Մեր բանակը տարածաշրջանում ամենամարտունակ, ամենաուժեղ և ամենագրագետ բանակն է. Արմեն Մուշեղյան

Մեր բանակն այսօր տոնում է իր 23-րդ տարեդարձը: Երիտասարդ, սակայն կայացած մեր բանակը վստահ քայլերով ապացուցում է, որ ուժեղ է, հզոր և մարտունակ: Բանակի օրվա հետ կապված Operativ.am-ի թղթակիցը զրուցեց Շուշիի առանձնակի գումարտակի ազատամարտիկ Արմեն Մուշեղյանի հետ, ով խոսեց մեր բանակի ձեռքբերումների մասին:

Այն հարցին, թե ինչ ձեռքբերումներ է ունեցել մեր բանակն այս 23 տարվա ընթացքում և ինչ մակարդակի է այն հասել, Արմեն Մուշեղյանը պատասխանեց. «Մենք ունենք մարտունակ բանակ, որն իր հնարավորությունները ժամանակի ընթացքում ուժեղացնելով, հզորացնելով, այսօր անառիկ է պահում մեր պետությունը, մեր Հայաստանի Հանրապետության սահմանները: Մենք ունենք Հայաստան, որը փոխանցվել է մեր պապերի կողմից: Մենք այսօր ապրում ենք ՀՀ-ում, որն անկախ հանրապետություն է: Պետք է նշեմ, որ ժամանակի ընթացքում մեր երկու հանրապետությունները՝ ՀՀ-ն և ԼՂՀ-ն, պետք է և՛ միավորվեն, և՛ կորցրած տարածքները ետ վերադարձնեն: Մեր համախմբվածության միջոցով պետք է հասնենք մեր ամենակարևոր երազանքներին»:

Արմեն Մուշեղյանի խոսքով՝ մեր բանակը տարածաշրջանում ամենամարտունակ, ամենաուժեղ և ամենագրագետ բանակն է:

Այն հարցին, թե բանակում ծառայելը մերօրյա զինվորի համար պարտականություն է, թե պարտք, Արմեն Մուշեղյանն այն մտահոգությունը հայտնեց, որ 12-րդ դասարանում ռազմագիտություն առարկա չի դասավանդվում: Նրա խոսքով՝ եթե ասում ենք, որ մանկապարտեզը հանդիսանում է դպրոցի նախաշեմը, ապա դպրոցը համալսարանի նախաշեմն է: Դպրոցում հենց պետք է տրվեն լավագույն գիտելիքները. և՛ մասնագիտական, և՛ առաջին հերթին ռազմահայրենասիրական: «Յուրաքանչյուր մասնագետ, իր մասնագիտությունից զատ, պետք է ունենա  նաև ռազմական գիտելիքներ, քանի որ մենք փոքր ազգ ենք և ուզած, թե չուզած սա է մեր տարածաշրջանը և այստեղ մենք պետք է կարողանանք համախումբ ուժերով հզորանալ»:

Արմեն Մուշեղյանի խոսքով՝ մենք պետք է ապավինենք միայն մեր սեփական ուժին ու բազկին, քանի որ այլ կերպ լինեն չի կարող: Այս ամենում կարևոր հանգամանք հանդիսանում է դպրոցում մատուցվող հայրենասիրական գիտելիքները: Բանակում կա և՛ պարտականություն, և՛ հայրենասիրություն: 

Արմեն Մուշեղյանն իր խոսքը եզրափակեց մեր բանակին մաղթելով ուժ և գիտակ մասնագետներով համալրում: «Մի բան է 100 տարի առաջվա պատերազմը, մի բան էր Արցախի պատերազմը և այլ բան է լինելու մեր վաղվա պատերազմը: Գիտությունը զարգանում է, ուստի մեր բանակը պետք է համալրվի գիտակ մարդկանցով: Ցանկանում եմ, որպեսզի բանակում մեկը մյուսին եղբայրաբար վերաբերվեն, քանի որ կա մեկ միասնական նպատակ և ամենակարևորը  մենք պետք է համախմբված լինենք»:

Հ.Գ. Ամուր հայրենիք ունենալու գրավականն անշուշտ կայուն և հզոր բանակ ունենալն է: Այլ կերպ լինել չի կարող, քանի որ հայի տեսակը միայն կարող է ունենալ անպարտ բանակ և քաջ զինվոր: Իսկ մեզ մնում է մեկ բան. ճանաչել և հիշել և շնորհակալ լինել մեր հերոսներին: 

Գայանե Մելիքյան