Մենք ապրում ենք, ապրելու ենք և մի թիզ հող չենք տալու. Քաշաթաղի շրջանի վարչակազմի ղեկավար
Օperativ.am-ի թղթակիցը, ով գտնվում էր Արցախում, զրուցել է Քաշաթաղի շրջանի վարչակազմի ղեկավար՝ Սուրիկ Խաչատրյանի հետ։ Վերջինս խոսել է Քաշաթաղի ձեռքբերումների և խնդիրների մասին: «Որքան շատ խոսվի մեր շրջանից, ազատագրված տարածքներից, այնքան ուշադրությունն ավելի մեծ կլինի»,- ուսանողների և լրագրողների հետ հանդիպման ժամանակ նման կարծիք հայտնեց Քաշաթաղի շրջանի վարչակազմի ղեկավար Սուրիկ Խաչատրյանը։
Սուրիկ Խաչատրյանը վարչակազմի ղեկավարի պաշտոնը ստանձնել է 2010թ.-ից: Նա իր ղեկավարման տարիների հիմնական ձեռբքերումներից մեկը համարում է վերաբնակեցման խնդրի լուծումը: «Մեր բոլորի աշխատանքի արդյունքի շնորհիվ է, որ ես կարող եմ առաջին ձեռբերումը համարել վերաբնակեցումը։ Ըստ պաշտոնական տվյալների՝ այժմ շրջանում ապրում է մոտ 11.000 բնակիչ։ Կարևոր և լուրջ ձեռքբերումներից է նաև գյուղատնտեսության ոլորտը: Կարող եմ նշել, որ 5000 հա մշակման հողերից հասել ենք 20.000-ի: Հողի մշակման արդյունքում շատ խնդիրներ կստանան իրենց լուծումը: Տեխնիկան այդքան էլ չի հերիքում, այստեղ քիչ է, սակայն մեզ աջակցում են Սյունիքի մարզից: Տեղի է ունենում բերքի իրացում և հիմնականում համագործակցում ենք «Արցախ ֆրութ»-ի հետ, որը գործում է Ստեփանակերտում, իսկ հարավային թևի բնակիչներն դրանք իրացնում են Կապանում, Գորիսում, Ստեփանակերտում, ինչու չէ նաև Երևանում»,-հավելեց Ս Խաչատրյանը։
Քաշաթաղի շրջանի զարգացման գործում իրենց մեծ ներդրումն ունեն նաև սիրիահայերը։ Ըստ Սուրիկ Խաչատրյանի՝ սիրիահայերը շատ լավ են աշխատում հողի հետ։ Այն սիրիահայերը, ովքեր վերաբնակեցվել են այստեղ մինչև Սիրիայի քաղաքացիական պատերազմը, շատ լավ են աշխատում հողի հետ և հարմարվում միջավայրին, իսկ Հալեպից եկածները մի փոքր դժվարությունների հետ են բախվում։ Սիրիահայերը տեղադրելով հաստոցներ, սարքավորումներ այսօր աշխատում են Բերձորում, ոմանք էլ՝ դպրոցներում:
Շրջանում առկա են մի շարք խնդիրներ ևս, որոնք կապված են ճանապարհների, բնակավայրերի, խմելու ջրի, երիտասարդների զբաղվածության հետ։ Ղեկավարի խոսքով՝ շրջանում առկա է ճանապարհների խնդիրը, սակայն այս ուղղությամբ քայլեր ևս ձեռնարկվում են։ Առկա է նաև խմելու ջրի հետ կապված խնդիրը, հատկապես հարավային թևում, որտեղ մարդիկ օգտվում են հորերից: Սա հղի է մեծ վտանգով և հարցի լուծումը կապված է մեծ գումարների հետ: Ս. Խաչատրյանի խոսքով՝ շրջանում առկա է նաև երիտասարդների զբաղվածության խնդիրը, սակայն Քաշաթաղի երիտասարդներն ինքնակազմակերպվող են։ Նրանք մասնակցնում են ծառատունկերի, օգնում են մկնդեղ տեղադրելու հարցում։ Իսկ արդեն 2015թ.-ին ըստ ծրագրի՝ Բերձորում նախատեսվում է արվեստի և մշակույթի տուն կառուցել:
Հանդիպման վերջում Սուրիկ Խաչատրյանը հավելեց նաև, որ հրադադարի խախտման դեպքերը, Մինսկի համանախագահների ելույթները չեն անհանգստացնում քաշաթաղցուն և որ նրանք մարտական են տրամադրված: «Առաջինն այստեղ ապրող մարդն է որոշում: Եթե մեր զինվորի ոտքն այս հողում չլինի, իրենցն էլ չի լինի: Մարդիկ կան Քաշաթաղի տեղը չգիտեն, բայց հողեր տալու զրույցներ են անում։ Մենք ապրում ենք, ապրելու ենք և մի թիզ հող չենք տալու»,-իր խոսքը եզրափակեց Քաշաթաղի շրջանի վարչակազմի ղեկավար՝ Սուրիկ Խաչատրյանը:
Նշենք, որ մի խումբ ուսանողներ և լրագրողներ Արցախի Քաշաթաղի շրջան էին այցելել ԵՊՀ Ռազմավարական հետազոտությունների կենտրոնի նախաձեռնությամբ։
Նունե Խաչատրյան