«Ժառանգություն»-ը կառավարությանը 2015թ. բյուջեի վերաբերյալ առաջարկություններ է ներկայացրել
«Հրապարակ» թերթը գրում է. «Պարզվում է՝ «Ժառանգություն» խմբակցությունը կառավարությանն է ներկայացրել 2015թ. բյուջեի վերաբերյալ առաջարկություններ: Մինչդեռ, երբ Ազգային ժողովում քննարկվում էր բյուջեն, եռյակը հայտարարեց, որ, ի նշան բոյկոտի, որևէ առաջարկ չեն ներկայացնելու: «Ժառանգություն» խմբակցության դիրքորոշումը ներկայացնելիս խմբակցության ղեկավար Ռուբեն Հակոբյանն էլ հայտարարեց, որ չնայած խմբակցությունն ունի շատ առաջարկներ, սակայն չի ներկայացնի՝ բոյկոտելով բյուջեն:
Հայտարարեց նաև, որ իրենք չեն վստահում այն «գործիքակազմին», որը պետք է կատարի բյուջեն: «Ժառանգությունից» առաջարկներ ներկայացնողը Թևան Պողոսյանն է. «Տարբեր քաղաքացիներ, տարբեր կազմակերպություններ ինձ էին դիմել առաջարկություններով, մասնավորապես, Արարատի մարզի սահմանամերձ Արմաշ գյուղի մանկապարտեզի, դպրոցի վերանորոգման աշխատանքների վերաբերյալ: Մի երկու գաղափար ես ինքս եմ առաջարկել, որոնց թվում՝ ԱԺ հանձնաժողովների նիստերն ամբողջությամբ ձայնագրելու և կայքում տեղադրելու վերաբերյալ տեխնիկական սարքերի հաշվարկներ և այլն»:
Մեր հարցին՝ դրանով չի՞ խախտվում եռյակի պայմանավորվածությունը, նա պատասխանեց. «Ես տեղյակ չեմ, որ նման որոշում է ընդունվել, երկրորդ. երբ քաղաքացիները դիմում են պատգամավորին խնդրանքով, ես ի՞նչ իրավունք ունեի քաղաքացիների խնդրանքն արհամարհել»»։
Առավել մանրամասն՝ «Հրապարակ» թերթի այսօրվա համարում: