Սուրենյանցը հույս ուներ,որ ՀՀ փաստացի ճանաչմանը կհետեւի նաեւ հայոց պետության իրավական ճանաչումը
1920 թվականի հունվարին, Փարիզի Վեհաժողովում, դաշնակից պետությունները փաստացի (դե ֆակտո) ճանաչեցին Հայաստանի Հանրապետությունը՝ որպես անկախ պետություն։ Ամենայն Հայոց կաթողիկոս Գեւորգ Ե Սուրենյանցը շնորհակալական գրեր հղեց դաշնակից պետությունների ղեկավարներին, այդ թվում՝ Անգլիայի ներկայացուցիչներին (Լորդերի պալատի նախագահ լորդ Քերզոնին, Քենթրբերիի արքեպիսկոպոսին, անգլիական պառլամենտի անդամ Ջեյմս Բրայսին), հույս հայտնելով, որ փաստացի ճանաչմանը կհետեւի նաեւ հայոց պետության իրավական ճանաչումը՝ իրականություն դարձնելով միացյալ Հայաստանի երազը։
Քենթրբերիի արքեպիսկոպոսին ուղղված նամակում Գեւորգ Ե Սուրենյանցը մասնավորապես գրում է. «Տէ՛ր, իմ ժողովրդի կողմից ուզում եմ արտահայտել Ձեզ Մեր անկեղծ շնորհակալութիւնները՝ Ձեր անխոնջ ջանքերի համար մեր օգտին, որը պատիւ կբերէ եւ Ձեզ, եւ Ձեր քրիստոնեայ ժողովրդին. նրանք եղել են ախոյեան ճնշուածների դատին եւ այժմ շահել են մեզ համար մեր առաջին յաջողութիւնը՝ մեր պետութեան փաստօրէն ճանաչումը։ Աղօթում եմ եւ վստահ եմ, որ Դուք չպիտի ձգէք մեր դատը, մինչեւ որ ամբողջ աշխարհի կողմից չճանաչուի աւելի ընդարձակ Միացեալ եւ Անկախ Հայաստանը։ Մեր տանջանքները եւ օրինապահ աջակցութիւնը Դաշնակիցների դատին պիտի երաշխաւորեն մեր պահանջների կատարումը եւ արդարութիւնը։ Օրհնում եմ Ձեզ եւ Ձեր Մեծ Բրիտանական ազգը»։
1920 թվականի սեպտեմբերին սկսվեց թուրք-հայկական պատերազմը։ Հայ ժողովրդին բարոյական ու ֆիզիկական աջակցություն ցուցաբերելու համար Գեւորգ Ե կաթողիկոսի նոյեմբերի 12-ի կոչը վերջին խնդրանքն է՝ ուղղված Անգլիայի թագավոր եւ Հնդկաստանի կայսր Գեորգ Ե-ին եւ այլ տերությունների առաջնորդների։
«Երկար տարիներ իւր ազատութեան յոյսով ապրած եւ տանճուած հայ ազգը, վերջին պատերազմի ընթացքում վեց տարի շարունակ համահաւասար կռուեց Համաձայնութեան պետութիւնների հետ միասին՝ ընդհանուր թշնամու դէմ։ Եվ երբ նա Սէվրի դաշնագրի համաձայն սպասում էր օր առաջ իր հայրենիք վերադառնալ, յանկարծ իւր առաջ տեսաւ իւր դարաւոր թշնամուն՝ իւր փոքրիկ սահմաններից ներս խուժած։ Արիւնաքամ, սոված, մերկ եւ հիւանդ հայութիւնը մենակ է թշնամու դէմ, որի նպատակն է ոչնչացնել հայ ազգն ու պետութիւնը եւ բնաջնջել քրիստոնէական հաւատը եւ եկեղեցին Արեւելքից։ Յանուն Տիեզերքի Փրկչի, սորանով դիմում եմ Ձեր քրիստոնէական մարդասիրութեան, օր առաջ փրկելու Հայաստանի հայութեան վերջին մնացորդը ֆիզիքական եւ բարոյական ուժերով, մինչեւ կհաւաքուին նորա ցրուած ուժերը եւ մինչեւ որ նա ի վիճակի կլինի ինքզինքը պաշտպանելու»։
Լուսանկարում՝ Կաթողիկոս Գևորգ Ե Սուրենյանցը ցեղասպանությունը վերապրած որբերի հետ։
Հայե'ր, գիտե՞ք, որ.ֆեյսբուք