Շաբաթվա ուշագրավ քաղաքական իրադարձությունները՝ մեր դիտանկյունից. ամփոփում

Նախորդ շաբաթ հանրապետությունում մի քանի դիտարժան իրադարձություններ տեղի ունեցան: Դրանցից հատկապես աչքի ընկան դոլարի փոխարժեքի կտրուկ բարձրացումը, ապրանքների թանկացումը, ինչպես նաև վարորդների գործադուլը: 

Փոքր բիզնեսը Կարմիր գրքում հայտնվելու միտում ունի

Թվում է` ՀՀ կառավարությունն ամիսներ առաջ «Շրջանառության հարկի մասին» օրենքում հրաշալի փոփոխություն էր կատարել` ՓՄՁ-ների համար նախատեսված հարկի շեմը 3.5 % -ից իջեցնելով 1 %-: Մինչդեռ, սրան զուգահեռ փաստաթղթավորման անհրաժեշտության ի հայտ գալն առաջացրեց ձեռնարկատերերի վրդովմունքը: Ամփոփելով տարին' «Փոքր ձեռներեցությամբ զբաղվողների միության» նախագահ Ստեփան Ասլանյանը նկատեց, որ սրա հետևանքով շատ ՓՄՁ-ներ փակվել են, օրինակ, 2013-ից մինչև հիմա մոտ 10 հազար ՓՄՁ-ներ են փակվել, և եթե ստեղծված իրավիճակը չփոխվի, ապա ըստ Ստեփան Ասլանյանի` փոքր բիզնեսը Կարմիր գրքում կհայտնվի: Ինչևէ, միությունն իր իսկ կողմից մշակված ծրագիրն է ներկայացրել ՀՀ կառավարությանը՝ սպասելով աչալուրջ պատասխանի: 

Դրամը փորձում է վերգտնել իրեն

Շաբաթվա առաջին կեսին դոլարի կուրսը փոխանակման կետերում հասավ մինչև 600 և ավել դրամի, իսկ վերջին օրերին բանկերն առքի համար սահմանել էին 440-450, իսկ վաճառքի համար` 460-470 դրամ: Ինչ վերաբերում է ԿԲ-ի սահմանած արժեքին, ապա այս շաբաթ ԿԲ սահմանեց դոլարի ամենաբարձր արժեքը, այն հասցնելով մինչև` 527.20 դրամի, իսկ շաբաթվա վերջում ԿԲ սահմանած արժեքը դոլարի համար կազմում էր 455.75 դրամ:

Գոհ չէիք 150 դրամից, ուրեմն հիմա կվճարեք 300 դրամ

Այս շաբաթ կրկին օրակարգ մտավ տրանսպորտի թանկացման հարցը: Այս առնչությամբ փոխադրողների միության նախագահ Հրանտ Եղիազարյանը չշտապեց հուսադրել քաղաքացիներին` հայտարարելով, որ տրանսպորտի համար ընդհանուր ծախսերը կազմում եմ 252 դրամ, որը հայկական հաշվարկով համարժեք է 300-ի, ուստի, եթե պետությունը չսուբսիդավորի պահանջվող վճարի որոշակի մասը, ապա մենք ստիպված կլինենք երթուղայինից օգտվելու համար վճարել 300 դրամ: Ստացվում է, որ եթե անգամ վաղը հայտարարվի, որ պետությունն իր վրա է  վերցնում գումարի մի մասը և մեզ մնում է վճարել 200 դրամ ուղեվարձ, մենք պետք է շնորհակալ լինենք այդ մեծահոգության համար:

Թանկացում-էժանացում, արդյունքում կրկին ստացվում է թանկացում

Արդեն գրեթե մեկ ամիս է, ինչ ամենօրյա սպառման ապրանքների, մասնավորապես սննդի գինն օրվա մեջ տատանվում է մի քանի անգամ` բարձրանալով և նվազելով: Այս շաբաթվա երկրորդ կեսին թվում է` ամեն ինչ տեղն ընկավ, երբ դրամը կրկին սկսեց արժևորվել և ապրանքների գները ևս որոշ չափով կայունացան: Մինչդեռ իրականում դրանք դժվար է կարգավորում անվանել, որովհետև գները նախկին գների համեմատ կրկին բարձր են: Թանկացումից հետո էժանացված ապրանքները միայն արտաքնապես են էժանացված, եթե համեմատենք դրանց գինը մեկ ամիս առաջ սահմանված գների հետ, ապա կտեսնենք, որ դրանք թանկացել են, պարզապես վերջին գլոբալ թանկացումներից հետո գների նվազումը փակում է մեր աչքերը:

Operativ.am