Արդյո՞ք գայլերը կարող են լինել անվտանգ և ինչպե՞ս կարգավորել գայլ-հասարակություն կապը
Այսօր Էկոլոգիական դաշինքի համակարգող, «Թռչնասերների կենտրոն» ՀԿ-ի նախագահ Սիլվա Ադամյանը, Հայաստանի Օրհուս կենտրոնների տեղեկատվության պատասխանատու Մարի Չաքրյանը և բնասեր Արմեն Մարտիրոսյանը լրագրողներին ներկայացրին գայլ-հասարակություն կապի մասին:
Գայլը գրեթե բոլորի մոտ տպավորված է որպես գիշատիչ կենդանի, և միտված է վնաս հասցնել մարդուն և նրա ունեցվածքին: Բանախոսներն իրենց խոսքում հակառակը պնդեցին, իսկ Արմեն Մարտիրոսյանը կիսվեց իր փորձով: Արմեն Մարտիրոսյանը, ով շներ վարժեցնող է մասնագիտությամբ,1980 թվականից նաև գայլերի հետ է «լեզու գտել»: Նա վստահեցնում է, որ գայլը մարդուց խելացի է, սկզբունքային, հավատարիմ իր օրենքներին: Արմեն Մարտիրոսյանը 7-8 տարեկանում կենդանաբանական այգում զբոսնելիս, պատահաբար հայտնվել գայլի վանդակում: Գայլը կարծես վտանգ չզգալով նրանից, հասկացել է իրեն և անգամ ձեռքով շոյել: Այդ ժամանակ 7-8 տարեկան երեխան գիտակցելով, որ գայլն իրեն վանդակում այնքան էլ լավ չի զգում, նրան խոստանում ազատել: Վարժեցնողն ասաց, որ եթե գայլին խոստում ես տալիս, պետք է կատարես, քանի որ նա միշտ հիշելու և սպասելու է դրան:
Գայլի մասին իր փորձն ու պատմություն առավել մանրամասն ներկայացված է «Դունայն ու նրա ոհմակը» գրքում, որը դեռևս Հայաստանում չկա: Մի քանի օրինակ տպվել է միայն Ռուսաստանում:
«Երբ գայլն արդեն ձագեր է ունենում, ինչպես և մարդն է ընտանիք կազմում, սկսում է կեր գտնել նրանց համար: Եվ քանի որ մարդիկ ոչնչացնում են գայլերի համար նախատեսված որսը՝ գայլերը սկսում եմ մտնել գյուղեր, և իրեն որսը գտնում են անասնագոմերում: Գայլը որսում այն, ինչը ուտելու է, իսկ մարդու միս գայլը չի ուտում՝ ուստի նա երբեք մարդուն չի որսում:
Մարտիրոսյանի խոսքով՝ կրակելը հարցի լուծում չէ: Գայլերին պետք չէ ոչնչացնել, քանի որ նրանք պետք են հասարակությանը, նրանց պարզապես պետք է հասկանալ: Ասում է՝ գայլն իր համար ուսուցիչ է եղել, նրանից շատ բան կարելի է սովորել:
Operativ.am-ի թղթակցի այն հարցին , թե ինչպես կարելի է առանց գայլին վնասելու պաշտպանվել նրանցից, վարժեցնողն ասաց. «Գայլը միշտ նկատում է իր ճանապարհին հայտնված մարդուն, սակայն շրջանցում է նրանց, իսկ մարդիկ նկատելուն պես ագրեսիվ են դառնում խուճապի մատնվում, մինչդեռ հարկավոր է պարզապես անտարբեր անցնել:
Բանախոսները նշեցին, որ գայլերն իրենց վեր են դասում մարդկանցից: Նրանք անգամ շան հետ ընդհանրություններ քիչ ունեն: Նրանք հպարտ են, շան նման չեն կաշառվում:
Արմեն Մարտիրոսյանը գայլերի հետ շփվել է սարերում, այնտեղ, որտեղ նրանք ապրում են: Նա ասում է, որ հնարավոր չէ գայլին վարժեցնել սահմանափակ տարածության մեջ: Մարդը եթե նրա տարածքում է, ուրեմն իր թշնամին է: Նրա խոսքով որքան էլ լեզու գտնեն, գայլը երբեք մարդու հետ չի ընկերանում:
Կարինե Գևորգան