Հավատի ոչ արժանի փաստարկումներ
«Ժողովուրդ» թերթը գրում է. «Հայաստանի՝ ԵՏՄ-ին անդամակցությունը չի նպաստի արտագաղթի ավելացմանը, այլ հակառակը: Այսպիսի կարծիք է հայտնել ՏԿՆ միգրացիոն պետական ծառայության պետ Գագիկ Եգանյանը: Թե ինչի վրա է հիմնված Եգանյանի այս լավատեսությունը, դժվար է ասել, առավել ևս, որ նրա ներկայացրած առավելությունները, որոնք ստանալու են Ռուսաստանում աշխատող հայ միգրանտները, բոլորովին հակառակ սպասումների տեղիք են տալիս:
Այսպես՝ Եգանյանի ներկայացմամբ. «ԵՏՄ տարածքում աշխատաշուկաները դառնալու են միասնական։ Ռուսաստանում աշխատանք կատարելիս մեր քաղաքացին եւ Ռուսաստանի Դաշնության քաղաքացին նույն իրավունքներն են ունենալու։ Ներկայում, որպեսզի միգրանտն աշխատի, առանձին ընթացակարգով պետք է ձեռք բերի աշխատանքի թույլտվություն, ներկայացնի փաստաթղթեր և տուրք վճարի։ ԵՏՄ մուտք գործելուց հետո այդ տուրքը վճարելու կարիք չի լինի, ու սա մեծ տնտեսում կլինի»։ Բացի այդ, ըստ նրա, աշխատանքային պայմանագրի գործողության ժամկետում միգրանտը և նրա ընտանիքի անդամները համարվում են օրինական բնակվողներ և կարող են այդ երկրից դուրս գալ ու մուտք գործել, ինչքան ցանկանան:
Ահա այս ամենը նկատի առնելով' կա արդյոք Ռուսաստանում երբևէ ապրած, կամ այդ երկրում արտագնա աշխատանքի գնացած հարազատներ ունեցող մեկը, որը կասկածում է, որ ԵՏՄ-ին անդամակցությունից հետո Հայաստանի ամեն երրորդ աղքատ քաղաքացին շտապելու է մեկնել Ռուսաստան' իր հանապազօրյա հացի հետևից:
Բացի, իհարկե, Գագիկ Եգանյանից, որը ինչ-ինչ խորախորհուրդ մասնագիտական հաշվարկներից ելնելով՝ փորձում է համոզել, որ ծայրահեղ ծանր սոցիալական պայմաններում ապրող ՀՀ քաղաքացու մոտ կկորի Ռուսաստանում աշխատելու ցանկությունը ճիշտ այն պահին, երբ այնտեղ աշխատանքի պայմանները կթեթևացվեն:
Եվ կամ' Ռուսաստանում աշխատող ՀՀ քաղաքացիները կորոշեն վերադառնալ հայրենիք, քանի որ, երբ վերանա փողոցում ռուս ոստիկանի կողմից առանց անձնագրի կամ գրանցման «բռնվելու» և «դեպորտ» արվելու վտանգը, այլևս անհետաքրքիր կդառնա ՌԴ-ում ապրելն ու աշխատելը»:
Առավել մանրամասն՝ «Ժողովուրդ» թերթի այսօրվա համարում: