Մշակութային հուշարձանները կարող են տեղափոխել Երևան
ԱԺ դեկտեմբերի 17-ի՝ ՀՀ կառավարության կողմից հրավիրված ԱԺ արտահերթ նիստին երկրորդ ընթերցմամբ քննարկման ներկայացվեց ԱԺ պատգամավորներ Արփինե Հովհաննիսյանի և Նաիրա Զոհրաբյանի կողմից ներկայացրած «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքում լրացումներ և փոփոխություն կատարելու մասին օրենքի նախագծի փաթեթը: Հիմնական զեկուցող Արփինե Հովհաննիսյանը ներկայացրեց նախագծի հիմնական դրույթները: Նա իր ելույթում ասաց, որ պատմական հուշարձանների քանդումն արգելվում է:
«Հանրապետական և տեղական նշանակության հուշարձանի ամբողջական կամ մասնակի տեղափոխումը կարող է կատարվել միայն բացառիկ դեպքում, եթե հուշարձանի նյութական պահպանությունը պահանջում է այն տեղափոխել: Այս դեպքում իրավասու մարմինն անվտանգության անհրաժեշտ միջոցներ պետք է ձեռնարկի հարմար վայրում հուշարձանի ապամոնտաժման, տեղափոխման և վերականգնման համար: Հանրապետական և տեղական նշանակության հուշարձանի տեղափոխումը կատարվում է Հայաստանի Հանրապետության կառավարության թույլտվությամբ:Հուշարձանների փոփոխումը կարող է կատարվել միայն այն դեպքում, երբ դա պահանջում է հուշարձանի նյութական պահպանությունը: Հուշարձանի փոփոխումը չի կարող զուգորդվել նրա պատմամշակութային արժեք հանդիսացող արտաքին ու ներքին կերպարների, դրանց առանձին տարրերի ու դրվագների անդարձելի խեղմամբ, նսեմացմամբ կամ ոչնչացմամբ»,-նշեց Արփինե Հովհաննիսյանը:
Հարցի կապակցությամբ ելույթ ունեցան նաև պատգամավորներ Էդմոն Մարուքյանը և Արտակ Դավթյանը: Էդմոն Մարուքյանը հետաքրքրություն հայտնեց այն հարցի հետ կապված, թե ինչպես են զարգացնելու զբոսաշրջությունն այն դեպքում, երբ հուշարձանները տեղափոխում են Երևան և զբոսաշրջիկներն այլևս չեն այցելում պատմական վայրեր, հետևաբար, զբոսաշրջությունն այլևս չի կարող զարգանալ:
Այնուհետև ելույթ ունեցավ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի անդամ Կարինե Աճեմյանը, ով նշեց, որ հարցը քննարկվել է և դրական որոշում է կայացվել և խնդրեց ԱԺ-ին ներկայացնել քվեարկության և կողմ քվեարկել: