Հայկական օդն էլ ամբողջությամբ կանցնի ռուսների ձեռքը. Շահեն Պետրոսյան
«168 ժամ» թերթը գրում է. «Սա այն դեպքն է, երբ ոլորտը կրկին հստակ անցնում է ռուսների ձեռքը և փող են լվանում այստեղ: Հնարավոր է դա «Աէրոֆլոտի» հետ առնչություն ունեցող անձնավորություններ են, ու հայկական օդն էլ ամբողջությամբ կանցնի ռուսների ձեռքը: Այդ ներդրողներին ես չեմ ճանաչում, բայց նույն է, ինչ հանքարդյունաբերությունը, էներգետիկան, կապը:
Բոլոր ոլորտները տվել են ռուսներին, սա էլ են իրենք վերցնում: Այս մասին ես արդեն 10 տարի է' ասում եմ, բայց ՀՀ կառավարությունն այդպես էլ խելքի չեկավ»,- «168 ժամ» թերթի հետ զրույցում ասաց ՀՀ քաղավիացիայի վարչության նախկին պետ Շահեն Պետրոսյանը՝ խոսելով Air Armenia ավիաընկերության նոր բաժնետիրոջ՝ ռուսական կառավարիչներ ունեցող East Prospect Fund-ի մասին:
Դիտարկմանը, որ Air Armenia-ի 49%-ը նոր տիրոջը վաճառվեց, երբ Ռուսաստանը հրաժարվեց ավիանավիգացիան սպասարկել, հնարավո՞ր է, որ այդ խնդիրները մտադրված հարուցվեցին, Շ.Պետրոսյանը նշեց, որ սովորաբար ինչ-որ մեկին հրահանգում են, որ լիցենզիան ձեռք բերի, գործարքներն իրականացնի, հետո գալիս ու տիրանում են ամեն ինչին. «Այսինքն, պետական միջոցներից ստեղծում են ամեն ինչը, ստեղծում են շուկան ու ատկատների միջոցով նվիրում են ռուսներին:
Դրա վերջը պետք է տրվի: Հայկական ավիափոխադրողը չի կարող առանց պետության լրջագույն ներդրումների մեր դրոշի տակ թռնել: Մնացածն ամբողջությամբ ավանտյուրա է, փող լվանալու տեղ: Դա սկսվեց «Հայկական ավիաուղիների» սնանկացման գործընթացով ու սկսել է Ռոբերտ Քոչարյանը և հիմա շարունակվում է: Վիրջինյան ընկերությունում գրանցված լiնելը նշանակում է օֆշորային ընկերություն է, բացահայտ ընկերություն չի: Եթե ամեն ինչ ծածկադմփոցով են անում, նշանակում է մեր շուկան ինչ-որ մեկի ձեռքն է անցնելու»:
Առավել մանրամասն՝ «168 ժամ» թերթի այսօրվա համարում: