Ուժեղ պետության երաշխիքն ուժեղ բանակ ունենալն է. ցերեկույթ՝ բանակի 23-րդ տարեդարձին ընդառաջ
Այսօր՝ հունվարի 26-ին, ՀՀ ՊՆ Վազգեն Սարգսյանի անվան ռազմական ինստիտուտում կայացավ ցերեկույթ, որը նվիրված էր Հայոց բանակի կազմավորման 23-րդ տարեդարձին: Ցերեկույթը կազմակերպել էր «Հայոց Աղավնիներ» երիտասարդական նախաձեռնությունը: Ցերեկույթին ներկա էին ազատամարտիկներ Արայիկ և Արարատ Խանդոյանները, Աիդա Սերոբյանը, Արմեն Մուշեղյանը և այլք: Ցերեկույթն ուղեկցվեց ազգագրական երգերով, որոնք մեծ ոգևորություն առաջացրեցին ներկաների մոտ: Ցերեկույթը եզրափակվեց ինտելեկտուալ խաղով, որի ժամանակ կուրսանտները ցուցաբերեցին գիտելիքների բարձր մակարդակ:
Ցերեկույթի կազմակերպիչ, «Հայոց Աղավնիներ» երիտասարդական նախաձեռնության անդամ Անի Ամիրջանյանն Operativ.am-ի թղթակցի հետ զրույցում նշեց, որ նման միջոցառումները պիտի ոչ թե միայն տոնական օրերին լինեն, այլ ամեն օր, որովհետև նման միջոցառումների միջոցով մենք կարող ենք ոգեշնչել ու մեր շնորհակալությունը հայտնել մեր զինվորներին: Այն, որ մենք այսօր այստեղ ենք, և այս ցերեկույթը կայացել է, ապա դա ի շնորհիվ սահմանը պահող զինվորների է: «Ուրախ ենք, որ մեր բանակը տարեցտարի զորանում ու կատարելագործվում է: Հավատում ենք, որ միայն այսպիսի բանակ ունեցող ազգը կարող է հարատևել: Ուզում եմ իմ երախտագիտությունը հայտնել հայ զինվորի անձնազոհ կեցվածքի և հպարտ քայլվածքի համար: Թշնամին երբեք չի կարող ոտք դնել ազատագրված, հայի արյունը տեսած հողի վրա, որովհետև ես հավատում եմ մեր տղաների աչքերի փայլին, ես հավատում եմ հայ զինվորի խելքին ու ուժին, ես հավատում եմ մեր նախնիներից ժառանգած իմաստուն մտքին: Մենք մեր բանակը պիտի սիրենք և ընդունենք, ինչպես մեր հարազատ եղբորը, զավակին և այստեղ տեղին է հիշել Բանակի հիմնադիր, ԵԿՄ հավերժ նախագահ Սպարապետ Վազգեն Սարգսյանի խոսքը. «Չսիրված երեխան լավ մարդ չի դառնում»,- ասաց Անի Ամիրջանյանը:
«Հայոց Աղավնիներ» երիտասարդական նախաձեռնության հիմնադիր Գագիկ Ավետիսյանի խոսքով՝ մեր բանակը կազմավորվեց ամենաբարդ ժամանակաշրջանում: Մի ժամանակաշրջան, որը հայ ժողովուրդը մագլցելով հաղթահարեց, այդ ճանապարհին զոհելով իր ամենաթանկ ու ամենանվիրական ունեցվածքը՝ իր ազգապաշտ տղերքին:«Մեր տղան՝ մեր բանակը, շուրջ 23 տարի է արդեն ամեն օր իր հաստատուն և ուրույն քայլերով, հստակ գծագրված ճանապարհով առաջ է շարժվում, պատվով հաղթահարելով իր ճանապարհին հայտնվող բոլոր խոչընդոտները: Հիրավի, այսօր մեր բանակի այս տեսակ հպարտ կեցվածքի համար, նրա հավերժական հաղթանակների համար պարտական ենք այն տղաներին, ովքեր սիրած աղջկա ձեռքը բռնելու փոխարեն զենք բռնեցին ու կատաղի կռվի տվին հանուն այս մի փոքր հողակտորի, որին անվերջ փորձում են տիրանալ:Իսկ վերջին շրջանում հայոց դարպասները հսկող տղերքի կատարած սխրագործությունները հերթական անգամ եկան փաստելու, որ ժողովրդի ծոցից ծնված բանակն անպարտելի է: Շնորհավորում եմ համայն հայ ժողովրդին հայկական զինված ուժերի 23-րդ տարեդարձի կապակցությամբ: Ես խոնարհվում եմ բոլոր այն տղերքի շիրիմների առաջ, ովքեր կյանքը զոհաբերեցին, որ մեր բազմադարյա գոյը խզում չունենա:Իսկ այսօրվա, մերօրյա հերոսների կատարածը շարունակությունն է մեր նախորդների կերտած պատմության: Հպարտ ենք ձեզանով տղերք»,- ասաց Գագիկ Ավետիսյանը:
Գագիկ Ավետիսյանի խոսքով՝ նման միջոցառումներն ավելի քան պետք են և ոչ միայն տոն օրերին, այլ ցանկացած օր, ցանկացած ժամի: «Վստահ եղեք, որ մեր զինվորներն էլ ավելի են գոտեպնդվում, էլ ավելի են զորեղանում, երբ ամուր մի ձեռք զգում են իրենց ուսին:Ուրեմն եկեք այնպես անենք , որ մեր բանակն այդ ձեռքերի բացակայությունը երբեք չզգա»:
Operativ.am-ի թղթակիցը զրուցեց նաև ցերեկույթին մասնակից ազգագրական երգիչ Արա Այվազյանի հետ: Վերջինս նշեց, որ ազգագրական երգի ուժն ու զորությունը միայն հայը գիտի: Մենք մեր հաղթանակները կերտել ենք հենց երգով, քանի որ այն մեծ ուժ է տալիս: Երգի ամեն մի նախադասություն ու բառ կարող է հիմք հանդիսանալ, որ նոր հաղթանակներ կերտվեն: Բանակի ձեռքբերումների մասին խոսելով Արա Այվազյանը նշեց, որ մեր բանակն իր ուժը ոչ մեկ անգամ է ապացուցել: «Սակայն կուզեմ, որպեսզի մեր բանակի հաջողությունները տոնենք կենդանի հերոսներով: Խաղաղ ծառայություն եմ մաղթում մեր զինվորներին ու բարի վերադարձ: Հիշե՛ք, որ Ձեզ տանը սպասում են»,- նշեց Արա Այվազյանը:
Ազգագրական երգիչ Սահակ Կյուրեղյանի խոսքով՝ մեր բանակին ու առհասարակ զինվորներին պետք է ողջունել ու քաջալերել հենց ազգագրական երգերով, քանի որ պատերազմի տարիներին միշտ ազգային երգերն են ոգեշնչել: «Չնայած այն հանգամանքին, որ երգը ոգեշնչում է, բայց լինում են դեպքեր, երբ խոսքն առավել զորեղ է: Իսկ մեր բանակին մաղթում եմ խաղաղ օրեր, ինչպես նաև, որ մեր բանակում լինեն խիզախ ու արի տղաներ: Ինձ համար հայկական բանակն անհամեմատելի է և ամենաուժեղը, քանի որ այն մշտապես եղել է բարձրունքում»,- ասաց Սահակ Կյուրեղյանը:
Ազգագրական երգիչ Մուրադ Մշեցու կարծիքով՝ երգը խոսքի առավել կատարյալ տարբերակն է և հատկապես ազգային երգը: «Ազգային երգն ուժեղ է քարոզչական առումով, ինչպես նաև ոգևորող հանգամանք է հանդիսանում: Պատահական չէ, որ պատերազմի դաշտում հենց երգով են առաջնորդվել: Էնպես, որ առավել ուժեղ միջոց քան երգը չեմ գտել: Առհասարակ բանակը հայ մարդու միակ հույսն ու ամենալուսավոր կետն է: Այն մեզ համար բացառիկ է արժեք է. թե՛ այսօր, թե՛ վաղը, թե՛ միշտ: Մեր բանակը միանշանակ լավագույնն է տարածաշրջանում, ոչ թե որ հայ եմ էտպես եմ ասում, այլ փորձում եմ մաքսիմում օբյեկտիվ լինել: Մեր բանակը մեր հույսն է, մեր ապավենը, մեր նեցուկը: Չնայած այն հանգամանքին, որ մեր շուրջը գորշություն է, բայց մեր բանակը միակ լուսավոր կետն է: Մեր բանակին մաղթում եմ տոկունություն, նոր հաջողություններ, նոր հաղթանակներ: Ամենակարևորը ցանկանում եմ, որ մեր բանակն առանց կորուստների լինի» ,- ասաց Մուրադ Մշեցին:
Գայանե Մելիքյան