«Գետինը պետք է մտնենք». հեղինակավոր թուրք գրողը՝ Էրդողանի Ապրիլի 24-ի հրավերի մասին

Թուրքիայում հեղինակավոր լրագրող, գրող Բասքըն Օրանը ևս անդրադարձել է Դարդանելի գործողության հարյուրերորդ տարելիցն ապրիլի 24-ին նշելու թուրքական իշխանությունների որոշմանը՝ քննադատության ենթարկելով այն: Օրանն իր հոդվածում խոսելով Ադրբեջանի նախագահի մասին՝ նրան անվանել է բռնակալ, իսկ Ադրբեջանին՝ «սայթաքուն քար» թուրքական արտաքին քաղաքականության համար:
Թուրքական «Ռադիկալ» պարբերականում լույս տեսած հոդվածում Օրանը նախ քննադատում է Թուրքիայի նախագահի ընդունելության արարողությունների ժամանակ 16 «թյուրքական պետությունների» զինվորների ներկայությունը՝ այս քայլի մեջ գտնելով նաև պատմական սխալներ:

Օրանը նշում է, թե Էրդողանի «թյուրքական պատմական 16 պետությունների» շրջանի ռազմական հանդերձանքով ներկայացվածների մի մասի թյուրքական լինելու հարցում կասկածներ կան, ինչպեսև կան թյուրքական պետություններ, որոնք ընդհանրապես ներկայացված չեն:
Այնուհետև թուրք հոդվածագիրը քննադատում է Էրդողանի՝ ՀՀ նախագահին ուղղված հայտնի հրավերը՝ այն համարելով «ամոթալի»:
«Թուրքիայի համար մեծ հպարտության աղբյուր Չանաքքալեի (Դարդանելի-խմբ.) պաշտպանությունն ամեն տարի մարտի 18-ին է նշվում: Ավստրալացիներն ու նորզելանդացիներն էլ են գալիս, իրենց զոհերին հիշում:

Այս տարի մեր նախագահը Թուրքիայի արտաքին քաղաքականության «սայթաքուն քար» հանդիսացող Ադրբեջանի բռնակալ Իլհամ Ալիևին իր կողքն է առնելու: Չանաքքալե է գալու: Եվ մարտի 18-ն այս տարի «տոնելու են» ապրիլի 24-ին, որն «Առաջադիմություն և միություն» կուսակցության մսագործների՝ հայերի դեմ իրականացված սարսափելի կոտորածը խորհրդանշող օրն է: Հայտնի լրագրող Ռոբերտ Ֆիսկն «The Independent» թերթի իր հոդվածում այսպես է ասում. «Կոտորված 1.5 մլն հայերի ուրվականների կողքով են քայլելու»:
Գետինը պետք է մտնենք…

Անցյալ տարի «20-րդ դարի սկզբի պայմաններում կյանքին հրաժեշտ տված հայերի թոռներին ցավակցություն եմ հայտնում» ասող Էրդողանն էլ հիմա կանգնում, ասում է՝ «ՀՀ նախագահին ապրիլի 24-ին Թուրքիա ենք հրավիրում»:
Ի՞նչ է սա: Ի՞նչ տեսակ ամոթ է: Ոմանց հասկացած լեզվով ասեմ՝ սա ի՞նչ մեղք է:
Շոուին դեռ համաձայն էինք, բայց ստորացումը կարծես արդեն շատ է»,- գրում է Բասքըն Օրանը:
Հիշեցնենք, որ Թուրքիայի նախագահ Թայիփ Էրդողանը հունվարի 18-ին Անկարա այցելած Ադրբեջանի նախագահ Իլհամ Ալիևի հետ համատեղ ասուլիսում հայտարարել էր, թե թուրքական կողմը պատրաստվում է Դարդանելի ճակատամարտի (հայտնի է նաև Չանաքքալեի, Գալիպոլիի պատերազմ) 100-րդ տարելիցը նշել ապրիլի 24-ին, ինչի կապակցությամբ 102 երկրների ղեկավարների պաշտոնական հրավերներ են ուղարկվել՝ Թուրքիայում նշելու ճակատամարտի հարյուրամյակը:

Էրդողանի կողմից հրավիրվածների թվում է նաև ՀՀ նախագահ Սերժ Սարգսյանը, որը պատասխան նամակով արդեն հրաժարվել է Դարդանելի ճակատամարտին նվիրված միջոցառումների մասնակցությունից, ինչպես նաև նշել հրաժարվելու պատճառները:
Այսպիսով՝ Էրդողանն իր այս հրավերով նախևառաջ մերժել է ՀՀ նախագահի՝ ավելի վաղ իրեն ուղարկված հրավերը՝ ապրիլի 24-ին այցելելու Ծիծեռնակաբերդ և միասին հարգելու Ցեղասպանության զոհերի հիշատակը:
Դարդանելի ճակատամարտի 100-ամյակն ապրիլի 24-ին նշելու Էրդողանի որոշումը միմիայն կապված է Հայոց ցեղասպանության զոհերի հիշատակի օրվա հետ, քանի որ ապրիլի 24-ը Դարդանելի գործողության տեսանկյունից առանձնացող և նշանավոր օր չէ:

Փառք Հայաստանին. ֆեյսբուք