Այծի տարին՝ Հայոց պատմության մեջ
2015 թվականը հորոսկոպով Կապույտ այծի տարի է: Հենց սկզբից մեր հասարակությունը մի շարք պատճառներով տհաճությամբ է դիմավորում 2015-ը… Դրամի արժեզրկում, համատարած թանկացումներ, ինչը Նոր տարին տոնից հոգս է դարձնում, շարունակվող արտագաղթ, Մաքսային միություն… դա քիչ էր, հիմա էլ՝ Կապույտ այծի տարի… Քիչ է այծ, այն էլ՝ կապույտ….
Ճիշտ է, կապույտի և նրա երանգը համարվող երկնագույնի նկատմամբ մեր հասարակության վերին շերտերում ոչ միայն համակրանք կա, այլև վերևներում շատերը իրենց հաճախ իսկական կապույտի պես են պահում:
Իսկ այծը շատ հավատալիքներում ներկայացվում է սատանայի տեսքով. Ավելի ճիշտ՝ սատանան ինքնին հանդես է գալիս այծի տեսքով: Տվյալ պարագայում, այս կապույտ այծը բնավ էլ պետք չէ նմանեցնել կոզյոլին: Վերջինս այծ չէ, ընդամենը՝ կոզյոլ է…
Ասում են, պատմությունը կրկնվում է, և դա նրա թերություններից մեկն է: Եկեք փոքրիկ էքսկուրս անցկացնենք Հայոց պատմության խորքում և տեսնենք ինչպիսի՞ն է եղել Կապույտ այծը մեր պատմության մեջ….
Եվ այսպես՝ կապույտ այծին հեծած՝ տեղափոխվում ենք մթա 7-րդ դար…
Մթա 625 թ. Հայոց բանակը Պարույր Սկայորդու որդու՝ Հրաչյայի հրամանատարությամբ ջախջախում է Ասորեստանի մայրաքաղաք Նինվեն պաշարած մարաց արքա Կիաքսարի զորքերը: Ահա… հենց սկզբից՝ ինչ որ բան այն չէ…Ասա Հրաչյա ջան, ի՞նչ գործ ունես օտար երկրում, ուրիշի կռվի մեջ… ընդամենը 13 տարի անց՝ մթա 612 թվականին հայրդ՝ Պարույրը, նույն հայկական զորքով արդեն մարերի հետ կմասնակցի Նինվեի գրոհին ու կործանմանը… Հայրեր-որդիներ պայքարը պարզվում է՝ վաղուց է եղել…
Մթա 553 թ. Տիգրան Երվանդյան արքան դաշնակցեց պարսիկ Կյուրոսի հետ և միասին կործանեցին Մարաստանը: Քիչ անց՝ Կյուրոսի զավակները ծնկի կբերեն Հայաստանը: Խելքի չենք գալիս էլի… Նույնը 1907 թվականին եղավ, Թուրքիայում….
Մթա 313 թ. Հիմնադրվեց Սելևկյան պետությունը: Այ սա վատ նշան է… Այծի տարում հիմնվեց Հայոց թշնամի մի հզոր թագավորություն…Այծի տարում Մաքսային Միություն է հիմնվում…անմեղ անունով մի կազմակերպություն, որ իրականում ԽՍՀՄ է հիշեցնում: Բայց, եկեք չհուսահատվենք… Սելևկյան պետությունը կործանվեց հայոց բանակի զարկերից…
Մթա 85 թ. Տիգրան Բ Մեծը վերջնականապես ընկճեց Պարթևստանը և պարթևներից խլեց արքայից-արքա տիտղոսը: Տեսնու՞մ եք ինչ փառահեղ էր Այծի տարին հայոց համար… Զգուշացեք, պարսիկներ, Արցախից հետո հերթը Պարսկահայքինն է…
Մթա 73 թ. Զարեհ արքայազնը ապստամբեց Տիգրան Մեծի դեմ: Տեսնես 2015-ին Սերժի դեմ երիտհանրապետականներից ո՞վ է ապստամբելու…
Մթա 1 թ. Արտաշեսյան դինաստիան կործանվեց: Այ սա լուրջ ահազանգ է Հանրապետական կուսակցության համար: Գուցե Րաֆֆին Վովայի հետ Ծիծեռնակաբերդում այս մասի՞ն էր աղոթում…
11 թ. Էրատո թագուհին հրաժարվեց գահից ու Մեծ Հայքի գահ բարձրացավ Վոնոնը: Դարձյալ դինաստիական փոփոխություն… Չէ, Մելիք-Ադամյանի գլխին Կապույտ այծը սև ամպեր է կուտակում…
35 թ. Մեծ Հայքի գահ բարձրացավ Միհրդատ վրացին: Հեյ գիտի, Դրո… բա չլինեիր, մի ջարդ տայիր էս տուտուց վրացիներին…
59 թ. Կորբուլոնը գրավեց և ավերեց Արտաշատ մայրաքաղաքը: Հայոց ամենաերկարակյաց մայրաքաղաքը ոտքի կանգնեց ու դիմադրեց… Տեսնենք Երևանը կդիմանա՞ ռուսական ճնշմանը…
215 թ. Կարակալա կայսրը արշավեց Հայաստան, ձերբակալվեց Խոսրով Ա թագավորը հայոց: Բաղրամյան 24-ում թող սպասեն Պուտինի արշավանքին…
287 թ. Մեծ Հայքում գահ բարձրացավ Տրդատ Գ, որի կառավարման տարիներին էական փոփոխություններ տեղի ունեցան երկրում: Սա կրոնական հեղաշրջում իրականացրեց: Բարբարոսաբար քանդեց սեփական երկիրն ու կործանեց մշակույթը… Նրան հետևում են և մեր իշխանավորները… Իսկը, որ Կապույտ այծի տարի…
371 թ. Ձիրավի ճակատամարտը: Հայոց պատմության ամենափառահեղ էջերից մեկը: Այծի ականջը խուլ… Փառահեղ էջեր էլ ենք ունեցել…
443 թ. Վասակ Սյունին նշանակվեց Հայաստանի մարզպան: Հուսանք, Լիսկա Սյունին կազատվի մարզպետի պաշտոնից:
491թ. Հայերը ապստամբեցին պարսից Կավատ արքայի դեմ: Տեսնու՞մ եք… բարոյական հաղթանակներ ունեցել ենք, սա էլ՝ բարոյական ապստամբություն…Կավատի ու կավատության դեմ…
503 թ. Պարսից արքունիքը վերջապես հաստատեց հայ եկեղեցու կանոնակարգը, որով հայերը Իրանական պետության կազմում վերածվում էին սոսկ կրոնական համայնքի: Էխ, եկեղեցի…
791 թ. Աշոտ Մսակեր Բագրատունին դարձավ Հայոց իշխան: Պատմությունն իսկապես կրկնվում է. Մեր օրերում էլ մսակեր միայն իշխանավորները կարող են լինել… մենք՝ մեր մակարոնը….
1175 թ. Դավադիրները սպանեցին Կիլիկիո քաջ իշխան Մլեհին: Մեր իշխանավորները հազիվ թե վախենան, նրանք քաջ չեն…
1187 թ. Լևոն Բ գահ բարձրացավ Կիլիկիայում: Հայոց ամենաքաջ, ամենահզոր գահակալներից մեկը: Գուցե 2015-ին…
1211 թ. Զաքարյանները ազատագրեցին Սյունիքը: Կարծում եմ, Սյունիքը այժմ էլ կարիքն ունի ազատագրության … վատ կառավարողներից….
1259 թ. Հայերի ապստամբությունը մոնղոլական տիրապետության դեմ: Այսպիսի բան էլ է եղել: 2015 թվականին պատմությունը կարձանագրի՞ հայերի ապստամբությունը Կրեմլի տիրապետության դեմ…
1343 թ. Կոստանդին Լուսինյանը Կիլիկիայի թագավոր: Հայոց գահին՝ ֆրանսիական ծագմամբ արքայատոհմ: Գուցե հարկ է, որ կառավարող հանրապետական վերնախավը ԴՆԹ թեսթ հանձնի…
1403 թ. Լենկ Թեմուրի վերջին արշավանքը Հայաստան: Խեղճը կաղ ոտքով Միջին Ասիայից Հայաստան արշավեց, մենք ազգովի ուզում ենք Ռուսաստան չվենք…
1487 թ. Օսմանյան թուրքերը նվաճեցին Կիլիկիան: Չէ, Այծի տարին մեզ համար չէ ոնց որ… 2015 թվական՝ օսմանյան ռուսները նվաճեցին Հայաստանը…
1667 թ. Կնքվեց առևտրական պայմանագիր Ռուսաստանի կառավարության և Նոր Ջուղայի վաճառականների միջև… Պարզվում է՝ Մաքսային միություն դեռ 17-րդ դարում է եղել…մենք չգիտեինք…
1727 թ. Հալիձորի հերոսական պաշտպանությունը և թուրքական բանակի պարտությունը: Է, հետո՞ ինչ… Միևնույն է, Հալիձորին էլ, Սյունիքին էլ թուրքերը տեր դարձան Ավետիս անունով մի դավաճան տերտերի շնորհիվ…
1895 թ. Հայերի զանգվածային կոտորածները Արևմտյան Հայաստանում: Երանի կարողանայի գրել. Թուրքերի զանգվածային կոտորածները Արևմտյան Անատոլիայում…
1895 թ. Զեյթունի ապստամբությունը… Երկաթե շերեփով….
1991 Հռչակվեց Հայաստանի հանրապետությունը… Եկեք կանգ առնենք, տեղ հասանք…. Պարզվում է՝ այս Կապույտ այծի տարում ենք անկախացել: Ուրեմն՝ շատ կապույտներ ու այծեր կգան-կգնան, մենք ուժեղ, անկախ, միասնական ու հզոր պետք է լինենք… Պարտավոր ենք լինել:
Շնորհավոր Ամանոր արի հայ: Մենք ենք տերը մեր երկրի: Մեր երկրի ճակատագիրը, ապագան մեր ձեռքերում է: Միասնաբար, ձեռք-ձեռքի պայքարով քայլենք դեպի այն Հայաստանը, որ մեր զավակների համար ենք ուզում կերտել:
Վահե Լոռենց. Ֆեյսբուք