Շաբաթվա ներքաղաքական ուշագրավ իրադարձությունները մեր դիտանկյունից. ամփոփում
Նախորդ շաբաթ հանրապետությունում հիշատակման արժանի կարևոր իրադարձություններ տեղի ունեցան:Գլխավոր հարցերից մեկը ղարաբաղա-ադրբեջանական զորքերի շփման գծում խոցված հայկական ուղղաթիռի օդաչուների մարմինների հետ վերադարձնում էր, որը գտնվում էր ոչ միայն ներսի լսարանի, այլև միջազգային հանրության ուշադրության կենտրոնում:
Խոցված ուղղաթիռի հետ կապված քննարկումներ ու արձագանքներ.
Նախորդ շաբաթ քաղաքագետների և վերլուծաբանների ուշադրության կենտրոնում դեպքի հետ կապված քննարկումերն էին: Առաջ քաշված տեսակետներն այդքան էլ շատ չէին: Իր ելույթներից մեկում քաղաքագետ Ալեքսանդր Իսկանդարյանն Ադրբեջանի նման քայլը որակեց որպես «նյարդային ռեակցիայի» արդյունք, որը պատասխանն էր օգոստոսյան դեպքերի: Ադրբեջանը կտրուկ հրաժարվեց ցանկացած զիջումների գնալ և ընդառաջ չգնաց անգամ միջազգային կառույցների կոչերին: Իր նման քայլով Ադրբեջանը ևս մեկ անգամ ցույց տվեց, որ ինքն այն երկիրը չէ, որի հետ կարելի է բանակցային սեղանի շուրջ նստել:
Թեև Ադրբեջանը չցանկացավ զիջումների գնալ, միջազգային հանրությունն էլ չկարողացավ ազդել վերջինիս վրա, բայց ի վերջո՝ մեզ հաջողվեց ետ բերել մեր օդաչուների մարմինները: Նրանց աճյունները նոյեմբերի 25-ին կամփոփվեն Եռաբլուրում:
«Ձախեր»-ն ու Ցեղասպանության ճանաչումը Թուրքիայում.
Նախորդ շաբաթ տեղի ունեցած իրադարձություններից հիշարժան է նաև Թուրքիայում «Կանաչների և ձախերի միության» արած հայտարարությունն այն մասին, որ իրենք ճանաչում են Հայոց ցեղասպանությունը: Սա, իհարկե, անակնկալ էր և մի քիչ էլ անսպասելի, բայց չենք կարող հերքել, որ թուրքական կուսակցության կողմից միայն «Ցեղասպանություն» բառի արտասանումը հաճելի անակնկալ է, թեև ձախերը Թուրքիայում մեծամասնություն չեն կազմում:
Թեև պաշտոնական Թուրքիան չի կիսում ձախերի կարծիքը, բայց և չի տուժում դրանից: Այս հարցի հետ կապված իր տեսակետը հայտնեց նաև թուրքագետ Գևորգ Պետրոսյանը. «Թեև ձախերը նպատակ չեն ունեցել նպաստելու Թուրքիայի իմիջը բարձրացնելուն, քանի որ կուսակցությունը բազմիցս ակտիվ է եղել Հայոց ցեղասպանության ճանաչման հարցում, բայց, այնուամենայնիվ, նման քայլը Թուրքիային որոշակի դիվիդենտ է տալու»: Այլ կերպ ասած՝ Թուրքիայի համբավը, որպես ժողովրդավարական երկիր, միջազգային հանրության աչքում կբարձրանա:
Ամուսնությունների և ամուսնալուծությունների մասին.
Այս շաբաթ 2014 թվականի առաջին 9 ամիսների կտրվածքով ամփոփվեց նաև հանրապետությունում գրանցված ամուսնությունների և ամուսնալուծությունների քանակը: ՀՀ Ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը լրագրողների հետ հանդիման ժամանակ երկայացրեց դրանց համեմատական վերլուծությունը նախորդ տարվա հետ: Այսպիսով, 9 ամսվա կտրվածքով, ամուսնության դեպքերն աճել են 6.5 %-ով և ամուսնությունների ընդհանուր քանակը կազմել է 14 348 : Ինչ վերաբերում է ամուսնալուծություններին, ապա նախորդ տարվա համեմատ դրանք ավելալացել են 28.1 %-ով, իսկ 2012-ի համեմատ՝ 45.7 %-ով:
Որքանով զարմանալի է, աճ է գրանցվել ինչպես ամուսնությունների, այնպես էլ ամուսնալուծությունների քանակում, մինչդեռ, ինչպես տեսնում ենք, ամուսնալուծությունների դեպքերն ավելի շատ են, ընդ որում, պետք է հաշվի առնել, որ այս տվյալները միայն գրանցված ամուսնալուծությունների տվյալներն են:
Արտագաթի ամենաբարձր ցուցանիշ գրանցած շրջանի մասին.
Այս շաբաթ տարվա 9 ամիսների կտրվածքով ամփոփվեց նաև արտագաղթի ցուցանիշը: Ըստ հրապարակված տվյալների՝ հանրապետությունում արտագաղթի ամենաբարձր ցուցանիշը գրանցվել է Գեղարքունիքում, Լոռու և Շիրակի մարզերում: Օտար երկրներից ժամանումների թիվը կազմել է 10 739 մարդ, իսկ հաշվառումից դուրս է եկել 3449 մարդ: Վերը նշված ժամանակահատվածի կտրվածքով 13 600 մարդ դուրս է եկել երկրից:
Operativ.am