրկնակի թշնամուն»:
-Ինձ շատ լավ և բավարարված եմ զգում, որ կարողացա հատկապես այդ երկուսի հանդեպ հաղթող ճանաչվեմ: Դրանից ավելի շատ եմ ուրախացել, քան եզրափակչից:
-Ձեր հաղթանակն ու՞մ եք նվիրում:
-Հաղթանակս նվիրում եմ Հարոյան Անդրանիկին, ով իմ առաջին մարզիչն էր, և ցավոք սրտի հեռացել է կյանքից:
-Ի՞նչ հարաբերությունների մեջ եք լինում հակառակորդի հետ մրցումներից առաջ և հետո:
-Մենք մարզիկներ ենք, և մեր կռիվը միայն գորգի վրա է:
-Ի՞նչ ծրագրեր կան առաջիկայում:
Առայժմ ցանկանում եմ մի փոքր հանգստանալ, քանի որ այս տարին ինձ համար շատ ծանրաբեռնված է եղել:
Operativ.am-ը ևս շնորհավորում է մարզիկին և մաղթում նոր հաղթանակներ:
Նշենք, որ ազատ ոճի ըմբշամարտի Հայաստանի ազգային հավաքականը՝ գլխավոր մարզիչ Արայիկ Բաղդադյանի ղեկավարությամբ հայրենիք կվերադառնա այս գիշեր՝ ժամը 04:30-ին:
Հիշեցնենք, որ Վոլոդյա ֆրանգուլյանը 2000թ.-ից զբաղվում է ըմբշամարտով: Մինչև 2009թ. նրա մարզիչը Անդրանիկ Հարոյանն էր, իսկ նրա մահից հետո, մարզիկը անձնական մարզիչ է ընտրել Ցոլակ Հարոյանին, ով Անդրանիկ Հարոյանի որդին է: Այժմ մարզիկը ծառայության մեջ է գտնվում: