Ռեյի համախտանիշ. վաղ ախտորոշումը կարող է փրկել երեխայի կյանքը

Ռեյի համախտանիշը հազվադեպ հանդիպող, սակայն ծանր հիվանդություն է, որն առաջացնում է լյարդի և ուղեղի այտուցներ:

Ռեյի համախտանիշը կարող է առաջանալ ցանկացած տարիքում, սակայն սովորաբար զարգանում է երեխաների և դեռահասների մոտ վիրուսային վարակից, առավել հաճախ՝ գրիպից կամ ջրծաղիկից հետո:

Ախտանիշները, ինչպիսիք են շփոթվածությունը, ցնցումները և գիտակցության կորուստը, անհետաձգելի բուժման կարիք ունեն: Ռեյի համախտանիշի վաղ ախտորոշումն ու բուժումը կարող են փրկել երեխայի կյանքը:

Ռեյի համախտանիշի դեպքում երեխայի արյան շաքարը սովորաբար նվազում է, մինչդեռ արյան մեջ ամոնիակի և թթվայնության մակարդակները բարձրանում են:

Լյարդը նույնպես կարող է այտուցվել, և կարող են ճարպեր կուտակվել: Գլխուղեղում կարող է այտուց զարգանալ։ Սա կարող է առաջացնել ցնցումներ, ջղաձգումներ կամ գիտակցության կորուստ:

Ռեյի համախտանիշի ախտանիշները սովորաբար սկսվում են վիրուսային վարակի սկզբից մոտ 3-5 օր հետո: Այդ վարակները կարող են լինել գրիպը, որը նաև հայտնի է որպես ինֆլուենցա, կամ ջրծաղիկը: Ռեյի համախտանիշը կարող է զարգանալ վերին շնչուղիների վարակից հետո, ինչպիսին է մրսածությունը:

2 տարեկանից փոքր երեխաների համար Ռեյի համախտանիշի առաջին ախտանիշները կարող են ներառել`

Փորլուծություն,

հաճախացած շնչառություն:

Ավելի մեծ երեխաների և դեռահասների մոտ վաղ ախտանիշները կարող են ներառել՝

փսխումներ, որոնք չեն դադարում,

քնկոտ կամ դանդաղկոտ լինելը:

Վիճակի խորացման հետ ախտանիշները կարող են ավելի ծանր դառնալ, ներառյալով հետևյալը՝

դյուրագրգիռ, ագրեսիվ կամ անհամարժեք վարքագիծ,

շփոթվածություն կամ չեղած բաներ տեսնելը կամ լսելը (ցնորք կամ հալյուցինացիաներ),

ձեռքերի և ոտքերի թուլություն կամ դրանք շարժելու անկարողություն,

ցնցումներ,

ավելորդ դանդաղկոտություն,

գիտակցության մակարդակի նվազում:

Ռեյի համախտանիշի վաղ ախտորոշումն ու բուժումը կարող են փրկել երեխայի կյանքը, այդ պատճառով պետք է լինել զգոն և հետևել յուրաքանչյուր ախտանշանի, փոխանցում է Aysor.am-ը։