Չհաջողված քննարկում
«Հրապարակ» թերթը գրում է. «Ազգային ժողովում անցկացվեցին «ՀՀ Եվրասիական տնտեսական միության մասին 2014 թվականի մայիսի 29-ի պայմանագրին միանալու վերաբերյալ» թեմայով խորհրդարանական լսումներ: Կազմակերպիչն ԱԺ արտաքին հարաբերությունների և տնտեսական հարցերի մշտական հանձնաժողովներն էին, նիստը վարում էր Վարդան Այվազյանը: Արտաքին հարաբերությունների մշտական հանձնաժողովի նախագահ Արտակ Զաքարյանն էլ հայտարարեց, որ լսումներին մասնակցողները «կստանան իրենց հուզող հարցերի պատասխանները»:
Թվում էր, թե լսումները կանցնեն բուռն մթնոլորտում, կհնչեն սուր հարցեր ու ելույթներ, ինչպես եղել է, օրինակ՝ ֆեյքերի, հղիների կամ արագաչափերի մասին օրինագծերի լսումների ժամանակ, սակայն քննարկումը միապաղաղ էր: Միակ «աչքի ընկնող» փաստն այն էր, որ այս լսումներն անցկացվում էին ոչ թե ավանդական 334 դահլիճում, այլ ԱԺ նիստերի:
Ամենաակտիվն ու ուրախը լսումներին ներկա ուսանողներն էին ու ինչ-որ հասարակական սեկտորի անհասկանալի ներկայացուցիչներ, ովքեր առաջին անգամ էին լինում խորհրդարանի դահլիճում և, պատգամավորների աթոռներին նստած լինելու փաստից չբավարարված, սկսեցին իրենց հաճույքը կրկնապատկել դահլիճում սելֆիներ անելով, նկարվելով ու Ֆեյսբուքում check-in լինելով՝ ի տես բոլորի:
Ինչեւէ, լսումների մեկնարկն ազդարարեց մի օրով Գալուստ Սահակյանի տեղում նստած Վարդան Այվազյանը, ով ժամանակ առ ժամանակ խնդրում էր լռություն պահպանել և ապահովել իրենց բնականոն աշխատանքը: Նա նաև մի երկու անգամ խնդրեց «հարգարժան լրատվամիջոցներին» տեղ ազատել ու շատ անցուդարձ չանել, որ չխանգարեն ելույթ ունեցողներին: Գլխավոր զեկուցողների՝ էկոնոմիկայի փոխնախարար Էմիլ Տարասյանի և արտաքին գործերի փոխնախարար Շավարշ Քոչարյանի ելույթներից հետո ներկաները հնարավորություն ունեցան հարցեր ուղղելու:
Դահլիճում չէին ՀԱԿ խմբակցության պատգամավորները, ուստի քննարկմանը թեժություն հաղորդելու միակ հույսը մնացել էր Զարուհի Փոստանջյանի փխրուն ուսերին: Բայց Զառան էլ կարծես «ֆորմի» մեջ չէր: Նա ստանդարտ հարց տվեց՝ հաշվարկվե՞լ են արդյոք սցենարները, թե ինչպիսին կլինի Հայաստանի և Արցախի ապագան, երբ Հայաստանն անդամակցի ԵՏՄ-ին՝ հաշվի առնելով, որ Ռուսաստանի տնտեսությունը ծանր վիճակում է և կարող է կոլապսի ենթարկվել: Շավարշ Քոչարյանն էլ ի պատասխան ասաց, որ ինքը լավատես է և ավելի լավատես է լինելու, ու իրենք բոլոր մարտահրավերները ԵՏՄ-ին անդամակցելուց առաջ հաշվի են առել:
Ապա Խաչատուր Քոքոբելյանը հարց ուղղեց էկոնոմիկայի փոխնախարարին՝ խնդրելով հստակ ասել, թե որոնք են այս պայմանագրի ուժեղ և թույլ կողմերը: Տարասյանը պատասխանեց հարցին, բայց հստակ ոչինչ չասաց ո՛չ ուժեղ, ո՛չ էլ թույլ կողմերի մասին: Ավելի ուշ Քոքոբելյանը մեզ հայտնեց, որ բավարարված չէր նրա պատասխանից, քանզի ոչինչ ըստ էության չպատասխանեց: Հնչեցին ևս մի քանի հարցեր արդեն հասարակական սեկտորից, որոնց ևս տրվեցին լղոզված պատասխաններ»:
Առավել մանրամասն՝ «Հրապարակ» թերթի այսօրվա համարում: